قر پرەزيدەنتى قاسىم-جومارت توقاەۆ اتاپ وتكەندەي, قازاقستان ءۇشىن باستى باسىمدىق – جاستاردى قولداۋ جانە ەلدەگى ادامي كاپيتالدىڭ ساپاسىن دامىتۋ. وسىعان وراي نۇر-سۇلتان قالاسى اكىمدىگىنىڭ «استانا جاستارى» كمم ەلورداداعى «تۇلپار» ساۋدا ورتالىعىنىڭ اۆتوتۇراعىندا بوس جۇمىس ورىندار جارمەڭكەسىن وتكىزۋدى داستۇرگە اينالدىردى. باس قالادا ەكى قولعا ءبىر كۇرەك تاپپاي جۇرگەن جاستار جەتەرلىك. ولاردىڭ ماماندىق بويىنشا جۇمىسقا ورنالاسۋىنا جاردەمدەسۋ ماقساتىندا ۇيىمداستىرىلعان شارا بارىسىندا جۇمىس بەرۋشى مەن جۇمىس ىزدەۋشىلەر بەتپە-بەت كەزدەسىپ, سۇحباتتاسۋعا مۇمكىندىك الدى.
«استانا جاستارى» جاستار رەسۋرستىق ورتالىعىنىڭ جاستارمەن جۇمىس ءبولىمىنىڭ مەڭگەرۋشىسى ءال-فارابي ايماقتىڭ ايتۋىنشا, بۇگىندە باس قالادا جۇمىسسىز جۇرگەن جاستاردىڭ سانى – 10 258. بۇل جۇمىسپەن قامتۋ ورتالىعىندا تىركەۋدە تۇرعانداردىڭ 4,6 پايىزىن قۇرايدى.
– قالالىق جۇمىسپەن قامتۋ ورتالىعىمەن بىرلەسە وتىرىپ ۇيىمداستىرىلعان بوس ورىندار جارمەڭكەسىنە 10-عا جۋىق جۇمىس بەرۋشى قاتىسىپ, جۇمىس ىزدەپ جۇرگەن جاستارعا 100-گە جۋىق جۇمىس ۇسىندى. ءدال وسىنداي جارمەڭكەلەردى جۇمىسپەن قامتۋ ورتالىعى ءبىر اي كولەمىندە, ال ءبىزدىڭ ورتالىق ايىنا ءبىر رەت وتكىزەمىز. مۇندا كەلەتىندەردىڭ كەيبىرى ۋاقىتشا, ال باسىم بولىگى تۇراقتى جۇمىستار ىزدەيدى. ۇسىنىلاتىن جالاقى مولشەرى مەن قويىلاتىن تالاپ تا ماماندىعىنا بايلانىستى تۇرلىشە بولىپ كەلەدى, – دەدى ءبولىم مەڭگەرۋشىسى ءا.ايماق.
ءادىلحان اۋشاكيموۆتىڭ ەكىباستۇزدان ەلورداعا كوشىپ كەلگەنىنە كوپ ۋاقىت وتە قويعان جوق. ماماندىعى – ماشينيست. جارمەڭكەگە جالاقىسى جوعارى جۇمىس ىزدەپ كەلگەنىن جەتكىزدى.
«بوس ورىندار جارمەڭكەسى – جۇمىسسىزدارعا وتە قولايلى مۇمكىندىك. بۇل, اسىرەسە مەن سەكىلدى جاستارعا جالاقىسى جوعارى ءارى تۇراقتى جۇمىس تابۋعا كەرەمەت كومەك دەر ەدىم. قازىر ءبارى قىمبات. پاتەراقى, جولاقى, ءىشىپ-جەمىمىز بار, دەمەك استانادا 200 مىڭ تەڭگەدەن تومەن جالاقىمەن ءومىر ءسۇرۋ قيىن دەپ ەسەپتەيمىن. بۇل رەتتە جۇمىسپەن قامتۋ ورتالىعى ۇيىمداستىرىپ وتىرعان شارانىڭ ماڭىزى زور. جاستار سونى دۇرىس پايدالانا ءبىلۋى كەرەك. ءوز باسىم ەكىباستۇزدا وسى ورتالىقتىڭ يگىلىگىن كورگەن جانداردىڭ ءبىرىمىن. باس قالادا دا جۇمىستى وسى جەردەن تابامىن دەگەن نيەتپەن جارمەڭكەگە كەلىپ وتىرمىن, ءۇمىتىم زور. جاقىندا جۇمىسقا ورنالاسامىن دەگەن نيەتتەمىن» دەدى جۇمىس ىزدەۋشى ءادىلحان اۋشاكيموۆ.
الديار تىلەمىسوۆ بولسا – ستۋدەنت. دەگەنمەن, جازعى دەمالىس كەزىندە جۇمىسقا تۇرۋدى ماقسات ەتىپ وتىر. «مەن وسى نۇر-سۇلتان قالاسىندا كوللەدجدە وقيمىن. بولاشاق ماماندىعىم – بايلانىسشى. الداعى جىلى وقۋىمدى بىتىرەمىن. سوندىقتان ماماندىعىم بويىنشا لايىقتى جۇمىس ىزدەپ, وسى جارمەڭكەگە ادەيى كەلدىم. مۇندا «كازاحتەلەكوم» كومپانياسىنىڭ وكىلدەرىمەن سويلەسىپ, كەلىستىم. جالپى, جارمەڭكەگە كەلگەنىمە وكىنبەيمىن. كەرىسىنشە ءوز ماماندىعىم بويىنشا جۇمىسقا ورنالاسۋعا مۇمكىندىك العانىما قۋانىشتىمىن. ەندى تەك بەل شەشىپ, بىلەك سىبانا ىسكە كىرىسۋىم كەرەك» دەدى الديار تىلەمىسوۆ.
وسىلايشا, ەلوردا جاستارى وزدەرى قالاعان سالاداعى بوس جۇمىس ورىندارىن زەردەلەۋگە جانە بىرنەشە جۇمىس بەرۋشىمەن ءبىر جەردە تىكەلەي سويلەسۋگە مۇمكىندىك الدى. سونداي-اق جارمەڭكە بارىسىندا جۇمىس ىزدەۋشىلەرگە ۋاقىتشا جانە تۇراقتى جۇمىسقا ورنالاسۋ جانە ەڭبەك نارىعىنداعى سۇرانىسقا يە ماماندىقتار بويىنشا قايتا دايارلاۋ كۋرستارىنان ءوتۋ مۇمكىندىكتەرى تۋرالى تۇسىنىك بەرىلىپ, جارمەڭكەگە جينالعاندار «بيزنەس باستاۋ» باعدارلاماسى, مەملەكەتتىك گرانتتار بويىنشا كەڭەس الدى.
گۇلبارشىن وكەشقىزى
