ەلوردانىڭ قۇرمەتتى زەينەتكەرى, ارداگەر جۋرناليست ساۋلە بايماعانبەتوۆا استانا قالاسى اكىمدىگىنىڭ بەلسەندى ۇزاق ءومىر ءسۇرۋ ورتالىعىندا قازاقتىڭ ۇلتتىق ويىنى – توعىزقۇمالاقتى دارىپتەپ ءجۇر.
ساۋلە قارجاسقىزى بەلسەندى ۇزاق ءومىر ءسۇرۋ ورتالىعىنا 2021 جىلدىڭ تامىز ايىندا ۆولونتەر رەتىندە كەلىپ, توعىزقۇمالاق ۇيرەنۋگە نيەت بىلدىرگەن زەينەتكەرلەردى جانىنا جيناي باستادى. وسى ۋاقىتقا دەيىن 400-دەن اسا اتا-اجەنى توعىزقۇمالاق ويىنىنا ۇيرەتتى. بۇگىندە زەينەت جاسىندا جۇرسە دە, ەسىل, بايقوڭىر, نۇرا اۋداندارىندا تۇراتىن ءوز زامانداستارىنا توعىزقۇمالاقتان ۇيىرمە جۇمىسىن جۇرگىزەدى. وعان 300-دەن اسا زەينەتكەر جازىلعان.
«توعىزقۇمالاق – ەجەلدەن كەلە جاتقان ينتەللەكتۋالدى ويىننىڭ ءبىرى. الەمدە توعىزقۇمالاقتى «دالا شاحماتى», «شوپانداردىڭ الگەبراسى» دەپ تە اتايدى. بۇل ويىننىڭ ەگدە جاستاعى ادامداردىڭ دەنساۋلىعى ءۇشىن پايداسى زور. ادامنىڭ ەستە ساقتاۋ قابىلەتىن جاقسارتادى, اسىرەسە, كارىلىكتە كەزدەسەتىن التسگەيمەر اۋرۋىنا تەجەۋ بولا الادى. ەكىنشىدەن, ەگەر ەگدە جاستاعى ادامدار ينسۋلتتان نەمەسە ينفاركتان زارداپ شەكسە, وندا ساۋساق موتوريكاسىن دامىتۋعا دا پايدالى. ويىن بارىسىندا ءسىز شابۋىلداۋدى, قورعاۋدى, كۇشىڭىزگە قاراي قيمىلىڭىزدى جانە جاۋدىڭ ارەكەتىن ەسەپتەۋدى ۇيرەنەسىز. تاكتيكا, ستراتەگيا, شىدامدىلىق, ءوزىن-ءوزى باقىلاۋ, تاقتاداعى جاعدايدى تەز باعالاي ءبىلۋ – وسىنىڭ ءبارى ومىردە كومەكتەسەدى» دەيدى توعىزقۇمالاق ويىنىنىڭ ماڭىزى تۋرالى ساۋلە قارجاسقىزى.
ورتالىققا قىزمەت الۋشى رەتىندە كەلىپ تىركەلىپ, ساۋلە بايماعانبەتوۆادان توعىزقۇمالاق ويىنىنىڭ قىر-سىرىن ۇيرەنگەن زەينەتكەرلەر بۇگىندە ەرىكتى رەتىندە ۇلتتىق ويىنىمىزدى ناسيحاتتاپ ءجۇر. ساۋلە اپايدىڭ تالعات يسماعۇلوۆ, نۇرتازا ساقۋوۆ, دوسالى مەيىربەكوۆ, جىبەك بەكباەۆا, راۋشان چانكەنوۆا, مۇراتبەك پشەمباەۆ, گۇلنار بۋراباەۆا, اقبوپە ايتماعامبەتوۆا, ايىم ورازباەۆا, مارياش داۋەنوۆا, سارسەمباي قايىرجانوۆ, ايمان ءجۇنىسوۆا سياقتى بەلسەندى شاكىرتتەرى قالامىزدىڭ ەسىل, بايقوڭىر اۋداندارىندا ۆولونتەر رەتىندە توعىزقۇمالاقتى ۇيرەتۋدە.
«قازىرگى ۋاقىتتا ماعان ۇيىرمەگە 50-60 زەينەتكەر تۇراقتى تۇردە كەلەدى. زەينەتكەرلەر ءبىرىنشى ساباققا كەلگەندە, مەن ولارعا «مەن ساعان ويناۋدى ۇيرەتەمىن, ال سەن كەم دەگەندە 10 ادامعا ويناۋدى ۇيرەتۋ كەرەكسىڭ» دەيمىن. كوپشىلىگى بۇل «جوسپاردى» ورىنداپ, ءتىپتى اسىرا ورىنداپ, جاڭادان باستاعاندارعا دا, تۋىستارىنا دا توعىزقۇمالاق تاقتاسىن سىيلاپ, ويناۋدى ۇيرەتكەن. اسىرەسە راۋشان چانكەنوۆا دەگەن شاكىرتىمدى ەرەكشە اتاپ وتكىم كەلەدى, ول مەندە ءبىر جىلدان از ۋاقىت جاتتىعادى. بىراق ول توعىزقۇمالاقتى جاقسى مەڭگەرىپ الدى, بۇگىندە كوشباسشىلار قاتارىندا. ەڭ باستىسى, سەگىز وتباسىعا توعىزقۇمالاق تاقتاسىن سىيعا تارتىپ, ويناۋدى ۇيرەتكەن. ءوز باسىم توعىزقۇمالاق ويىنىنا دەگەن اۋەستىگىم 30 جاستان كەيىن باستالدى. بىراق توعىزقۇمالاقتى مەڭگەرىپ كەتۋ قاي جاستا بولسىن كەش ەمەس. سوندىقتان زامانداستارىمدى بەلسەندى ۇزاق ءومىر ءسۇرۋ ورتالىعىنا شاقىرامىن» دەپ ءسوزىن تۇيىندەدى ساۋلە بايماعانبەتوۆا.
مەرۋەرت قايىرتاسقىزى
