ەلوردادا 17 قىركۇيەك پەن 15 قازان ارالىعىندا جىل سايىنعى قىسقى كەزەڭگە دايىندىق جانە جاسىل جەلەكتەردى وتىرعىزۋ بويىنشا «بىرگە تازا قازاقستان» جالپىقالالىق كۇزگى ەكولوگيالىق ايلىعى وتۋدە. سونىمەن قاتار «دۇنيەجۇزىلىك تازالىق كۇنى – World Cleanup Day 2022» ەكولوگيالىق اكتسياسى اياسىندا وتكەن سەنبىدە ەلوردادا جالپىقالالىق سەنبىلىك ءوتىپ, وعان قاتىسقان مەملەكەتتىك مەكەمەلەر قىزمەتكەرلەرى مەن قالا تۇرعىندارى تال وتىرعىزۋ, تازالاۋ جۇمىستارىن جۇرگىزدى.
اكتسيانىڭ ماقساتى – قوعام نازارىن تابيعاتتى ساقتاۋدىڭ ماڭىزدىلىعىنا اۋدارۋ جانە ەكولوگيالىق مادەنيەتتى قالىپتاستىرۋ. ايلىق شەڭبەرىندە وتەتىن سەنبىلىكتەردە كوممۋنالدىق قىزمەتتەر جانە مەردىگەرلىك ۇيىمدار قوعامدىق اۋماقتاردى كوگالداندىرۋ جانە اباتتاندىرۋ, ساياباقتار, سكۆەرلەر, اللەيالاردى جوندەۋ جانە قالپىنا كەلتىرۋ, كۆارتالىشىلىك اباتتاندىرۋ, بالالاردىڭ ويىن جانە سپورت الاڭدارىن جابدىقتاۋ, توسەلگەن تاستاردى, جيەكتاستاردى, شاعىن ساۋلەت نىساندارىن قالپىنا كەلتىرۋ, كوپىرلەر مەن جول وتپەلەرىنىڭ قۇرىلىمدارىن, قورشاۋلارىن جۋ, ايالدامالارداعى پاۆيلونداردى جوندەۋ جانە تازالاۋ, كونتەينەر الاڭدارى مەن قوقىس كونتەينەرلەرىن سانيتارلىق تازالاۋ جۇمىستارىن جۇرگىزەدى. سونىمەن قاتار, ەكولوگيالىق ايلىق اياسىندا 10 مىڭنان اسا جاسىل جەلەك وتىرعىزۋ جوسپارلانعان.
سەنبىدە باستالعان كۇزگى سەنبىلىك ايلىعىندا كىشى تالدىكول اينالاسىنا 500 ءتۇپ اعاش وتىرعىزىلدى. مۇنداعى جۇمىستاردى استانا قالالىق قورشاعان ورتانى قورعاۋ جانە تابيعاتتى پايدالانۋ باسقارماسى ۇيىمداستىردى. قوعامدىق جۇمىسقا الەۋمەتتىك سالا قىزمەتكەرلەرى, ستۋدەنتتەر مەن ەرىكتىلەر جانە وقۋشىلار دا قاتىستى.
– بۇگىن مىنە, بۇكىل الەمدە حالىقارالىق تازالىق كۇنى ءوتىپ جاتىر. سوعان قوسا 15 قىركۇيەكتەن باستاپ قالامىزدا ەكولوگيالىق ايلىق باستالدى. سونىڭ اياسىندا ءار سەنبى سايىن قالانىڭ بارلىق جەرىندە سەنبىلىكتەر وتەدى. ال ءبىزدىڭ باسقارما بۇگىن وسى كىشى تالدىكول سۋ قويماسىنىڭ اينالاسىنا 500-دەن استام تال وتىرعىزادى. جوسپارىمىزدا 2000 تالعا دەيىن وتىرعىزۋ بار, – دەدى اتالعان باسقارما باسشىسىنىڭ ورىنباسارى جانار بەسكەمپىروۆا.
سەنبىلىك اياسىندا «مەملەكەتتىك كۇزەت قىزمەتى» ارداگەرلەر وداعى» وڭىرلىك قب اسكەري پاتريوتتىق «جاس قالقان» كلۋبىنىڭ جاستارى دا اعاش وتىرعىزۋعا اتسالىستى. كلۋب جەتەكشىسى باقبەرگەن كەرەيدىڭ ايتۋىنشا, مۇنداي شارالاردىڭ بالالارعا پاتريوتتىق تاربيە بەرۋدە ماڭىزى زور. قوقىس سۇرىپتاۋمەن اينالىساتىن «Clean City NC» جشس قوعاممەن بايلانىس قىزمەتى ءبولىمىنىڭ باسشىسى باقىتجامال اۋباكىروۆا بالالار اراسىندا ەكولوگيالىق ويىن وتكىزىپ, سول ارقىلى قوقىستاردى قالاي سۇرىپتاۋدى ۇيرەتتى. سونىمەن قاتار ولار بەلسەندى جاستاردى العىس حاتتار جانە ەكوسومكەمەن ماراپاتتادى.
بۇل كۇنى قارجى مينيسترلىگىنىڭ قىزمەتكەرلەرى سارىارقا اۋدانىنداعى ءا.كەنجين كوشەسىنەن تىلەنديەۆ داڭعىلىمەن اينالما جولداعى كوپىرگە دەيىنگى اۋماقتى تازالادى.
– جىل سايىن الەم بويىنشا تازالىق كۇنى اتاپ وتىلەدى. ءبىزدىڭ مينيسترلىك جالپىقالالىق سەنبىلىكتى نازاردان تىس قالدىرا المادى. بۇگىن وسى جەردە ءبىزدىڭ بولىمشەنىڭ بارلىق قىزمەتكەرلەرى بار. قورشاعان ورتا بۇل – ءبىزدىڭ ۇلكەن ءۇيىمىز جانە ول ارقاشان تازا بولۋى كەرەك. ءار سەنبى سايىن بىزگە بەكىتىلگەن اۋماقتى تازالاپ شىعۋدى جوسپارلاپ وتىرمىز. ادامدار دەمالعاندى ۇناتادى, سودان كەيىن قوقىستى تازارتۋدى ۇمىتىپ كەتەدى. مۇنداي ءىس-شارالار قورشاعان ورتانى قۇرمەتتەۋ, وعان ۇقىپتى قاراۋ قاجەتتىگىن ايقىن كورسەتەدى, – دەيدى مەملەكەتتىك اۋديت كوميتەتىنىڭ باسقارما باسشىسى بالتابەك حالىق.
دەمالىس كۇنىنە قاراماستان, سەنبىلىككە 20 مىڭنان استام الماتى اۋدانىنىڭ تۇرعىندارى قاتىستى. مەملەكەتتىك قىزمەتكەرلەر, شاعىن جانە ورتا بيزنەس وكىلدەرى, الەۋمەتتىك نىساندار قىزمەتكەرلەرى وزدەرىنە بەكىتىلگەن جەردى تازا ۇستاۋ ءۇشىن بارلىق قاجەتتى زاتتارمەن قامتىلدى. بەلسەندىلەر قوقىستى جيناپ, ادامدار كوپ جينالاتىن جەرلەردى تازالادى. جينالعان قالدىقتاردى شىعارۋ ءۇشىن جۇك ماشينالارى تارتىلدى.
– بۇگىن كۇزگى سەنبىلىك ايلىعى باستالدى. ءبىز ولارعا مەكتەپ وقۋشىلارى مەن ستۋدەنتتەردىڭ قاتىسقانىن قالايمىز. بۇگىنگى تاڭدا ەكولوگيالىق ماسەلە ءبىرىنشى ورىندا, سوندىقتان تازالىقتى ساقتاۋ جانە تابيعاتتى قورعاۋ ماڭىزدى. قالانىڭ كوركەيۋىنە ءار ادام ۇلەس قوسا الادى, – دەدى ەۋرازيا ۇلتتىق ۋنيۆەرسيتەتىنىڭ قىزمەتكەرى ابدىقاھار سلامقۇل.
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وقىتۋشىلارى مەن 90-نان اسا ستۋدەنتتەر ەسىل وزەنىنىڭ ءبىر ارناسى اقبۇلاقتىڭ جاعالاۋىن جانە سول ماڭداعى پاركتەر مەن دەمالىس اۋماقتارىن تازالادى. بايقوڭىر اۋدانى اكىمى اپپاراتىنىڭ وكىلى ارسەن ابدراحمانوۆتىڭ سوزىنشە, ستۋدەنت جاستاردان بولەك, شاعىن جانە ورتا بيزنەس وكىلدەرى, الەۋمەتتىك سالا قىزمەتكەرلەرى, ءوندىرىس ورىندارىنىڭ ماماندارى سەنبىلىككە قاتىستى. ءار سانالى ازامات ءوزى تۇراتىن قالانىڭ, ەلدى مەكەننىڭ تازا, كورىكتى بولۋى ءۇشىن ۇلەس قوسۋى كەرەك. «اۋىلىنا قاراپ, ازاماتىن تانى» دەپ وسىدان ايتىلعان ەمەس پە؟! مەنىڭشە, ءبىزدىڭ اۋداننىڭ تۇرعىندارى تازالىق جۇمىسىنا بەلسەندى قاتىسۋدا, – دەيدى مەملەكەتتىك قىزمەتكەر.
