وسىنداي تاقىرىپتاعى جاس ورىنداۋشىلار اراسىنداعى ءان بايقاۋى – استانا تويى اياسىندا ءوتىپ كەلە جاتقان ىرگەلى شارا. ۇيىمداستىرۋشىلاردىڭ ايتۋىنشا, ءان سايىسىنا وتىنىمدەر 20 ماۋسىمعا دەيىن قابىلدانادى. ءتورتىنشى جىل شىمىلدىعىن تۇرگەن بايقاۋ قورجىنىنا قازاقستان استاناسى تۋرالى جۇزدەن اسا جاڭا اندەر جيناقتالعان ەكەن.
«ءان جۇرەگىم – استانا!» بايقاۋى جاس استانا تۋرالى اۆتورلاردىڭ ۇزدىك اندەرىن قولداۋ مەن دارىپتەۋگە باعىتتالعان. راسىندا, كوركى كوز سۇيسىندىرگەن ارۋ قالا تالاي اقىن-سازگەرلەردىڭ شىعارمالارىنا ارقاۋ بولدى. استانا جايىندا جازىلعان جاڭا اندەردىڭ وزەگىندە وتباسىنا, جاڭا مۇمكىندىكتەر اشقان سۇيىكتى قالا مەن وتانعا دەگەن سۇيىسپەنشىلىك جاتىر. ۇيىمداستىرۋشىلاردىڭ دا كوزدەگەنى وسى – جاستار جۇرەگىنە ازاماتتىق-پاتريوتتىق سەزىم ۇيالاتۋ. سونىمەن بىرگە, بۇل بايقاۋ – تالانتتى جاستاردىڭ ءوز ونەرىن كەڭىنەن پاش ەتۋگە جاسالعان تاماشا مۇمكىندىك.
«ءان جۇرەگىم – استانا!» رەسپۋبليكالىق ءان بايقاۋىنىڭ بيىلعى تاقىرىبى استانا كۇنىنىڭ ۇرانىمەن ۇندەس. ياعني, اقىن-سازگەرلەر «مەنىڭ قالام – مەنىڭ تاعدىرىم. تۋعان كۇنىڭمەن, استانا!» تاقىرىبىنا ءان ارناماق.
اتالمىش بايقاۋدىڭ ارناسى كەڭ. اعىمداعى جىلى شاراعا قازاقستاننىڭ 7 ايماعىنان وتىنىمدەر جولدانعان. جەڭىمپازداردى قۇرامى قازاقستانعا تانىمال ارتىستەردەن تۇراتىن قازىلار القاسى انىقتايدى. قاتىسۋشىلارعا قويىلاتىن باستى تالاپ – جاسى 30-دان اسپاۋى جانە ءان باعىتى «ءان جۇرەگىم – استانا!» بايقاۋىنىڭ نەگىزگى تاقىرىبىنان اۋىتقىماۋى ءتيىس.
«ءان جۇرەگىم – استانا!» ءان بايقاۋىنىڭ گران-پري يەگەرى ۇيىمداستىرۋشىلارمەن بىرلەسىپ رەسپۋبليكالىق تەلەارنالار ەفيرىنەن تاراتىلاتىن استانا تۋرالى انگە بەينەبايان تۇسىرۋگە مۇمكىندىك الادى. ال باسقا قاتىسۋشىلار گالا-كونتسەرتتە ەستەلىك ديپلومدارمەن جانە باعالى سىيلىقتارمەن ماراپاتتالادى.
