ەل تاريحىنا ۇڭىلسەك, كوشپەلى حالىقتىڭ ماقسات-مۇددەسىن ويلاعان قۇرىلتاي دالا ساياساتىن دامىتۋعا كوپ سەپتىگىن تيگىزگەن, باعزى زاماندا پارلامەنت پەن ءماجىلىستىڭ ءرولىن اتقاردى دەسەك بولادى.
پرەزيدەنت بىلتىر تۇركىستاندا وتكەن كەڭەستە «ۇلتتىق قۇرىلتاي بۇل ارقانى كەڭگە سالىپ وتىراتىن جيىن ەمەس. ءسان-سالتاناتپەن وتكىزەتىن توي دا ەمەس. بابالارىمىز ماڭىزدى شەشىم قابىلدار كەزدە نەمەسە ەلگە قاتەر تونگەن سىن ساعاتتا قۇرىلتاي شاقىرعان» دەپ جيىننىڭ ءمان-ماعىناسىن ءتۇسىندىردى. ودان سوڭ ۇلتتىق بىرەگەيلىگىمىزدى نىعايتىپ, ەلدى دامىتۋ جولىنداعى جۇيەلى جۇمىستارعا توقتالدى. وسىلايشا ۇلتتىق قۇرىلتاي ءار سالانىڭ بەتكەۇستارى باس قوساتىن اشىق ديالوگ الاڭىنا اينالىپ ۇلگەردى.
«ءۇشىنشى وتىرىستىڭ جايىق جاعاسىندا ءوتىپ جاتقانى تەگىن ەمەس. ايگىلى سارايشىق قالاسى وسى جەرگە ءتيىپ تۇر. بۇل شاھار ۇلىق ۇلىستىڭ, كەيىن قازاق حاندىعىنىڭ ماڭىزدى اكىمشىلىك جانە ساۋدا ورتالىعى بولعانى تاريحتان بەلگىلى» دەدى قاسىم-جومارت توقاەۆ.
قۇرىلتايدا كوتەرىلگەن ماسەلەلەرگە قىسقاشا توقتالسام, ينتەرنەتتى تالعامسىز پايدالانۋ بالا تاربيەسىنە تەرىس ىقپال ەتىپ جاتىر. بالالاردى كىتاپ ارقىلى تاربيەلەۋ كەرەك. باسپالاردىڭ جۇمىسى جاندانادى. زاماناۋي كىتاپحانا سالىنادى. ەلدىڭ تۇتاستىعى زيالى قاۋىمنىڭ بىرلىگىنەن باستالادى. ولار ۇرپاققا ونەگە بولاتىن كەسەك اڭگىمە ايتۋى قاجەت. شەجىرەنى ەشقاشان ساياساتپەن ارالاستىرۋعا بولمايدى. قازاق ءتىلى بيزنەستىڭ, عىلىم مەن تەحنيكانىڭ تىلىنە اينالا باستادى. بۇل ءۇردىستى ودان ءارى دامىتۋدىڭ ەڭ ءتيىمدى جولى – اعارتۋشىلىق. التىن وردانىڭ تاريحى تۋرالى دەرەكتى فيلم تۇسىرىلەدى. ەلىمىزدە كاسىبي ارحەولوگتار تاپشى. ارحەولوگيا سالاسىنا قاتىستى زاڭداردى جەتىلدىرۋ قاجەت. حالقىمىزدىڭ دۇنيەتانىمىندا قارا كيىنىپ ءجۇرۋ دەگەن اتىمەن بولماعان. راديكالدى نەوفيتتار حالقىمىزدىڭ سالتىندا جوق كيىم ارقىلى جات ءدىني اعىمداردى قوعامعا تاڭۋعا تىرىسىپ ءجۇر. بۇل – قۇندىلىقتارىمىزعا جاسالىپ جاتقان اشىق شابۋىل. قىز الىپ قاشۋ – مۇلدەم اقتاۋعا بولمايتىن زاڭسىزدىق, قاراڭعىلىق. «ايبىن» وردەنىن داڭقتى باتىرلاردىڭ اتىمەن اتاۋ ۇسىنىلدى.
ءلاززات مۇراتقىزى,
استانا قالاسى اكىمدىگى تەحنولوگيا
كوللەدجىنىڭ ديرەكتورى
