ەلوردا اكىمى التاي كولگىنوۆ دەمالىس كۇندەرى بىرقاتار قالالىق نىسانداردى ارالاپ, جۇمىس بارىسىمەن تانىستى.
قالا باسشىسى الدىمەن «استانا LRT» جاۋاپكەرشىلىگى شەكتەۋلى سەرىكتەستىگىنە باردى. مۇندا اكىم قالاداعى قوعامدىق كولىك پروبلەمالارى مەن استانانىڭ ينفراقۇرىلىمىن دامىتۋدىڭ وزەكتى ماسەلەلەرىمەن تانىسىپ, ۋاقىت وزدىرماي قولعا الىنۋى ءتيىس مىندەتتەردى ايقىندادى. بۇل رەتتە قالانىڭ شەت ايماقتارىنداعى جولداردى جوندەۋ, «استانا LRT» جشس-نىڭ مەكەنجاي باعدارلامالارى بويىنشا قوعامدىق كولىك باعدارلارىنىڭ سوڭعى ايالداما نىساندارىن سالۋ, جول قوزعالىسىن رەتتەۋ قۇرالدارىنا كەشەندى قىزمەت كورسەتۋ, قالا كوشەلەرىنىڭ قاۋىپتى ۋچاسكەلەرىندە 77 باعدارشام ورناتۋ قاجەتتىلىگىن اتاپ ءوتتى.
سونىمەن قاتار اكىم «نۇرا-ەسىل» ارناسىنا بارىپ, جاعالاۋدى اباتتاندىرۋ جۇمىستارىمەن جانە تازارتۋ قۇرىلعىلارىنىڭ قۇرىلىسىمەن تانىستى. №27 كوشەنىڭ قۇرىلىس الاڭىنا بولىپ, اتقارىلىپ جاتقان جۇمىسقا كوز جەتكىزدى. تەلمان تۇرعىن الابىنىڭ وڭتۇستىك جاعىنداعى ەسىل وزەنىنىڭ سول جاعالاۋىندا ورنالاسقان ءىى-6 ايماعىنىڭ نوسەر كارىزىن تازارتۋ قۇرىلعىلارىنىڭ قۇرىلىسىمەن دە تانىستى. قۇرىلىسقا ارنالعان ورىن كۇردەلى جۇمىستى قاجەت ەتەتىن, جەراستى سۋلارىمەن تولعان, ەرتەرەكتە قيىرشىق تاس وندىرىلگەن بوس كارەردە ورنالاسقان. جوبا بويىنشا مۇندا 1814,0 گەكتارعا سۋ جيناۋ اۋماعى, ءىى-6 ايماعىنىڭ نوسەر كارىزىن تازارتۋ قۇرىلعىسىمەن تاۋلىگىنە 36,280 م3 سۋدى وتكىزۋ قاراستىرىلاتىن نىسان سالىناتىن بولادى.
ەلوردا اكىمى نىسانداردى ارالاۋ كەزىندە ءتيىستى كاسىپورىندار مەن مەكەمەلەرگە جوسپارلانعان جۇمىستاردى شيراتۋدى ءارى مەرزىمگە سايكەس جۇرگىزۋگە بايلانىستى تاپسىرمالار جۇكتەدى.
