جىلجىمايتىن مۇلىكتى بيزنەس ماقساتىندا قولدانۋ ءۇشىن تۇرعىن ءۇي قورىنان قالاي شىعارۋعا بولادى؟

ءبىزدىڭ كەڭەسشىلەر – نۇر-سۇلتان قالاسىنىڭ ساۋلەت, قالا قۇرىلىسى جانە جەر قاتىناستارى باسقارماسى باسشىسىنىڭ ورىنباسارى انتون ماكسيموۆ جانە «ازاماتتارعا ارنالعان ۇكىمەت» مەملەكەتتىك كورپوراتسياسى» فيليالىنىڭ نۇر-سۇلتان قالاسى بويىنشا PR مەنەدجەرى اينۇر جاقانوۆا.

1-قادام.  نۇر-سۇلتان قالاسىنىڭ ساۋلەت, قالا قۇرىلىسى جانە جەر قاتىناستارى باسقارماسىنا بارىپ وسى ۇيدە قايتا وڭدەۋ جۇمىستارىن جۇرگىزۋگە بولا ما, سونداي-اق ەلەكتر, بايلانىس جەلىلەرى, قۇبىرلار, اۆتوكولىك جولدارى, باسقا دا عيماراتتار بار ەكەنىن كورسەتەتىن قىزىل سىزىق وتپەي مە, باسقا دا مەنشىك يەلەرىنە زيانى تيمەي مە, سونى ءبىلىپ العانىڭىز ءجون.

2 -قادام. سەيسمولوگتىڭ قورىتىندىسىن, توپوگرافيالىق ءتۇسىرىلىم جانە ساۋلەتتىك جوبالاۋ جۇمىسىن (اپز) الۋ كەرەك. ەگەر ساۋلەت باسقارماسى وسى تۇيتكىلدى ماسەلەگە وڭ شەشىمىن بەرسە, پاتەردى ساتىپ الۋعا شەشىم قابىلداۋعا بولادى. ودان كەيىن سەيسمولوگيالىق قۇرىلىس جونىندەگى اتتەستاتسيادان وتكەن ماماننان قۇراستىرىلىمنىڭ جاعدايى (كونسترۋكتسيا) جانە قايتا جوبالاۋ مۇمكىندىكتەرى تۋرالى ساراپتامالىق قورىتىندىنى الۋ كەرەك. جوبالاۋعا بايلانىستى توپوگرافيالىق ءتۇسىرىلىمدى جانە سجج-نى (اپز) الۋعا تاپسىرىس بەرىپ, قۇجات وتكىزۋدى دە قاباتتاسىپ جۇرگىزگەن ءجون. ويتكەنى توپوگرافيالىق ءتۇسىرىلىم بەرىلگەن كۇننەن باستاپ بەلگىلى ءبىر مەرزىم التى ايعا بەرىلەدى. سوندىقتان جەر ۋچاسكەسىنە قۇقىق بەرەتىن قۇجاتتى رەتتەۋ ءۇشىن قۇرىلىس جۇمىسى بىتكەننەن كەيىن قايتادان تاپسىرىس بەرەسىز. سجج-نى ساۋلەت ورگاندارىندا «ازاماتتارعا ارنالعان ۇكىمەت» مەملەكەتتىك كورپوراتسياسى» فرونت-كەڭسەلەرىنەن نەمەسە ەلەكتروندى ۇكىمەتتەن الۋعا بولادى.

3-قادام. كورشىلەر كەلىسىمىن الۋ كەرەك. پاتەرگە, ورىن جايعا ناقتى ىنتىزارى بار عانا پاتەر يەلەرىنىڭ نوتاريالدى كۋالاندىرىلعان كەلىسىمىن الۋ كەرەك. بىراق كەي جاعدايلاردا كوپپاتەرلى تۇرعىن ءۇي ورگاندارىنىڭ جارعىسىنا قاراماستان, مەنشىك يەلەرىنىڭ 70 پايىزىنىڭ كەلىسىمى قاجەت بولۋى مۇمكىن.

4-قادام.  جوباعا تاپسىرىس بەرىپ, ساۋلەت ورگاندارىمەن كەلىسۋ كەرەك. جوباعا تاۋەلسىز ساراپتاما جۇرگىزىپ, مەردىگەردى انىقتاپ, اۆتورلىق جانە تەحنيكالىق باقىلاۋمەن كەلىسىمشارتقا وتىرۋ. نىساننىڭ قايتا وڭدەۋ جوباسىن (قايتا جابدىقتاۋ, جاڭادان جوسپارلاۋ) ليتسەنزياسى بار مەكەمەلەر مەن مامانداردان العان دۇرىس. دايىن جۇمىس جوسپارى ساۋلەت ورگاندارىمەن كەلىسىلىپ, تاۋەلسىز ساراپتامانى ءوتۋ كەرەك. مەردىگەر, ياعني قۇرىلىس-مونتاج جۇمىستارىن جۇرگىزەتىن بريگادا دا ليتسەنزياسى بولۋى شارت. اۆتورلىق جانە تەحنيكالىق باقىلاۋ قۇرىلىس جۇمىستارى بىتكەننەن كەيىن ساپالى ورىندالعانى جونىندە دەكلاراتسياعا قول قويادى.

5-قادام.  قالالىق ورتا ساپاسى جانە باقىلاۋ باسقارماسىن حاباردار ەتىپ, قۇرىلىس-مونتاج جۇمىستارىن جۇرگىزۋ. جوبالىق-سمەتالىق قۇجاتتار كەلىسىلىپ, تاۋەلسىز ساراپتاما جانە ساۋلەت ورگاندارى وڭ قورىتىندى بەرىپ, مەردىگەر انىقتالىپ, قۇجات جيناۋ كەزەڭى اياقتالسا, ورىن جايدى قايتا وڭدەۋ جۇمىسىنا كىرىسۋگە بولادى. قۇرىلىس باستالار ساتتە elicense.kz تىركەلىپ, قالالىق ورتا ساپاسى جانە باقىلاۋ باسقارماسىنا جۇمىستىڭ باستالعانى جونىندە حابار بەرىلەدى. حابار الىنعانى جونىندە تالون العاننان كەيىن بارىپ جۇمىسقا كىرىسەسىز.

6-قادام.  پايدالانۋعا قابىلداۋ اكتىسىن راسىمدەيسىز. قابىلداۋ ۇدەرىسى تاپسىرىس بەرۋشىمەن, مەردىگەرمەن, تەحنيكالىق جانە اۆتورلىق باقىلاۋمەن جۇزەگە اسادى.

7-قادام.  جەر ۇلەسىن ساتىپ الۋ. تۇرعىن ءۇي قورىنان شىعارۋ جۇمىسىنىڭ قورىتىندى كەزەڭى مەنشىككە نەمەسە جالعا ساتىپ الۋ. ول ءۇشىن مەنشىك يەسى قۇجات توپتامالارىن اپارىپ قالالىق اكىمشىلىككە ارىز جازۋى ءتيىس. بۇل جەردە ءسىز مەنشىككە ورىن جايدان شارشى مەتر الاسىز, جاناما قۇرىلىس سالۋعا ەمەس. كوبىسى ماسەلەنىڭ وسى اراسىن شاتاستىرىپ الىپ جاتادى. ونسىز تۇرعىن ەمەس ورىن جايلاردى تىركەۋ قۇقىن الا المايسىز. ال زاڭ بويىنشا تۇرعىن جاي يەلەرى جەردى ساتىپ الۋعا قۇقى جوق. ءسىز ادىلەت ورگاندارىندا تۇرعىن جاي ەمەس دەپ تىركەلگەنگە دەيىن ول پاتەر تۇرعىن جاي رەتىندە تىركەۋدە تۇرادى. كەي جاعدايدا مەنشىك يەلەرى قۇرىلىس-مونتاج جۇمىستارىن جۇرگىزىپ, پايدالانۋعا بەرىلگەننەن كەيىن بارلىق كەزەڭ ءبىتتى دەپ ويلايدى. ناتيجەسىندە ءوزىنىڭ مۇلكىنە وكىم ەتە الماي قالادى. كەي جاعدايلاردا ساۋلەت ورگاندارىنىڭ قالاۋىنا قاراي قايتا وڭدەۋگە سجج-نى ۋچاسكەنى ساتىپ نەمەسە جالعا العاننان كەيىن بەرەدى.

8-قادام.  نىساندى مەنشىككە الۋ قۇقىعىن تىركەۋ تۋرالى بارلىق قۇجاتتاردى حالىققا قىزمەت كورسەتۋ ورتالىعىنا تاپسىرۋ كەرەك. ءوتىنىشىڭىز ساۋلەت باسقارماسىنا جانە قالالىق ورتا ساپاسى جانە باقىلاۋ باسقارماسىنا, سودان كەيىن جىلجىمايتىن مۇلىك باسقارماسىنا تۇسەدى. سوڭىندا «مەنشىك يەسى تىركەلدى» دەگەن بەلگىسى بار پايدالانۋعا قابىلداۋ اكتىسىن قولىنا الادى.

ساراپشىلار وسى اتالعان كەزەڭدەردىڭ بارلىعىن وتۋگە كەڭەس بەرەدى. ايتپەسە سىزگە ايىپپۇل سالىنۋى مۇمكىن. قۇجات جيناۋ كوپ ۋاقىتتى الىپ قولبايلاۋ بولاتىنىنا قاراماستان, بولاشاقتا زاڭ الدىندا ماسەلە تۋىنداماس ءۇشىن وسى قادامداردى بۇلجىتپاي ورىنداعانىڭىز ابزال.

بەيبىت وسپان