«بالا – ايەل باقىتى» دەپ ءجيى ايتامىز. ال كوپ بالالى انا بولۋدىڭ ودان اسقان باقىت ەكەندىگىن ءبىزدىڭ كەيىپكەر جاقسى بىلەدى. ەكى بالانى دۇنيەگە اكەلگەننەن كەيىن ول جەتىمدەردى اسىراپ, قامقورلىعىنا الادى. استانالىق جانار بايجۋلدينوۆا كوپشىلىككە ءدال وسى قىرىنان بەلگىلى. بۇگىندە ارداقتى انا 13 بالانى ماپەلەپ وتىر.
– كىشكەنتاي كەزىمنەن باستاپ جەتىم بالالارعا قامقورلىق كورسەتىپ, ءوز باۋىرىما باسقىم كەلدى. مەكتەپ جاسىندا بالالار ۇيىنە ءجيى بارىپ تۇردىق. وقۋدى ءبىتىرىپ, كۇيەۋگە شىقتىم, ودان كەيىن جۇمىسقا تۇردىم. كابينەتىمنىڭ تەرەزەلەرى تۋرا جەتىمدەر ۇيىنە قارايتىن ەدى. سول كورىنىس بالالىق ارمانىمدى ەسكە تۇسىرەتىن. قىزىمنان كەيىن ەكىنشى بالامدى تۋماس بۇرىن, كۇيەۋىممەن اقىلداسىپ, بالا اسىراپ الۋدى ۇسىندىم. كەلىسىم بەرمەدى. ال ۇلىمدى قولىما العاننان كەيىن ءدام-تۇزىمىز جاراسپاي قالدى, – دەپ اڭگىمەسىن باستادى ول.
ارينە, ەكى بالامەن قالعان جاس اناعا وڭاي بولماعانى ءسوزسىز. وعان قوسا, سول كەزدە ۇلى دانيال ءبىر جاسقا كەلگەندە دەنساۋلىعى سىر بەرەدى. قانشاما دارىگەرلەرگە جولىعىپ, ناتيجەسىندە وعان ەپيلەپسيا دەگەن دياگنوز قويىلادى. اۋرۋدى قۇدايدان كەلگەن سىناق دەپ قابىلدايدى. ءدال سول ساتتە «جەتىمدەر ۇيىنەن بالا اسىراپ الامىن» دەگەن بايلامعا كەلەدى. تۋعان قىزى ارۋجان بۇل شەشىمىن قولداپ, جانار بالالار ۇيىنەن العاشقى بالاسىن الىپ كەلەدى.
جەتىمدەر ۇيىندەگى ءتورت ايلىق ەليزاۆەتا ەسىمدى قىز ۇيگە قۇت اكەلەدى. ۇلى اۋرۋىنان ايىعىپ, جاناردىڭ جانى جاي تابادى. ءار بالانىڭ ءوز نەسىبەسى بار. ءار نارەستە كوڭىلگە قۋانىش سىيلايدى.
سول سەبەپتەن, جانار جەتىمدەر ۇيىنەن بالا اسىراپ الۋدى جالعاستىرادى. ولاردى تاۋار سياقتى تاڭداماي, ۇلتى مەن جاسىنا قاراماستان, ون ءبىر بالانى باۋىرىنا باسادى. العاشىندا اسىراپ العان انانى نارەستەلەر ءبىراز بوتەنسىنەدى, كىشكەنتايلار دا جاتىرقايدى. كەيىن انا جۇرەگى تاربيەنىڭ ەڭ تاماشا ۇلگىسى وتباسىڭدى ماحابباتقا بولەۋ ەكەندىگىن ۇعىنادى. «بوتەن بالا بولمايدى, ءبارىن جاقسى كورەمىن» دەيدى ول.
بۇگىندە بالاقايلار ءبىر-بىرىنە ۇيرەنىپ, دوستاسىپ كەتكەن. وتباسىندا تاتۋ-ءتاتتى, ۇلكەندەر كىشىلەرگە قارايلاسىپ, انالارىنا قولعابىس كورسەتەدى. ايەلدىڭ اكە-شەشەسى دە اسىراندى بالالاردى تۋعانىنداي كورىپ, جيەن نەمەرەسى رەتىندە قابىلدايدى.
«بالا تاعدىرى – بارىمىزگە ورتاق. ولارعا كيىم-كەشەك, ويىن-ساۋىقتان گورى انا مەيىرىمىن كورىپ, وتباسىندا ءومىر سۇرگەن ماڭىزدى» دەيدى قايىرىمدى جان.
بالالاردىڭ ۇلكەنى – 16 جاستا. ءبىزدىڭ كەيىپكەر كىشكەنتايلار كامەلەتكە تولعاننان كەيىن دە قامقور بولاتىنىن جەتكىزدى. كوپ بالالى انا قىزىن قياعا, ۇلىن ۇياعا قوندىرۋدى ارماندايدى.
ءارتۇرلى تاعدىر يەلەرى ەلىمىزدەگى بالا اسىراپ الۋدىڭ جولىن بىلگىسى كەلەدى. جانار بارلىعىن ءبىر جەرگە جيناپ, تەگىن ترەنينگ وتكىزەدى. ءوز باسىنان وتكەن قيىندىقتارىن بايانداپ, انا بولۋ باقىتىمەن بولىسەدى. زاڭ جۇزىندە قۇجاتتاردى قالاي راسىمدەۋ كەرەكتىگىن ايتىپ, كەڭەس بەرەدى. قازىردىڭ وزىندە كەڭەستەرىنىڭ ارقاسىندا قانشاما وتباسى بالالى-شاعالى بولىپ وتىر.
جۇرەگى جۇمساق جانار – بالالارى ءۇشىن تەك مەيىرىمدى انا عانا ەمەس, ەشنارسەدەن قورىقپايتىن قامقورشى. مىنە, قايسار قازاق قىزىنىڭ كەلبەتى وسىنداي بولسا كەرەك. باتىر انا ومىرىندە قيىندىقتارعا ءجيى تاپ بولاتىنىن جاسىرمايدى. الايدا ولارعا توتەپ بەرىپ, كۇرەسۋدەن جالىقپايدى. «ۇيگە كىرە سالا, «ماما, ماما!» دەپ اينالاڭا شوعىرلانعان بۇلدىرشىندەردىڭ داۋىسىن ەستي سالا, بارلىق شارشاعانىم باسىلادى» دەيدى ول.
گۇلدانا تالعاتقىزى
