ونەر سالاسىندا 40 جىلعا جۋىق ۋاقىت قىزمەت ەتىپ كەلە جاتقان مەن ەلىمىزگە تانىمال تالاي تۇلعامەن, ونەر ادامىمەن دامدەس-تۇزداس, ارىپتەس بولدىم. مەيلىڭ قانشا جەردەن ءزاۋ بيىكتە, جەتىستىكتىڭ ۇشپاعىندا بولساڭ دا ادامگەرشىلىك قۇندىلىعىنان بيىك ەمەسپىز. ءومىردى سۇرە بىلگەن ەمەس, ونەردى سۇيە بىلگەن ادام عانا ادامگەرشىلىكتىڭ قادىرىن ەرەكشە باعالاي بىلەدى دەر ەدىم. جىلعادان اققان سۋداي جىلدام جىلدار بەلەسىندە ءوز باسىم بولمىس-بىتىمىنە ءتانتى بولىپ جۇرەتىن ەلتۇتقا ازامات بار. ول شاكىرتكە جارىعان ۇلاعاتتى ۇستاز, ونەردى سۇيە بىلگەن مادەنيەت قايراتكەرى اۋەسباي باقبەرگەنۇلى. الگىندە ايتقان ادامگەرشىلىكتىڭ قادىرىن ءبىر كىسىدەي بىلەتىن پاراسات يەسى دە سول دەسەم شىندىقتان قيىس كەتپەسپىن.
كاسىبي ۇيىمداستىرۋشى, تالاپشىل ۇستاز رەتىندە اعانىڭ ەسىمىنە بۇرىننان سىرتتاي قانىق ەدىم. ول كىسىمەن ناقتى تانىسقان جەرىم – نۇرعيسا تىلەنديەۆ اتىنداعى جامبىل وبلىستىق ونەر مەكتەپ-ينتەرناتىنىڭ اشىلۋ سالتاناتى قارساڭىندا ەدى. 1998 جىل بولاتىن. اۋەسباي اعا سول تۇستاعى جامبىل وبلىسى اكىمى سارىباي قالمىرزاەۆتىڭ ءىس-شارانى ۇيىمداستىرۋ تۋرالى ارنايى وتىنىشىمەن كەلگەنىن ايتتى. تيىسىنشە, ارتىلىپ وتىرعان جاۋاپكەرشىلىك جۇگى دە زور ەكەنىن بارىمىزگە بىردەن ۇقتىردى. ءالى ەسىمدە, رەسپۋبليكاعا تانىمال قانشاما ونەر جۇلدىزى, بەلگىلى تۇلعالار قاتىساتىن ءىس-شارانىڭ ستسەناريى مەن باعدارلاماسى تالاي تۇزەلىپ-وزگەردى. ۇيىمداستىرۋعا قاتىستى كوپتەگەن قيىندىق تۋىنداسا دا سالتاناتتى ءراسىم جوعارى دەڭگەيدە ءوتتى. ءبارى بىتكەن سوڭ ارقامىزدان اۋىر جۇك تۇسكەندەي دامىلداپ وتىرعانىمدا اۋەسباي اعا قاسىما كەلدى. تاجىريبەلى ماماننىڭ ويىن بىلەيىن دەگەن ويمەن:
– اعا, قالاي ءوتتى؟ قالاي باعالايسىز؟, – دەپ سۇرادىم.
– سايلاۋ باۋىرىم, ويلاعاننان دا كەرەمەت. مىنە, «كورە-كورە كوسەم بولاسىڭ» دەگەن وسى بولادى», – دەپ ءارى قاناتتاندىرىپ, ءارى جۇباتقانداي بولدى. ودان كەيىن دە وبلىستىق فيلارمونيادا, كينو سالاسىندا قىزمەت ەتە ءجۇرىپ, رەسپۋبليكالىق, حالىقارالىق دەڭگەيدەگى ءىس-شارا, بايقاۋدىڭ ءبىرتالايىن اعايمەن بىرلەسە ۇيىمداستىرىپ, جۇرگىزگەن كەزىمىز كوپ بولدى. ارالاس-قۇرالاس بولا ءجۇرىپ اۋەسباي اعانىڭ كىشىپەيىلدىلىگى, ءاربىر ىسكە مۇقيات تياناقتىلىعى سياقتى قاسيەتىنەن بولەك, كاسىبي ۇيىمداستىرۋشى, كىم-كىممەن دە بولسىن ءتىل تابىسا بىلەتىن ديپلوماتيالىق قىرىن دا سان مارتە بايقادىم.
شىن بەرىلىپ ەتكەن ەڭبەك, رياسىز قىزمەت ەلەۋسىز قالماۋى ءتيىس. ەسكەرۋسىز قالاتىن كەزدەردى وكىنىشكە قاراي, بىلەمىز-اۋ. اۋەسباي باقبەرگەنۇلىنىڭ مۋزىكالىق ءبىلىم بەرۋ سالاسىنا قوسقان ۇلەسى قالا, وبلىس, رەسپۋبليكا اۋقىمىندا تالاي قۇرمەتتەلدى. ونەر مايتالمانى, ۇلاعاتتى ۇستاز قر ءبىلىم جانە عىلىم مينيسترلىگىنىڭ قۇرمەت گراموتاسىمەن, «ىبىراي التىنسارين», «ءبىلىم بەرۋ ءىسىنىڭ قۇرمەتتى قىزمەتكەرى», قر مادەنيەت جانە سپورت مينيسترلىگىنىڭ «مادەنيەت سالاسىنىڭ ۇزدىگى», قر وقۋ-اعارتۋ مينيسترلىگىنىڭ «ەڭبەك ارداگەرى» توسبەلگىلەرىمەن ماراپاتتالدى. شاكىرت وقىتۋ ءىسى جولىنداعى ۇزاق جىلعى العاۋسىز ادال ەڭبەگىنە وراي قازاقستاننىڭ پەداگوگيكالىق عىلىمدار اكادەمياسى اۋەس اعامىزدى ءوز مۇشەلىگىنە قابىلدادى.
«باقىتىڭدى ۇزاقتان ەمەس, ۇرپاعىڭنان ىزدە» دەمەي مە؟! اۋەس اعا ەلىمىزگە تانىمال ۇل-قىز تاربيەلەگەن باقىتتى جان, بۇگىندە پاراسات بيىگىنەن كورىنگەن ساليقالى اقساقال. تانىسقان ۋاقىتىمىزدان بەرى ارادا 25 جىل وتسە دە, قاتىناسىمىز ءالى كۇنگە ۇزىلمەي حابارلاسىپ, وتكەن-كەتكەن جاڭالىعىمىزدى ءبولىسىپ, اعا-ءىنى رەتىندە سىيلاسىپ كەلەمىز. ول مەن ءۇشىن ۇلگى تۇتار اسقار بەل ازامات. وزگەگە ۇلگى بولۋ دا بىلە بىلگەنگە ءبىر باقىت ەكەن. «سارى تەنتەك» اتانعان اقىن قۋانىش ماقسۇتوۆ ايتقانداي, «قانشا قۇيساڭ دا تولمايتىن, تولسا دا تاسىمايتىن» ازاماتتىڭ بەكزاتى اۋەسباي اعا دەر ەم. اعاما تىلەيتىنىم, قۇداي قوسقان جەڭگەمىزبەن باقىتتى عۇمىر كەشىپ, ءوسىرىپ وتىرعان ءۇرىم-بۇتاق, نەمەرەلەرىنىڭ قىزىعىن بىرگە كورۋدى جازسىن.
سايلاۋبەك لەسباەۆ,
قر مادەنيەت سالاسىنىڭ ۇزدىگى»,
جامبىل وبلىسىنا ەڭبەگى سىڭگەن قايراتكەر
