قارماق سالۋ ءۇشىن بالىقشىلارعا ارنايى جولداما قاجەت. ونىڭ وزىندە دە سينتەتيكالىق مونوجىپتەن جاسالعان (لەسكوۆىە سەتي رەد.) اۋلاردى پايدالانۋعا بولمايدى. سول سياقتى ساۋداگەرلەرگە دە ءدال وسىنداي اۋلاردى ساتۋعا قاتاڭ تىيىم سالىنعان.
ويتكەنى ءبىر-اق رەت قولدانىلۋعا جارامدى ارزان باعاعا ساتىلاتىن سينتەتيكالىق ءمونوجىپ اۋلارىن بالىقشىلار سۋعا لاقتىرىپ كەتەدى ەكەن. جالپى, كوپ جىلدىق ەسەپ بويىنشا وزەن, كولدەردە وسى اۋ تۇرلەرىنىڭ سانى كوبەيىپ بارا جاتقانىن ايتادى ماماندار. سۋدىڭ ىشىندە شىرىمەيتىندىكتەن, سينتەتيكالىق مونوجىپتەن جاسالاتىن اۋدىڭ سۋ جانۋارلارىنا زيانى وتە كوپ. ماسەلەن, بويىنا بالىق پەن باسقا دا سۋ جانۋارلارى وراتىلىپ قالاتىن اتالمىش اۋ سۋدىڭ دا قۇرامىن لاستايدى. سوندىقتان قر اۋىل شارۋاشىلىعى مينيسترلىگى بالىق اۋلاۋ قۇرالدارىن, ونىڭ ىشىندە سينتەتيكالىق مونوجىپتەن جاسالعان اۋلاردى قازاقستان اۋماعىندا ەركىن ساتۋ ورىندارىن انىقتاپ, ولاردىڭ جولىن كەسۋ شارالارىن قولعا الۋدى مەملەكەتتىك قۇزىرلى ورگاندار مەن اكىمدىكتەرگە جۇكتەگەن. مۇنداعى باستى ماقسات – سينتەتيكالىق مونوجىپتەن جاسالاتىن اۋلاردى قولدانىستان الىپ تاستاۋ. وسى تۇرعىدا تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ تاپسىرماسى بويىنشا استانا قالاسى اكىمدىگى «جاسنۇر» وندىرىستىك شارۋاشىلىق كاسىپورنى تابيعاتتى قورعاۋ ءبولىمىنىڭ ماماندارى يحتيولوگ گۇلناز ابجانوۆا مەن بالىق ءوسىرۋشى ەسەت ءالىم قالاداعى بىرقاتار ساۋدا ورتالىقتارىنا ارنايى رەيد جاساپ, تەكسەرىس جۇرگىزگەن. رەيد بارىسىندا تىيىم سالىنعان اۋلاردى ساتاتىن ورىندار انىقتالىپ, ساتۋشىلارعا ەسكەرتۋ جاسالعان. مىسالى, ورتالىق بازارداعى ءتورت ورىن, كوك بازارداعى ءۇش ورىن جانە ۇلجان بازارىنداعى ءۇش ورىن مەن «نەپتۋن» ينتەرنەت-دۇكەنىندە بۇل تاۋارلار ەركىن ساۋدادا. اتالمىش ساۋدا ورىندارىنا تۇسىندىرمە جۇمىستارى جۇرگىزىلىپ, قاتاڭ ەسكەرتۋ جاسالعان. ەگەر الداعى ۋاقىتتا ەسكەرتۋدەن ناتيجە شىقپاسا, تىيىم سالىنعان بالىق رەسۋرستارى مەن باسقا دا سۋ جانۋارلارىن اۋلاۋ قۇرالدارىن ساۋدالاعانى ءۇشىن زاڭ الدىندا جاۋاپ بەرەتىنىن ايتادى ماماندار.
– قازاقستان رەسپۋبليكاسىنىڭ «ساۋدا قىزمەتىن رەتتەۋ تۋرالى» № 544 زاڭىنىڭ 32-بابى بويىنشا سينتەتيكالىق مونوجىپتەن جاسالعان اۋلاردى پايدالانۋعا قاتاڭ تىيىم سالىنادى. ەگەر زاڭ بۇزۋشىلىق انىقتالسا, ساۋداگەر جاۋاپقا تارتىلادى. ءبىز زاڭعا قايشى تاۋاردى ساتاتىن ورىندارعا ءبىر رەت ەسكەرتۋ جاساپ, تۇسىندىرمە جۇمىستارىن جۇرگىزدىك. ارينە, ولاردى جاۋاپقا تارتۋ, ايىپپۇل سالۋ ءبىزدىڭ قۇزىرىمىزدا ەمەس. دەگەنمەن ەندى ەسكەرتۋدەن قورىتىندى شىعارمايتىن بولسا, ولاردىڭ ىسىمەن قۇزىرلى زاڭ ورگاندارى مەن ءتيىستى مەكەمەلەر اينالىساتىن بولادى, – دەيدى گۇلناز ابجانوۆا.
قۇزىرلى مەكەمەلەردىڭ تاپسىرماسى بويىنشا قورىقشىلىق قىزمەتى قوياندى, استانالىق (ۆياچەسلاۆسك) سۋ قويمالارىن جىل سايىن جۇزدەگەن مەتر سينتەتيكالىق مونوجىپتەن جاسالعان براكونەرلىك اۋلاردان تازارتادى ەكەن. استانا قالاسى اكىمدىگىنىڭ «جاسنۇر» وندىرىستىك شارۋاشىلىق كاسىپورنى تابيعاتتى قورعاۋ ءبولىمى ماماندارىنىڭ مالىمەتىنە سۇيەنسەك, اعىمداعى جىلى اتالمىش سۋ قويمالارىنان 1,5 شاقىرىمدىق ۇزىندىقتاعى سينتەتيكالىق مونوجىپتەن جاسالعان براكونەرلىك اۋلار جينالىپ, ورتەلگەن.
نۇرداۋلەت كاكىشەۆ
