ەلوردادا ءماسليحاتتاردىڭ 30 جىلدىعىنا ارنالعان تاريحتاعى العاشقى «Senat Open» شاحمات ءتۋرنيرى ءوتتى. كۋبوكتى وتكىزۋگە سەنات توراعاسى ماۋلەن اشىمباەۆ باستاما كوتەرىپ, ارنايى ەرەجەگە قول قويعان بولاتىن. ينتەلەكتۋالدى ويىندا باق سىناۋشىلار قاتارىندا پارلامەت جانە ءماسليحاتتاردىڭ ءار كەزدەگى شاقىرىلىمدارىنىڭ دەپۋتاتتارى, ەلوردالىق قوعامدىق كەڭەس جانە ارداگەرلەر كەڭەسىنىڭ مۇشەلەرى, بلوگەرلەر, باق وكىلدەرى, قوعام بەلسەندىلەرى بولدى.
استانانىڭ ەڭ مىقتى شاحماتشىلارى قاتارىنا ەنۋ ءۇشىن 106 ادام باق سىناستى. سەناتتىڭ قولداۋىمەن استانا قالالىق ءماسليحاتى, قازاقستان شاحمات فەدەراتسياسى بىرلەسە وتكىزگەن ءتۋرنيردىڭ اشىلۋىندا قالالىق ءماسليحات توراعاسى ەرلان كاناليموۆ, ءماسليحات دەپۋتاتى ءارى قالالىق شاحمات فەدەراتسياسىنىڭ پرەزيدەنتى, ءوزى دە وسى ويىنعا قاتىسقان ابزال ساعىمباەۆ جانە رەسپۋبليكالىق شاحمات فەدەراتسياسىنىڭ ۆيتسە-پرەزيدەنتى دارمەن سادۋاقاسوۆ ءسوز سويلەپ, شاحمات قوعامداستىعىنىڭ جەتىستىكتەرى مەن جوسپارى تۋرالى باياندادى. جارىستىڭ باستى ماقساتى – حالقىمىزدىڭ ينتەللەكتۋالدى الەۋەتىن كوتەرۋ, ساياسي تۇلعالار مەن قوعام بەلسەندىلەرى, دەپۋتاتتار, باق وكىلدەرى اراسىندا شاحمات ونەرىن كەڭىنەن ناسيحاتتاۋ, جەرگىلىكتى بيلىك ورگاندارىنىڭ شاحمات ويىنىنا دەگەن ىنتا-ىقلاسىن وياتىپ, بەلسەندىلىگىن ارتتىرۋ.
-رەسپۋبليكالىق دەڭگەيدە ءبىرىنشى رەت وتكىزىلىپ جاتقان «سەنات كۋبوگى» جاقسى باستاما دەپ ويلايمىن. تۋرنيردە استانا قالاسىنان VIII شاقىرىلىم بويىنشا 170-تەن استام دەپۋتات بار. بۇگىن سونىڭ 15-ءى وسى دوداعا قاتىسىپ جاتىر. شاحمات – جاي ويىن ەمەس, ءار ءجۇرىسى ويلانۋدى قاجەت ەتەتىن, ستراتەگياعا نەگىزدەلگەن ينتەللەكتۋالدى ويىن ءتۇرى. بۇگىنگى تۋرنيردە شىن مىقتىلار جەڭىسكە جەتسىن, – دەدى استانا قالاسى ءماسليحاتىنىڭ توراعاسى ەرلان كاناليموۆ.
تۋرنير سوڭىندا جەڭىمپازدار 5 اتالىم بويىنشا, ياعني ايەلدەر اراسىندا ۇزدىك ناتيجە كورسەتكەنى ءۇشىن, 60 جاستان اسقاندار اراسىنداعى ۇزدىك ويىنشى, باق وكىلدەرى اراسىندا ۇزدىك ناتيجە كورسەتكەنى ءۇشىن, ۇزدىك قوعامدىق بەلسەندى, دەپۋتاتتار اراسىندا ۇزدىك ناتيجە كورسەتكەنى ءۇشىن دەگەن نوميناتسيالار بويىنشا ماراپاتتالدى. جالپى 9 تۋردىڭ قورىتىندىسىندا بارلىعى 25 ويىنشى ۇزدىك دەپ تانىلىپ, جارتىلاي فينالعا قاتىسۋعا جولداما الدى.
د. سادۋاقاسوۆ جەڭىمپازدارعا مەدالدەرىن, ديپلومدار مەن شاحمات تاقتاسىن تابىستادى. 19 مامىردا اياقتالاتىن ىرىكتەۋ تۋرنيرلەرى بۇكىل ەل بويىنشا وتۋدە. جارتىلاي فينال 7 ماۋسىمنان 9 تامىزعا دەيىن, ال فينال 29 تامىزدا استانادا وتەدى. رەسپۋبليكا بويىنشا 17 ءوڭىر جانە 3 مەگاپوليستەن قاتىساتىن 3 مىڭداي شاحماتشى اراسىنان ۇزدىكتەر ىرىكتەلىپ, سولاردىڭ ىشىنەن ءابسوليۋتتى جەڭىمپاز انىقتالادى.
ەلوردا شاحماتشىلارى اراسىندا اتى جاقسى تانىس, بەلگىلى شاحماتشى, 42 جىل مەكتەپتە ماتەماتيكادان ساباق بەرگەن 86 جاستاعى اقساقال سابىر ابدىعاليۇلى دا – وسى ءتۋرنيردىڭ بەلسەندى قاتىسۋشىسى.
-تۋعان جەرىم قورعالجىن اۋىلىندا العاش رەت شاحماتتى 9-سىنىپتا كورىپ, ويناۋدى دوسىم ۇيرەتكەن. سودان باستاپ ول ومىرلىك سەرىگىمە اينالدى. كوپتەگەن قالالىق, رەسپۋبليكالىق, حالىقارالىق جارىستاردىڭ جەڭىمپازى بولدىم. مەكتەپتەگى ۇستازدىق قىزمەتىمنەن بولەك 20 جىل بالالاردى شاحماتقا باۋلىپ, ولارعا كاسىبي جاتتىقتىرۋشى رەتىندە قىزمەت ەتتىم. زەينەتكەرلەر اراسىندا 5 رەت چەمپيون اتاندىم. شاحماتتان 3-4 حالىقارالىق شەبەرلەرىن دايىنداعانىم – باستى جەتىستىگىم. قازىر سولاردىڭ ەكەۋى وسى تۋرنيرگە قاتىسۋدا. شەتەلگە كەتكەن شاكىرتتەرىم دە بار. بوس ۋاقىتىم بولسا ەرمەگىم وسى – شاحمات. شاحمات – بۇل تەك سپورت قانا ەمەس, شاحماتتا عىلىمنىڭ ەلەمەنتتەرى بار, سونىمەن قاتار ەستەتيكالىق ونەر دەۋگە دە كەلەدى. سونداي-اق ادامنىڭ اناليتيكالىق قابىلەتتەرىن دە دامىتادى. ادامعا قۇداي ءوزى اقىل بەرەدى, شاحمات سول اقىلدى تارتىپكە سالاتىن ويىن, سەبەبى ونىڭ وزىندىك ەرەجەلەرى ميدى جاتتىقتىرادى, – دەيدى شاحماتشى اقساقال.
قازاقستاندا شاحماتتى دامىتۋدىڭ 2023-2027 جىلدارعا ارنالعان كەشەندى جوسپارىن ىسكە اسىرۋ باعىتىندا جۇمىستار جۇرگىزىلۋدە. استانادا الەم چەمپيونى اتاعى ساراپقا سالىنعان جارىس پەن ازيا چەمپيوناتىنىڭ وتكىزىلۋى – سونىڭ ءبىر ناتيجەسى. جاتتىقتىرۋشىلاردىڭ بىلىكتىلىگىن ارتتىرۋ, ۇلتتىق قۇراما سپورتشىلارىن دايارلاۋ ءۇشىن كاسىبي مامانداردى جۇمىلدىرۋ, وقىتۋ فورماتتارىن جەتىلدىرۋ, شاحمات كلۋبتارىن اشۋعا ءمان بەرىلەدى. ەلىمىزدە شاحماتتى دارىپتەۋ ىسىنە مەملەكەت تاراپىنان قولداۋ جوعارى. سەنات تاراپىنان شاحماتتى ودان ءارى دامىتۋعا جانە قازاقستان شاحمات فەدەراتسياسىنىڭ قىزمەتىن جەتىلدىرۋگە قولداۋ كورسەتىلەدى. قازىرگى تاڭدا ەلىمىزدە 200 مىڭنان استام ادام شاحماتپەن اينالىسادى. جەتى وڭىردە اتالعان ويىندى ۇيرەتۋ ءۇشىن پيلوتتىق جوبا قولعا الىنعان. بۇل باستاما 42 مەكتەپ پەن 1000 وقۋشىنى قامتىپ وتىر.
