مەملەكەت باسشىسى ق.توقاەۆ 2 قىركۇيەكتەگى حالىققا جولداۋىندا ءتۋريزمدى دامىتۋ ءۇشىن قاجەتتى ينفراقۇرىلىم سالۋعا, ەڭ الدىمەن جول سالۋعا جانە بىلىكتى كادرلار دايارلاۋعا نازار اۋدارۋ قاجەتتىلىگىن ايتتى. شىنىندا دا, كادر تاڭداۋدا ءبىز ءالى كۇنگە نەمقۇرايدىلىققا جول بەرىپ وتىرمىز. وسىعان بىرەر مىسال كەلتىرەيىن.
جۋىردا وتباسىممەن بىرگە تۇركىستانداعى قوجا احمەت ياساۋي بابامىزدىڭ كەسەنەسىنە زيارات ەتتىك. مۋزەي-كەشەندى ارالاپ جۇرگەنىمىزدە بىلىكتى كادرلارعا قاتىستى قىنجىلارلىق جايتتارعا تاپ بولدىم.
بىرىنشىدەن, مۋزەيدىڭ كەيبىر قىزمەتكەرلەرى بىزگە جانە وزگە كەلۋشىلەرگە دورەكى سويلەدى. تايقازان تۇرعان ورتاڭعى ۇلكەن زالعا كىرەبەرىستە تۇرعان كۇزەتشىلەر مەن باقىلاۋشىلاردىڭ ىشكى مادەنيەتىنە كوڭىلىم تولمادى. ءبىر قازاق ايەلى (مۋزەي قىزمەتكەرى) شارشاعان كىشكەنتاي ۇلىمنىڭ تاستىڭ ۇستىنە, ءتىپتى جەرگە وتىرماۋىن تالاپ ەتىپ, ماعان جەكىپ سويلەدى. مۇنداي قىزمەتكەرلەردى جۇمىسقا قابىلدايتىن كەزدە بەلگىلى ءبىر ىشكى ادەبى, ساناسى, مادەنيەتى ءبىرىنشى ورىنعا قويىلۋى كەرەك. سەبەبى ولار قاسيەتتى زيارات ورنىندا حالىقپەن جۇمىس ىستەيدى. زيارات ورنىندا ادەپسىز سويلەپ, ۇرداجىق مىنەز تانىتقان جاندارعا ءتىپتى نە دەرىمدى بىلمەدىم.
مۋزەيدەن شىعىپ بارا جاتقانىمىزدا ماۆزولەيدىڭ جانىنان سالىنىپ جاتقان ەڭسەلى كەسەنەنى كوردىك. مەنىڭ جۇبايىم: «مىنا كەسەنە ايشا ءبيبى انامىزدىكى مە؟ وعان دا كىرىپ, زيارات ەتۋىمىزگە بولا ما؟» دەپ سۇرادى. كىرەبەرىستە تۇرعان اكىمشى ايەل: «ءاي, ول كورىپ تۇرعاندارىڭ كەسەنە ەمەس, مولا عوي! ءرابيا بەگىمنىڭ مولاسى. ول ايشا بيبىدەن دە كرۋچە عوي! سونى دا بىلمەيسىڭدەر مە؟» دەپ دۇرسە قويا جاۋاپ قاتتى. مۋزەي قىزمەتكەرلەرىنىڭ بازاردا تۇراتىن, ادەپسىز سويلەيتىن الىپساتار ايەلدەردەن ەشقانداي ايىرماسى جوق.
ەكىنشىدەن, مۋزەيدە بەينەتاسپاعا تۇسىرۋگە تىيىم سالىنعان. كۇزەتشى بەينەتاسپاعا ءتۇسىرىپ جۇرگەندەرگە ايقايلاۋمەن بولدى. سوندا شەتەلدەن كەلگەن تۋريستەر دە ەشتەڭە تۇسىرە الماسا, ەلىنە بارعاندا نە كورسەتەدى؟ بەينەجازبانىڭ ءوزى – ناسيحاتتاۋدىڭ ءبىر جولى. ول ساۋدا ۇيىنەن نەمەسە بازاردان بەينەجازبا ءتۇسىرىپ وتىرعان جوق قوي. ءوز باسىم اقش-تا بولعانىمدا كەز كەلگەن مۋزەيدە بەينەجازبا تۇسىرۋگە تىيىم سالىنعانىن كورمەدىم. وسى جاعىن ويلانىپ, دامىعان ەلدەردىڭ ۇزدىك تاجىريبەسىن نەگە ۇلگى ەتپەيمىز؟
ق.توقاەۆتىڭ بىلىكتى كادر دايارلاۋعا ەڭ الدىمەن كوڭىل ءبولۋىمىز كەرەك دەگەنى وسىدان شىعار؟! مادەنيەت جانە سپورت ءمينيسترى اقتوتى رايىمقۇلوۆا, تۇركىستان وبلىسىنىڭ اكىمى ومىرزاق شۇكەەۆ وسى ماسەلەگە كوڭىل بولسە نۇر ۇستىنە نۇر بولار ەدى.
