استانادا Enactus Kazakhstan National EXPO 2024 مەكتەپ وقۋشىلارى مەن ستۋدەنتتەر كاسىپكەرلىگىنىڭ رەسپۋبليكالىق چەمپيوناتى ءوتتى. تارتىستى سايىستا ءار وڭىردەن 200-دەن اسا كوماندا قاتىستى. ەكى كۇنگە سوزىلعان دودادا بارلىعى 1300-دەي تالانتتى ءبىلىم الۋشى باق سىنادى.
رەسپۋبليكالىق مەكتەپ كاسىپكەرلىگى چەمپيوناتى – Enactus حالىقارالىق قاۋىمداستىعىنىڭ باستاماسىمەن وتكىزىلەتىن جىل سايىنعى بايقاۋ. كاسىپ باستايمىن دەگەن جاستاردى بىرىكتىرەتىن بىرەگەي الاڭعا بيىل استانا قالاسىنان 26 كوماندا سايىسۋدا. چەمپيوناتقا قاتىسۋشىلار وقۋ جىلى بويى الەۋمەتتىك, ەكولوگيالىق جانە يننوۆاتسيالىق جوبالاردى ويلاستىرىپ, شىڭداۋمەن جۇمىس ىستەيدى. 25-26 ءساۋىر ارالىعىندا ولار ءتۇرلى تاقىرىپتاعى ستارتاپ جوبالاردى تانىستىردى. ءار جوبانىڭ باستى ماقساتى – ەلىمىزدەگى وزەكتى ماسەلەلەردى شەشۋگە اتسالىسۋ.
Enactus Kazakstan قورىنىڭ ۆيتسە-پرەزيدەنتى ارۋجان مىحتياروۆانىڭ سوزىنشە, چەمپيونات 4 كەزەڭ بويىنشا وتكىزىلدى. العاشقىسى – مەكتەپ كاسىپكەرلىگىنىڭ V رەسپۋبليكالىق چەمپيوناتى. ەكىنشىسى, بيىلعى ەرەكشەلىك – تۇڭعىش رەت كوللەدج ستۋدەنتتەرى اراسىندا دا ءوتۋى. ال جوعارى وقۋ ورىندارىنىڭ جاس كاسىپكەرلەرى ەكى كەزەڭدە سايىستى. ءبىرى – الەمدىك كۋبوگقا تارتىسسا, ەندى ءبىرى چەمپيوناتقا جاڭادان قوسىلىپ جاتقان ۋنيۆەرسيتەتتەر ءۇشىن بولدى.
– جاستاردى كاسىپكەرلىككە باۋلۋ, ىسكەرلىككە ىنتالاندىرۋ, بيزنەس-يدەيالاردى جۇزەگە اسىرۋعا جول اشۋدىڭ ءبىر تەتىگى – اتالمىش رەسپۋبليكالىق چەمپيونات. بۇۇ-نىڭ تۇراقتى دامۋ ماقساتتارىنا قول جەتكىزۋگە باعىتتالعان جوبالاردى ىسكە اسىرۋدا, بولاشاق بيزنەس كوشباسشىلارى مەن الەۋمەتتىك كاسىپكەرلەردى قالىپتاستىرۋدا Enactus Kazakhstan National Expo اۋقىمدى ءىس-شاراسى ايتۋلى ۇلەس قوسادى, – دەدى ءوز سوزىندە استانا قالاسى ينۆەستيتسيا جانە كاسىپكەرلىكتى دامىتۋ باسقارماسى ءتۋريزمدى دامىتۋ ءبولىمىنىڭ باسشىسى ومىرزاق تىلەۋجان.
چەمپيوناتقا قاتىسۋشىلار اراسىندا استانا حالىقارالىق مەكتەبىنىڭ وقۋشىلارى تىڭ يدەيانى ۇسىنۋمەن ەرەكشەلەندى. مەكتەپتىڭ 10-سىنىپ وقۋشىسى ماليكا رىمعاليەۆا قۇرداستارىمەن بىرگە 8 اي كولەمىندە قىزۋ دايىندالىپ, بىرقاتار جوبالاردى ۇسىندى.
چەمپيونات قورىتىندىسى بويىنشا مىڭداعان جوبانىڭ اراسىنان ۇزدىك الەۋمەتتىك ستارتاپتار انىقتالدى. مەكتەپ پەن كوللەدجدەر كوماندالارى ۇلتتىق چەمپيون اتانىپ, قوسىمشا قارجىلاي سىيلىقتار مەن دەمەۋشىلەردىڭ قولداۋىن يەلەندى. ال ۋنيۆەرسيتەتتەر اراسىنداعى جەڭىمپاز ۇلتتىق چەمپيون اتاعىمەن قوسا نيدەرلاندتا وتەتىن ENACTUS World Cup 2024 كۋبوگىندا ونەر كورسەتۋگە جولداما الدى.
