ەلوردانىڭ «پريگورودنىي» شاعىن اۋدانىندا جىل بويى جۇمىس ىستەيتىن العاشقى اۋىلشارۋاشىلىق جارمەڭكەسى وتكەن جىلدىڭ سوڭىندا اشىلعان بولاتىن. سودان بەرى جۇمىسىن ۇزدىكسىز جۇرگىزىپ, تۇرعىندارعا تومەن باعامەن تاۋار ۇسىنىپ كەلەدى. كۇندەلىكتى جۇمىس ىستەيتىن جارمەڭكەدە استانالىق جۇرت ىزدەگەنىنىڭ بارلىعىن تابادى.
عيمارات اۋماعى 7000 شارشى مەتردى قۇرايدى. مۇندا ءبىر مەزەتتە 150 كاسىپكەردىڭ ساۋدا جاساۋىنا مۇمكىندىك بار. بۇل – ازىرشە باس قالاداعى ءبىرىنشى ءارى جالعىز جىل بويى جۇمىس ىستەيتىن جارمەڭكە. جارمەڭكە «Astana» الەۋمەتتىك-كاسىپكەرلىك كورپوراتسياسى» اق مەن نۇر-سۇلتان قالاسى اكىمدىگىنىڭ قولداۋىمەن اشىلعان.
مۇندا ازىق-تۇلىك تاۋارلارىنىڭ بارلىق تۇرلەرى ساتىلادى. ەت, ءسۇت ونىمدەرى, جەمىس-جيدەك پەن كوكونىستەر, تاۋىق ەتى مەن جۇمىرتقا, بالىق, جارما, نان-توقاش تۇرلەرى قالاداعى بازار باعالارىنان تومەن. بەلگىلەنگەن باعالار عيماراتتىڭ كىرەبەرىسىنە جانە ىشىنە ىلىنگەن. مىسالى, سيىر ەتىنىڭ كەلىسى 2000 تەڭگە بولسا, تاۋىق ەتىنىڭ كەلىسى 900-1100 تەڭگە ارالىعىندا. جىلقى ەتىنىڭ شەكتى باعاسى كەلىسىنە 2500 تەڭگەدەن اسپايدى.
«جەرگىلىكتى كاسىپكەرلەردەن باسقا, قاراعاندى, پاۆلودار, اقمولا سەكىلدى كورشىلەس وبلىستار اۋىل شارۋاشىلىعى تاۋارلارىن وسىندا اكەلەدى. العاشقى ءۇش ايدا ءبىز ولارعا ورىنداردى تەگىن بەرۋدى جوسپارلاپ وتىرمىز. ودان كەيىن جەڭىلدەتىلگەن تاريفپەن جالعا بەرىلەدى. تۇسكەن پايدا كوممۋنالدىق قىزمەتتەر بويىنشا شىعىنداردى جابۋ ءۇشىن جۇمسالادى» دەيدى جارمەڭكە مەڭگەرۋشىسى باۋىرجان ۋۆاليەۆ.
تيىمدىلىگى مول جارمەڭكە قالانىڭ بازارلارى ورنالاسقان ماڭداعى كولىك اعىنىن ازايتىپ, اۋەجاي باعىتىنداعى تۇرعىنداردى, «پريگورودنىي» شاعىن اۋدانىنداعى 50 مىڭعا جۋىق ەلوردالىقتاردى, ونىڭ ىشىندە الەۋمەتتىك تۇرعىدا از قامتىلعان توپتاردى قامتيدى. جىل بويعى اۋىلشارۋاشىلىق جارمەڭكەسى وتەتىن ساۋدا ورتالىعى «پريگورودنىي» تۇرعىن الابى, ارناساي كوشەسى, 109 مەكەنجايىندا ورنالاسقان. اپتانىڭ قاي كۇنى بارساڭىز دا ساۋدا ورنىنىڭ ەسىگى اشىق.
بايجان جەلدەن
