«استانا وپەرانىڭ» ءحى تەاتر ماۋسىمىنىڭ اشىلۋىنا ساناۋلى كۇندەر قالدى. وسىعان وراي, تەاتر ديرەكتورى, قازاقستاننىڭ ەڭبەك سىڭىرگەن قايراتكەرى عالىم احمەدياروۆپەن كەزدەسىپ, تەاتر تىنىسىنان حاباردار بولعان ەدىك.
– عالىم العيۇلى, استاناعا ەل وڭىرلەرىنەن كوپ ادام كەلەدى, ولاردىڭ كەيبىرى تەاترعا درەسس-كود ساقتاپ قانا كىرۋگە بولادى جانە بيلەتتەردىڭ باعاسى اسا قىمبات دەگەن ويدا. وسى راس پا؟
– تەاتردىڭ باعا ساياساتى بارىنشا وڭتايلى دەسەك بولادى, سپەكتاكل بيلەتى قىمبات ەمەس, اسىرەسە قازىرگى دەمالىستان كەيىنگى كەزەڭدە. مىسالى, قىركۇيەك ايىندا ك.بايسەيىتوۆا اتىنداعى كامەرا زالىنداعى كونتسەرتتەرگە بيلەتتەر شامامەن 3 مىڭ تەڭگە تۇرادى, سونداي-اق تەاترىمىزدىڭ ۇلكەن زالىندا وتەتىن سپەكتاكلدەردىڭ باعاسى دا ابدەن قولجەتىمدى. درەسس-كودقا كەلەر بولساق, بۇل دا قاتە پىكىر, ءبىز تىلەك بىلدىرۋشىلەردىڭ ءبارىن قۋانا قارسى الامىز, ارينە, ەگەر ادامدار ادەمى كيىنىپ كەلسە قۇپتايمىز, وسى ارقىلى ولار, ەڭ الدىمەن, وزىنە مەرەكە جاسايدى عوي.
– قازىر قانداي سپەكتاكلدەرگە باسا ءمان بەرىلەدى؟
– العاشقى جىلدارى ءبىز رەپەرتۋارىمىزدى كلاسسيكالىق قويىلىمدارمەن تولىقتىرۋعا بەلسەنە كۇش سالدىق, ويتكەنى «استانا وپەرا» – بۇل كلاسسيكالىق تەاتر. البەتتە, ۇلتتىق رەپەرتۋاردى دا نازاردان تىس قالدىرمادىق. قازىر, كەرىسىنشە, رەپەرتۋاردى ۇلتتىق سپەكتاكلدەرمەن بايىتۋعا جۇمىس جاساۋدامىز. الداعى ماۋسىمداردا بۇل ءىس ەسەلەنە تۇسپەك. الايدا مىنانى ءتۇسىنۋ كەرەك: ءبىز قويىلىمداردى «قالىپقا» سالماي, قازاق مۋزىكا مادەنيەتىنىڭ التىن قورىنا ەنگەن ۇلتتىق تۋىندىلارعا وتە مۇقيات قارايمىز جانە ولاردى الەمدىك دەڭگەيدە باسقا تەاترلاردىڭ جۇمىسىن قايتالامايتىن بىرەگەي كوزقاراس تۇرعىسىنان قويامىز.
– ءحى تەاتر ماۋسىمى نەمەن اشىلماق؟
– ۇجىم احمەت جۇبانوۆ پەن لاتيف ءحاميديدىڭ ايگىلى «اباي» وپەراسىن ۇسىنباق. بۇل وپەرا بۇكىل الەمگە تۇسىنىكتى ءارى سۇرانىسقا يە بولاتىنداي ەتىپ قويىلعان. تەاتر وسى قويىلىم ءۇشىن ەڭ جوعارى ماراپات – قازاقستاننىڭ مەملەكەتتىك سىيلىعىن العان.
