حالىقتى ناتيجەلى جۇمىسپەن قامتۋ جانە ازاماتتاردى كاسىپكەرلىككە تارتۋ ماقساتىندا ەلوردادا ناقتى جۇمىس اتقارىلىپ جاتىر. قالالىق تەكسەرۋ كوميسسياسى «ەڭبەك» مەملەكەتتىك باعدارلاماسىنىڭ جەكەلەگەن ءىس-شارالارىن ىسكە اسىرۋ تيىمدىلىگىنە مەملەكەتتىك اۋديت جۇرگىزىپ, كەزەكتى وتىرىسىندا ونىڭ قورىتىندىلارى تۋرالى ماسەلەنى قارادى.
تەكسەرۋ كوميسسياسىنىڭ توراعاسى ءيمانجۇسىپ اقپانباەۆ اۋديت نۇر-سۇلتان قالاسىنىڭ «جۇمىسپەن قامتۋ جانە الەۋمەتتىك قورعاۋ باسقارماسى», «ءبىلىم باسقارماسى» مەملەكەتتىك مەكەمەلەرى مەن جۇمىسپەن قامتۋ ورتالىعىنا جۇرگىزىلگەنىن اتاپ ءوتتى. ءوز كەزەگىندە كوميسسيا وتىرىسىنا وسى مەكەمەلەردىڭ باسشىلارىمەن بىرگە كوميسسيا مۇشەلەرى قاتىستى.
وتىرىس بارىسىندا ءسوز العان كوميسسيا مۇشەسى اماندىق مولداشەۆ, اتقارىلىپ جاتقان جۇمىستارعا قاراماستان, اتالمىش مەكەمەلەردە بيۋدجەت قاراجاتىن جوسپارلاۋ جانە پايدالانۋ كەزىندە قر زاڭناماسى نورمالارىنىڭ بۇزۋشىلىعى جالعاسىپ جاتقانىن جەتكىزدى. وسىلايشا «ەڭبەك» باعدارلاماسىنا قاتىسۋشىلاردى تەحنيكالىق جانە كاسىپتىك بىلىممەن قامتاماسىز ەتۋ» بولىگىندە «ەڭبەك» باعدارلاماسىنىڭ ءبىرىنشى باعىتىنىڭ ورىندالۋىنا جۇرگىزىلگەن تالداۋ جانە باعالاۋ بەلگىلەنگەن كورسەتكىشتەردىڭ ورىندالماعانىن كورسەتتى.
وقۋ بىتىرگەننەن كەيىن جاستاردىڭ باسىم بولىگى ديپلوممەن جۇمىسقا ورنالاسۋعا اسىقپايدى. ءتىپتى بۇگىنگى تاڭدا ەڭبەك نارىعىندا اسا سۇرانىسقا يە ەلەكتريك, مودەلەر-ءپىشۋشى, ليفت ەلەكترومەحانيگى, ساندىق اقپاراتتى وڭدەۋ جونىندەگى مامان دەگەن ماماندىقتارى بولا تۇرا, جۇرگىزۋشى, اكىمشى, ارت-مەنەدجەر, شاشتاراز, ماكياج سۋرەتشىسى, كاسسير, حاتشى, ريەلتور, سانيتار, جۇك تيەگىش سىندى ءارتۇرلى جۇمىسشى ماماندىعىمەن نان تاۋىپ جۇرگەندەر جەتەرلىك.
سونىمەن قاتار ءبىلىم باسقارماسى جۇرگىزگەن مونيتورينگ قورىتىندىسى بويىنشا 2020 جىلى 886 تۇلەكتىڭ 329-ى جانە وتكەن جىلى 956 تۇلەكتىڭ 249-ى جۇمىسقا ورنالاسپاعان.
– جۇمىس بەرۋشىلەردىڭ وتىنىمدەرى جانە ەڭبەك نارىعىندا تالاپ ەتىلەتىن بىلىكتىلىكتەر مەن داعدىلار بويىنشا قىسقامەرزىمدى كاسىپتىك وقىتۋعا قاتىسۋشىلار بويىنشا دا جاعداي قايتالانادى. وسىلايشا وقۋدى اياقتاعانداردىڭ ۇلەسى ورتا ەسەپپەن 94 پايىزدى, جۇمىسقا ورنالاسقانداردىڭ ۇلەسى 71 پايىزدى قۇرايدى, بۇل رەتتە سوڭعى ەكى جىلدا ءبىلىم الۋشىلاردىڭ سانى 2019 جىلمەن سالىستىرعاندا 5,7 ەسەگە ازايدى. ءبىلىم بەرۋ ۇيىمدارىندا قىسقا مەرزىمدى كاسىپتىك وقىتۋدىڭ قۇنىن ايقىنداۋ ادىستەمەسى جوق, ونى ءبىلىم مينيسترلىگى 2020 جىلعى ساۋىردە بەكىتۋى ءتيىس ەدى, بۇل رەتتە جۇمىسپەن قامتۋ ورتالىعى وقىتۋ قۇنىن وقۋ ورىندارىنىڭ باعا ۇسىنىسىنا سۇيەنە وتىرىپ ايقىندادى, – دەدى ا.مولداشەۆ.
2021 جىلى قىسقا مەرزىمدى كاسىپتىك وقىتۋدى اياقتاعان تىڭداۋشىلار بويىنشا جۇمىسپەن قامتۋ ورتالىعى العان 79 ادامدى بىلىكتىلىگى بويىنشا جۇمىسقا ورنالاستىرۋدى قامتاماسىز ەتپەگەن. جاڭا بيزنەس-يدەيالاردى ىسكە اسىرۋعا مەملەكەتتىك گرانت بەرۋ بولىگىندە «ەڭبەك» باعدارلاماسىنىڭ ەكىنشى باعىتىنىڭ ورىندالۋىنا جۇرگىزىلگەن تالداۋ مەن باعالاۋدا بىرقاتار كەمشىلىك پەن بۇزۋشىلىق انىقتادى.
جىل سايىن قوعامدىق جۇمىستاردى قارجىلاندىرۋ ءۇشىن قوماقتى قاراجات بولىنگەنمەن, سوڭعى ءۇش جىلدا جۇمىسسىزداردىڭ تەك 3,9 پايىزى عانا تۇراقتى جۇمىسقا ورنالاستى. «العاشقى جۇمىس ورنى» جوباسى بويىنشا العاش رەت جۇمىس ىزدەپ جۇرگەن تۇلەكتەر, جۇمىس ىزدەپ جۇرگەن ادامدار, 29 جاستان اسپاعان جاستار قاتارىنداعى, حالىقتى جۇمىسپەن قامتۋ ورتالىعىندا تىركەلۋىنە قاراماستان, جۇمىسسىز ادامدار, ونىڭ ىشىندە NEET ساناتى, جۇمىس تاجىريبەسى جوق جانە «ۇرپاقتار كەلىسىمشارتى» جوباسى ءوزىنىڭ تيىمسىزدىگىن كورسەتتى.
تەكسەرۋ كوميسسياسى وتىرىسىنىڭ قورىتىندىسى بويىنشا قاۋلى قابىلدانىپ, اۋديت وبەكتىلەرىنە ءتيىستى تاپسىرما مەن ۇسىنىم جىبەرىلدى.
گۇلبارشىن
وكەشقىزى
