بەيبىتشىلىك جانە كەلىسىم سارايىندا XVII «شاتتىق-2024» بالالار مەن جاسوسپىرىمدەر اراسىنداعى قالالىق بايقاۋ جەڭىمپازدارىنىڭ قاتىسۋىمەن «جولىمىز ءبىر!» كونتسەرتى ءوتتى.
«جولىمىز ءبىر!» كونتسەرت-مانيفەسى – بۇل ەلوردالىق وسكەلەڭ ۇرپاقتىڭ جاڭا باعىتى, جاڭا قادامى جانە ەلىمىزدە بولىپ جاتقان وقيعالاردى قابىلداۋى. باعدارلاما ماقساتى – جاستار بويىندا ادامگەرشىلىك, وتانسۇيگىشتىك, ۇلتتىق-مادەني قۇندىلىقتارعا دەگەن سەزىمدى قالىپتاستىرۋ, پلانەتانىڭ تابيعاتى مەن رەسۋرستارىنا ۇقىپپەن قاراۋ, قوعامدى بىرىكتىرۋ.
«جولىمىز ءبىر!» كونتسەرت-مانيفەسىنىڭ نەگىزگى باعىتى – يدەولوگيا باعىتىنداعى جۇمىس. كونتسەرتتەگى مادەني باعدارلامانىڭ باستى قۇندىلىقتارى – پرەزيدەنتىمىزدىڭ ۇلتتىق قۇرىلتايدا العا قويعان تاپسىرمالارى – تاۋەلسىزدىك پەن وتانسۇيگىشتىك, بىرلىك پەن ىنتىماق, ادىلدىك پەن جاۋاپكەرشىلىك, زاڭدىلىق پەن كاسىبيلىك, شىعارماشىلىق پەن جاڭاشىلدىققا ۇندەس كەلۋى. مەملەكەت باسشىسىنىڭ ايتۋىنشا, ەلىمىزدەگى ءاربىر ازامات وسى باستى قۇندىلىقتاردى بەرىك ۇستانۋى كەرەك. پرەزيدەنت ۇسىنعان «ادال ازامات» ۇعىمى مۇنىڭ ءبارىن تۇگەل قامتيدى. سونىمەن بىرگە بۇل ادىلەتتى قازاقستان يدەياسىمەن ۇندەسىپ جاتىر.
– ءبىز جاسامپاز حالىق بولۋىمىز قاجەت, وزىق ويلى ۇلت رەتىندە تەك قانا العا ۇمتىلۋىمىز كەرەك. ءونىمدى ەڭبەك ەتىپ, ساپالى ءبىلىم الىپ, ورتاق ماقساتقا جۇمىلا ءبىلۋىمىز قاجەت. سوندا بولاشاعى جارقىن, قۋاتتى مەملەكەتتى بىرگە قۇرامىز, – دەدى مەملەكەت باسشىسى ۇلتتىق قۇرىلتايدا سويلەگەن سوزىندە.
ءىس-شارانىڭ «ءبىز ءبىرتۇتاس ەل بىرلىگى بەرىك حالىقپىز» بولىمىندە جاسامپاز ەڭبەك پەن ءبىر شاڭىراق استىنا ۇلتتاردىڭ توپتاسۋى, ەتنوسارالىق تولەرانتتىلىق پەن قوعامدىق كەلىسىمنىڭ قازاقستاندىق ۇلگىسىن قالىپتاستىرۋعا جانە بەكىتۋگە يگى ىقپالىن تيگىزەتىنى تۋرالى لەبىزدەر تىڭدالدى.
«مادەنيەتتىڭ باستاۋى» بولىمىندە جاس سۋرەتشىلەر بالالاردى ۇلتتىق مادەنيەت باستاۋلارىمەن تانىستىرۋ ارقىلى ۇلتتىق بىرەگەيلىكتى ساقتاۋدىڭ ماڭىزدى اسپەكتىسى ەكەنىن كورسەتتى.
«ەكولوگيانى ءوزىڭىزدىڭ جەكە ميسسياڭىزعا اينالدىرىڭىز» بولىمىندە بالالار تابيعاتتىڭ سۇلۋ كورىنىسىنە, ءار ادام قورشاعان الەمنىڭ اجىراماس قۇندىلىعى ەكەنىنە نازار اۋداردى.
فينال اككوردى – «جولىمىز ءبىر!» مۋزىكا-حورەوگرافيا قويىلىمى. وندا جاس قاتىسۋشىلار بىرەگەي كوركەمدىك تاجىريبە, ەرەكشە ساحنالىق قويىلىم, ەرەكشە حورەوگرافيا نومىرلەرى ارقىلى بىرلىككە, ىنتىماققا, بولاشاققا, بەرەكەگە, بەيبىتشىلىككە اپارار جول ءبىر ەكەنىن ەسكە سالدى.
