باس قالانىڭ 20 جىلدىعىنا وراي «Astana aqshamy» جانە «ۆەچەرنيايا استانا» گازەتتەرىندە جاريالانعان ماتەريالدار نەگىزىندە «ەل جۇرەگى – ەلوردا شەجىرەسى» جانە «سەردتسە موە – استانا» كىتاپتارى جارىق كوردى.
جاڭا تۋىندىلاردىڭ تۇساۋكەسەر راسىمىنە ەلوردا تاريحىنىڭ قالىپتاسۋىنا ۇلەس قوسقان قايراتكەرلەر, قالالىق مەكەمەلەردىڭ باسشىلارى, دەپۋتاتتار جانە ارتىستەر قاتىستى. جيىندى اشقان استانا اكىمىنىڭ ورىنباسارى ەرمەك امانشاەۆ:
– كىتاپتا قوس گازەت تىلشىلەرىنىڭ استانا جايلى ماقالالارى مەن فوتورەپورتاجدارى بار. وندا جاس قالانىڭ 20 جىلداعى كەسكىن-كەلبەتى, ەلوردادا وتكەن ايتۋلى شارالار جانە قالا ومىرىندەگى جاڭالىقتار جيناقتالعان. بۇل كىتاپتى ءبىزدىڭ استانانىڭ شەجىرەسى دەۋگە بولادى. وسىعان جانىن بەرىپ, بەلسەنە اتسالىسقان بارلىق اۆتورلارعا استانا قالاسى اكىمدىگى اتىنان العىسىمدى ايتامىن, – دەدى.
ارقايسىسى 332 بەتتەن تۇراتىن كىتاپتارعا شامامەن 500-گە جۋىق ماقالا مەن فوتوسۋرەت كىرىستىرىلگەن. جۋرناليستەر «Astana aqshamy» جانە «ۆەچەرنيايا استانا» گازەتتەرىنىڭ 1998 جىلدان بەرگى ءار ءنومىرىن قاراپ, وسى گازەتتەردە بۇرىن جۇمىس ىستەگەن ارىپتەستەرىمەن, قالا قۇرىلىcىنا قاتىسى بولعان ازاماتتارمەن سويلەسىپ, اقپارات جيناپ, جارتى جىل بويى ءونىمدى جۇمىس ىستەگەن.
قوس گازەتتىڭ رەداكتسيالارىن بىرىكتىرەتىن «Elorda Aqparat» سەرىكتەستىگىنىڭ ديرەكتورى قايسار جۇمابايۇلىنىڭ ايتۋىنشا, كىتاپتار الداعى ۋاقىتتا قالانىڭ بارلىق كىتاپحانالارىنا تەگىن تاراتىلادى.
