قالامىزداعى كۇمىسبەكوۆ كوشەسى 6-ءۇي ورنالاسقان مەكەنجايدا اۋلالىق فۋتبول كلۋبى اشىلدى. جوبانىڭ باستاماشىسى, ەلوردالىق ءماسليحات دەپۋتاتى, قالالىق فۋتبول فەدەراتسياسىنىڭ پرەزيدەنتى, اتاقتى قاقپاشى – داۆيد لوريا.
يگى باستامانى استانا قالاسىنىڭ اكىمدىگى مەن «جەڭىس» فۋتبول كلۋبى قولدادى. اۋلالىق فۋتبول كلۋبىنىڭ سالتاناتتى اشىلۋ راسىمىنە قالالىق ءماسليحاتتىڭ حاتشىسى ەرلان كاناليموۆ, سارىارقا اۋدانىنىڭ اكىمى باۋىرجان ەرالى, استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ قاتىستى.
بۇگىنگى تاڭدا كلۋبتىڭ مۇشەسى بولۋ ءۇشىن 50-دەن استام ادام نيەت ءبىلدىرىپ وتىر. ولاردىڭ بارلىعى جاس توپتارىنا ساي ءبولىنىپ, جازعى دەمالىس ۋاقىتىنىڭ سوڭىنا دەيىن فۋتبولمەن تەگىن اينالىسادى.
جوبا باستاماشىسىنىڭ ايتۋىنشا, بۇل اۋلادا اپتاسىنا 2 رەت كاسىبي جاتتىقتىرۋشى كەلىپ, جەرگىلىكتى بالالار ءۇشىن تەگىن جاتتىعۋلار وتكىزەدى.
– فۋتبولمەن اينالىسقىسى كەلەتىن جانداردىڭ سانى كوبەيگەن سايىن, ساباق كەستەسىنە سايكەس جاتتىعۋلاردىڭ سانى ۇلعاياتىن بولادى. ەندى اۋلاداعى بالالار بوس جۇرمەيدى. ءبىز بالالارعا بارلىق قاجەتتى داعدىلاردى دامىتۋعا مۇمكىندىك بەرگىمىز كەلەدى. وكرۋگىمىزدە تۋرنيرلەر وتكىزىپ, جاڭا كلۋبتار اشۋدى جوسپارلاپ وتىرمىز, – دەدى داۆيد لوريا.
قىس مەزگىلىنە قاراي ساباقتاردى وتكىزۋ ءۇشىن ارنايى مانەج ىزدەۋ ماسەلەسى قاراستىرىلادى. بۇل رەتتە جاستار مەن جاسوسپىرىمدەردى بۇقارالىق سپورتقا, شىعارماشىلىق ۇيىرمەلەرگە تارتا وتىرىپ, ومىرلىك داعدىلاردى ۇيرەتۋ ارقىلى ولاردىڭ ءومىر ساپاسىن جاقسارتۋعا باسىمدىق بەرىلەدى.
جالپى, اۋلا كلۋبتارىنىڭ قىزمەتى جاستار مەن جاسوسپىرىمدەر اراسىنداعى قىلمىستى ازايتۋعا, بالالاردىڭ دەنساۋلىعىن جاقسارتۋعا جانە ولاردىڭ ۋاقىتىن پايدالى وتكىزۋگە, سونداي-اق ءپاتريوتيزمنىڭ دامۋىنا ىقپال ەتەدى. سەبەبى ولاردىڭ باسىم بولىگى جان-جاقتى دامىپ قانا قويماي, قوعامدىق شارالارعا دا ءوز ۇلەسىن قوسىپ كەلەدى.
