مەن استانا قالالىق ءماسليحاتىندا 2016-2021 جىلدارى VI شاقىرىلىمدا №23 سايلاۋ وكرۋگى بويىنشا دەپۋتات بولدىم. ول كەزدە جەكە پارتيالىق ءتىزىم دەگەن بولعان جوق. دەپۋتاتتىققا ۇمىتكەر ءار ادام حالىقتىڭ الدىنا ءوز باعدارلاماسىمەن شىعىپ, سايلاۋعا ءتۇستى.
بەس جىل تولىق سول قىزمەتىمىزدى ابىرويمەن اتقاردىق. دەپۋتاتتىق مىندەتىمىز قوعامدىق قىزمەت رەتىندە اتقارىلدى. قالانىڭ قاي سالاسىن دامىتۋعا بولسىن ءبىزدىڭ دەپۋتاتتار ءوز ۇلەسىن تيگىزدى. اتاپ ايتقاندا, ءبىلىم, دەنساۋلىق ساقتاۋ, مادەنيەت, قۇرىلىس, كوممۋنالدىق جانە تۇرمىستىق ماسەلەلەردى شەشۋگە اتسالىستىق. ول كەزدە قالانى سالۋ كاداسترى دەگەن بولعان جوق. دەگەنمەن وسى باعىتتا دا ۇسىنىستارىمىزدى بەردىك.
قالانىڭ ىشىندە جول ەرەجەلەرىن ساقتاۋ ساپاسىن ارتتىرۋ بويىنشا «سەرگەك» جوباسى دا ءبىزدىڭ دەپۋتاتتىق قىزمەت كەزىندە قابىلدانىپ, ەنگىزىلدى. ونى جەكەمەنشىك-مەملەكەتتىك سەرىكتەستىك ارقىلى جۇزەگە اسىردى. بۇگىندە جاياۋ جۇرگىنشىلەردىڭ دە, كولىك جۇرگىزۋشىلەرىنىڭ دە, جالپى قوزعالىس قاۋىپسىزدىگى ءۇشىن ماڭىزدى بۇل جوبا قازاقستاندا جاپپاي قولدانىلاتىن بولدى. ال دەنساۋلىق ساقتاۋ سالاسىندا مەديتسينالىق قىزمەتكە جىلدام قولجەتىمدىلىكتى قامتاماسىز ەتۋ ماقساتىندا ەمحانالاردىڭ بولىمشەلەرىن كوپقاباتتى ۇيلەردىڭ استىڭعى قاباتىنان اشۋ بويىنشا «ءۇي ماڭىنداعى دارىگەر» جوباسى دا سول جىلدارى باستاۋ الدى.
سونداي-اق ءارتۇرلى الەۋمەتتىك قيىندىققا تاپ بولعان قالا تۇرعىندارىمەن جەكە قابىلداۋلار وتكىزىپ, ماسەلەلەرىنە قۇلاق تۇردىك. ولاردىڭ ورتاسىنا بارىپ, كەزدەسىپ, مۇڭ-مۇقتاجىن تىڭدادىق, سونى بيلىككە جەتكىزۋگە تىرىستىق. مۇگەدەك بالالارى بار, جەتىم نەمەسە تولىق ەمەس وتباسىلارمەن كەزدەسىپ, سولاردىڭ شاعىم-تالابىن اكىمدىكتىڭ الدىنا قويىپ, دەپۋتاتتار سول ماسەلەلەردى ءوز قۇزىرەتى شەڭبەرىندە شەشۋگە تىرىستى.
2020 جىلى كوروناۆيرۋس ينفەكتسياسىنا بايلانىستى بۇكىل الەمدە پاندەميا جاريالانعاندا, دەپۋتاتتار دەرتتىڭ الدىن الۋ جۇمىستارىن ۇيلەستىردى. ءوزىم باسشىلىق ەتەتىن قازىرگى ورتالىق – سول كەزدە اۋرۋمەن كۇرەستە ەڭ العى شەپتە بولعان مەكەمەنىڭ ءبىرى. وسى كۇرەستە ءبىزدىڭ ۇجىم, مەكەمەدەگى مەديتسينالىق پەرسونال كۇن-ءتۇن دەمەي ەڭبەك ەتتى. ءوزىم الماتى اۋدانىنان سايلانعاندىقتان, وسى اۋدان اكىمدىگىمەن تىعىز بايلانىستا جۇمىس جۇرگىزىپ, سونىڭ اۋماعىنداعى جولدار, كوممۋنالدىق قىزمەتتەر ماسەلەلەرىن كوتەردىم. قازىر قالاداعى اۋدانداردىڭ سانى دا كوبەيىپ, سوعان وراي قالالىق ماسليحاتتاعى دەپۋتاتتار سانى 25-تەن 31-گە ارتتى.
بۇگىندە ءماسليحاتتاردىڭ قوعامداعى ورنى, ءرولى كوتەرىلىپ كەلەدى. ءماسليحات قۇرامىنداعى كوميسسيالار جۇمىسى دا بەلسەندى بولا باستادى. ءماسليحاتتاردىڭ كۇندەلىكتى ءومىردىڭ ءتۇرلى جاعدايىنا ارالاسۋى, قوعامدىق باقىلاۋ جۇرگىزۋى جوعارىلاپ بارادى. بۇل وتە دۇرىس. سەبەبى باقىلاۋعا الىنىپ, تەكسەرىلمەسە, قوعامداعى كوپتەگەن سالا جۇمىسىنىڭ تۇزەلۋى, ساپاسىنىڭ ارتۋى قيىن. دەپۋتاتتار قالا بيۋدجەتىن بەكىتۋ, ونىڭ ورنىمەن جۇمسالۋىن قاداعالاۋ, الەۋمەتتىك, قۇقىقتىق قورعاۋ سياقتى بىرقاتار ءماسليحات كوميسسيالارىندا سول ماسەلەلەردى قاراۋ ارقىلى دا مەملەكەت ساياساتىن ءادىل, ادال جۇرگىزۋگە سەپتىك ەتەدى. ەلىمىزدەگى ءماسليحاتتاردىڭ 30 جىلدىعىمەن بارلىق ارىپتەستەرىمدى قۇتتىقتاي وتىرىپ, ولاردىڭ جاۋاپتى دا ماڭىزدى قىزمەتىنە تابىس تىلەيمىن!
مۇحتار تولەۋتاەۆ,
استانا قالاسى كوپسالالى
مەديتسينا ورتالىعىنىڭ ديرەكتورى,
قازاقستاننىڭ ەڭبەك ەرى,
VI شاقىرىلىم دەپۋتاتى
