– 20 قاراشادا وتەتىن پرەزيدەنت سايلاۋى – ەلىمىز ءۇشىن ماڭىزى ايرىقشا وقيعا. بۇل ساياسي دوداعا ەل ازاماتتارى عانا ەمەس, شەتەلدەگى قانداستارىمىز دا كوز تىگىپ وتىر. ويتكەنى الەمدەگى ءيىسى قازاقتىڭ جالعىز وتانى بار. ول – قازاقستان. وسى تۇرعىدان العاندا, ءار قازاقتىڭ كوزىنىڭ قاراشىعىنداي بولعان قازاقستانىمىزعا كوڭىل ءبولىپ, ونداعى بولىپ جاتقان وزگەرىستەرگە باسا نازار اۋدارۋى – زاڭدىلىق.
ءبىز قازىر ءداۋىر بولگىش كەزەڭدە تۇرمىز. قازاق حالقىنىڭ بەرەكە-بىرلىگى, ىنتىماق-دوستىعى – وسى كەزەڭدەگى جۇرگىزىلىپ جاتقان رەفورمالاردىڭ ويداعىداي جۇزەگە اسۋىنا مۇمكىندىك بەرەتىن ۇلى كۇش. «جاڭا قازاقستان» ءبىر كۇندە قۇرىلا قالمايدى. قازىردىڭ وزىندە قازاقستان قوعامىندا تىڭ وزگەرىستەردىڭ كەلە باستاعانىن ەسكەرسەك, ەرتەڭىمىز بۇدان دا نۇرلى, بۇدان دا جاقسى بولادى دەپ سەنەمىن.
قازىر حالىقارالىق جاعداي دا وتە اۋمالى-توكپەلى. كورشىلەرىمىزدە ورىن العان جاعدايدىڭ ەلىمىزدىڭ ەكونوميكاسىنا دا اسەر ەتىپ جاتقانىن ءبىلىپ, سەزىپ وتىرمىز. ەندەشە وسىنداي كەزەڭدە بىزگە ۇستامدىلىق, بەرەكە-بىرلىك كەرەك. تىنىشتىقتىڭ, بەرەكەلى قوعامنىڭ بىزگە اۋاداي قاجەت ەكەنىن «قاڭتار وقيعاسى» كورسەتتى. قانشاما باۋىرىمىز قىرشىننان قيىلدى, ەل ەكونوميكاسىنا قانشاما شىعىن كەلدى! دەمەك, ءبىز وتكەننەن ساباق الىپ, ءومىرىمىزدىڭ جەلكەنىن دۇرىستاعانىمىز ءجون.
الداعى سايلاۋ ەل بولاشاعى ءۇشىن ايرىقشا ماڭىزدى. بولاشاقتا ءبىزدىڭ بيلىك قوعامنىڭ قانداي بولاتىنى, قانداي وزگەرىستەر جاسالاتىنى دا وسى جولعى سايلاۋدان انىق كورىندى دەپ ويلايمىن. سوندىقتان وتانداستارىمىز بۇل سايلاۋعا بەيجاي قاراماي, بەلسەنە اتسالىسۋى كەرەك. سايلاۋدا ءاربىر ازاماتتىڭ داۋىسى ماڭىزدى ءرول اتقارادى. سوندىقتان ءبىز بۇل سايلاۋدا دا جۇدىرىقتاي جۇمىلىپ, بەرەكەمىزدى, ەلدىگىمىزدى كورسەتۋىمىز كەرەك. «التاۋ الا بولسا, اۋىزداعى كەتەدى, تورتەۋ تۇگەل بولسا, توبەدەگى كەلەدى» دەيدى قازاق. تورتەۋىمىز تۇگەل بولسىن دەسەك, جۇدىرىقتاي جۇمىلايىق. ويتكەنى «ساۋساق بىرىكپەي, ينە ىلىكپەيدى».
ريزا قايىربايقىزى,
ءانشى, قر ەڭبەك سىڭىرگەن قايراتكەرى
