باقىلاۋ جانە قاداعالاۋ فۋنكتسيالارى بەرىلگەن مەملەكەتتىك مەكەمەنىڭ باسشىلارى مەن شاعىن جانە ورتا بيزنەس وكىلدەرى استانا قالاسى سارىارقا اۋدانىنىڭ اكىمدىگىنە جينالىپ, كاسىپكەرلىكتى دامىتۋداعى وزەكتى ماسەلەلەردى تالقىلادى.
استانا قالاسى اكىمىنىڭ ورىنباسارى ەرلان بەكمۇرزاەۆ:
– 2019 جىلدان باستاپ مەملەكەت باسشىسى قاسىم-جومارت توقاەۆتىڭ تاپسىرماسى نەگىزىندە «باقىلاۋ جانە قاداعالاۋ ورگاندارىنىڭ ەسەپ بەرۋ كۇنىن» وتكىزىپ كەلەمىز. ونداعى ماقسات – كاسىپكەرلەردىڭ زاڭدى قىزمەتىنە كەدەرگى كەلتىرۋ جانە نەگىزسىز شەكتەۋ جاعدايىنا جول بەرمەۋ, كاسىپكەرلىكتى دامىتۋعا قولايلى جاعداي قالىپتاستىرۋ, جاڭادان قابىلدانعان زاڭ نورمالارىنداعى جاڭالىقتاردى ءتۇسىندىرۋ. باستىسى, بيزنەس قاۋىمداستىقپەن كەرى بايلانىس ورناتىپ, ءجيى انىقتالاتىن زاڭ بۇزۋشىلىقتى ايقىنداپ, ولاردىڭ الدىن الۋ بويىنشا ۇسىنىستاردى تىڭداپ, ورتاق شەشىم شىعارۋ, – دەپ جيىننىڭ ماڭىزىن ءتۇسىندىردى.
پرەزيدەنت قوعامنىڭ بارلىق سالاسىندا اشىقتىق پەن جاريالىقتى قامتاماسىز ەتۋ, ادال باسەكەلەستىكتى قالىپتاستىرۋ, سالىق زاڭناماسىن جەتىلدىرۋ جانە كاسىپكەرلەردىڭ الەۋمەتتىك جاۋاپكەرشىلىگىن ارتتىرۋ سىندى ماڭىزدى جۇمىستاردى جۇيەلەۋدى تاپسىرعان-دى.
وزىق ەلدەردىڭ تاجىريبەسىنەن بيزنەس قاۋىمداستىق پەن رەسمي بيلىك اشىق ديالوگقا ءتۇسىپ, قوردالانعان ماسەلەلەردى بىرلەسە شەشۋدىڭ جولىن تاۋىپ وتىر. باقىلاۋ-قاداعالاۋ ورگاندارىنىڭ بيزنەس وكىلدەرى الدىندا بىرىڭعاي ەسەپ بەرۋى – سونداي يگىلىكتى باستامانىڭ ءبىرى.
– بۇگىندە بيزنەس الدىندا ەسەپ بەرۋ ماڭىزدى ءىس-شاراعا اينالدى. سەبەبى استانانى كاسىپكەرلەر قالاسى دەپ اتاۋعا تولىق نەگىز بار. سوڭعى جىلدارى ەلوردا ەل بويىنشا شاعىن جانە ورتا بيزنەستەن كوش باستاپ تۇر. 2021 جىلدىڭ قورىتىندىسىمەن بيزنەستىڭ ۇلەسى 66,9 پايىزدى قۇراسا, 2022 جىلدىڭ 8 ايىندا 72,4 پايىزعا جەتتى. باس شاھاردا 186 مىڭ كاسىپكەرلىك سۋبەكتىسى بەلسەندى جۇمىس ىستەسە, وندا 441 مىڭ ادام قىزمەت ەتەدى, – دەدى ەرلان بەكمۇرزاەۆ.
2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا اياسىندا نەسيە بويىنشا سىياقى مولشەرىن سۋبسيديالاۋ, وڭدەۋ ونەركاسىبى سالالارىندا جۇمىس ىستەيتىن كاسىپكەرلەردىڭ نەسيەسىنە كەپىلدىك بەرۋ جانە مەملەكەتتىك گرانتتار تاعايىنداۋ سىندى كەشەندى شارالارىمەن ىسكەر ازاماتتاردى قولداۋ جولدارى قاراستىرىلدى.
ءوز كەزەگىندە مەملەكەت بيزنەستى ادال جۇرگىزۋدى جانە بارلىق زاڭ نورماسىن ساقتاۋدى تالاپ ەتەدى. الايدا كاسىپكەرلەر اراسىندا ورەسكەل زاڭ بۇزۋشىلىقتار انىقتالاتىنى جاسىرىن ەمەس. قاداعالاۋ جانە باقىلاۋ ورگاندارىنىڭ باسشىلارى بيزنەس تاراپىنان ءجيى انىقتالاتىن زاڭ بۇزۋشىلىقتار جانە ولاردىڭ الدىن الۋ جولدارى تۋرالى باياندادى.
الدىمەن توتەنشە جاعدايلار دەپارتامەنتىنىڭ باسشىسى دامير ەرماعامبەتوۆ ءسوز الىپ:
– 2022 جىلدىڭ 28 قىركۇيەگىندەگى جاعداي بويىنشا استانا قالاسىنىڭ اۋماعىندا 13883 باقىلاناتىن نىسان بار. سەگىز ايدا كاسىپكەرلىك سۋبەكتىلەرىنە ءورت باقىلاۋ ورگانى 724 تەكسەرۋ جۇرگىزدى. تەكسەرۋ بارىسىندا 3465 ءورت قاۋىپسىزدىگى ەرەجەسىن بۇزۋ انىقتالدى. ناتيجەسىندە 251 زاڭدى جانە جەكە تۇلعا اكىمشىلىك جاۋاپكەرشىلىككە تارتىلىپ, ونىڭ 160-ىنا 12 ميلليون 780 مىڭ تەڭگەدەن استام ايىپپۇل تۇرىندە ەسكەرتۋ بەرىلدى. استانا قالاسى اكىمشىلىك قۇقىق بۇزۋشىلىق ىستەر جونىندەگى مامانداندىرىلعان اۋدانارالىق سوتىنا 28 اكىمشىلىك ءىس جولداندى, – دەدى.
ودان كەيىن مەملەكەتتىك كىرىستەر دەپارتامەنتى باسشىسىنىڭ ورىنباسارى باقىت ءابىلدينوۆ ءسوز كەزەگىن الىپ, كاسىپكەرلەر سالىقتىق مىندەتتەمەلەرگە بەيجاي قاراماي, مەملەكەت الدىنداعى مىندەتىن ادال ورىنداۋدىڭ ماڭىزىنا توقتالدى.
راسىندا, سالىق مەملەكەتتىڭ دامۋىندا ماڭىزدى ءرول اتقارادى. ويتكەنى سالىق تۇسىمدەرىنىڭ ەسەبىنەن ەلدىڭ قازىناسى تولىعىپ, حالىقتىڭ ءومىر ءسۇرۋ ساپاسىن ارتتىراتىن الەۋمەتتىك جوبالاردى ورىنداۋدا كەڭ مۇمكىندىك اشىلادى.
ال سىبايلاس جەمقورلىققا قارسى ءىس-قيمىل اگەنتتىگىنىڭ استانا قالاسى بويىنشا دەپارتامەنتى تەرگەۋ باسقارماسىنىڭ باسشىسى رەنات ايمۇقانوۆتىڭ كەلتىرگەن دەرەگىنەن كاسىپكەرلىك سالاسىنداعى زاڭ بۇزۋشىلىقتاردى باعامدادىق.
استانا قالاسىنىڭ «اتامەكەن» وڭىرلىك كاسىپكەر پالاتاسىنىڭ ديرەكتورى بەيسەن جولبولديەۆ تەكسەرۋشى, رەتتەۋشى ورگان باسشىلارىمەن كەزدەسۋ داستۇرگە اينالعانىن جەتكىزدى. «قازىر كوپتەگەن وزەكتى ماسەلەلەر مەملەكەتتىك مەكەمە باسشىلارىمەن كەزدەسۋدە شەشىلىپ جاتادى. ماسەلەن, 23 تامىزدا قالا اكىمى التاي كولگىنوۆپەن كەزدەسۋ ءوتىپ, كاسىپكەرلەر 30-عا جۋىق ماسەلەنى شەشۋدى ۇسىندى. قازىر كوتەرىلگەن سۇراقتىڭ 7-ەۋى ناقتى شەشىمىن تاپتى, قالعانىن جىل اياعىنا دەيىن ءتۇيىنىن تارقاتۋعا ءمان بەرەمىز. سوندىقتان مۇنداي فورماتتاعى كەزدەسۋدى جىلىنا ءبىر رەت ەمەس, كۆارتال سايىن وتكىزىپ تۇرۋدى ۇسىنامىن» دەدى ول.
كەزدەسۋ سۇراق-جاۋاپقا ۇلاسىپ, كاسىپكەرلەر تولعاندىرىپ جۇرگەن ماسەلەسىن ورتاعا سالدى. اسىرەسە مەكتەپ اسحاناسىنا بايلانىستى كوپ سۇراقتار قويىلدى. كاسىپكەرلەر ينفلياتسيانىڭ ءوسۋى, ازىق-تۇلىك باعاسىنىڭ قىمباتتاۋى بايقالعانمەن, اسحانا مازىرىندە بەكىتىلگەن باعانى وسىرە الماي وتىرعانىن, سونداي-اق ارەندالىق جارنانىڭ قىمباتتاعانىن العا تارتتى. سونداي-اق مەملەكەتتىك گرانتتاردى بەرەتىن كوميسسيانىڭ جانە مەملەكەتتىك ساتىپ الۋ كونكۋرستارى اشىق ءارى ءادىل ءوتۋىن تالاپ ەتتى.
