جۇكتى ايەلدى جان-جاقتى تەكسەرەدى
بيىل ەلوردادا «ءبىر كۇندىك كلينيكا» جوباسى №2 كوپبەيىندى قالالىق اۋرۋحاناسىنداعى ۇرىقتى قورعاۋ ورتالىعىندا اشىلعان ەدى.
«ءبىر كۇندىك كلينيكا» جوباسىنىڭ نەگىزگى ماقساتى – جۇكتىلىكتىڭ ءبىرىنشى تريمەسترىندەگى تۋا بىتكەن ۇرىقتىڭ دامۋىنداعى اقاۋلارىن جانە حروموسومالىق اۋىتقۋلاردى انىقتاۋعا باعىتتالعان پرەناتالدىق سكرينينگتىك باعدارلامالاردىڭ قولجەتىمدىلىگى مەن تيىمدىلىگىن ارتتىرۋ. بۇل جوبانى ىسكە اسىرۋ جۇكتى ايەلدەردى ءبىر كۇندە قاجەتتى تەكسەرۋلەردەن ءوتۋ مۇمكىندىگىن قامتاماسىز ەتۋگە باعىتتالعان. بۇل ناتيجەلەردى كۇتۋ ۋاقىتىن قىسقارتۋعا جانە دياگنوستيكا مەن ەمدەۋ ءۇشىن قاجەتتى شارالاردى جەدەل قابىلداۋعا مۇمكىندىك بەرەدى.
– «ءبىر كۇندىك كلينيكادا» جۇكتى ايەل تەك ءبىر عانا ەمەس, جۇكتىلىكتىڭ ءبىرىنشى تريمەسترىندە قاجەتتى بارلىق پرەناتالدىق سكرينينگتەردى وتەتىندىكتەن, زەرتتەۋلەردى كوپتەگەن ماماندار اتقارىپ كەڭەس بەرەدى. سوندىقتان وسىندا 20-دان استام قىزمەتكەرلەر جۇمىس ىستەيدى, – دەيدى ۇرىقتى قورعاۋ ورتالىعىنىڭ باسشىسى مۋزار مارالحان.
«ءبىر كۇندىك كلينيكا» جوباسى اياسىندا پرەناتالدى سكرينينگتەردەن ءوتۋدىڭ بىرنەشە ارتىقشىلىقتارى بار. بىرىنشىدەن, جۇكتى ايەلدەر قىسقا مەرزىمدە ءبىر مەكەمەدە جان-جاقتى تەكسەرۋدەن وتەتىندىكتەن, ۋاقىتىن ۇنەمدەيدى, ەكىنشىدەن, لابوراتورلى-دياگنوستيكالىق زەرتتەۋلەر مەن مامانداردىڭ كەڭەسىنە قابىلداۋعا جازىلۋ ۋاقىتى ازايعاندىقتان, ەموتسيونالدى كۇيزەلىس ازايادى. ۇشىنشىدەن, باسقا مەكەمەلەرگە مەديتسينالىق كومەككە جۇگىنۋ قاجەتى بولماعاندىقتان, جولعا, ياعني اۆتوكولىككە جۇمسالاتىن قوسىمشا ماتەريالدىق شىعىنداردى بولدىرمايدى. تورتىنشىدەن, جۇكتى ايەل پرەناتالدى تەكسەرۋدەن وتكەننەن كەيىن بىردەن جوعارى بىلىكتى ماماندارعا بارادى, ولار نارەستەنىڭ دەنساۋلىعى جايلى تولىق اقپاراتپەن قوسا, ۇسىنىستارىن بەرەدى. بەسىنشىدەن, زاماناۋي دياگنوستيكالىق جابدىقتار (ۋدز, ميكروسكوپتار, اناليزاتورلار) بار. جەتىنشىدەن, ناتيجەنى كۇتەتىن قىسقا مەرزىمدە جۇكتى ايەلدەرگە تەگىن تاماق ءىشۋ مۇمكىندىگى قاراستىرىلعان.
ۇرىقتى قورعاۋ ورتالىعىنىڭ باسشىسى مۋزار مارالحاننىڭ ايتۋىنشا, كلينيكا ماماندارى ۇرىقتا بولۋى مۇمكىن بارلىق تۋا بىتكەن اقاۋلارى مەن حروموسومالىق پاتولوگيالارىن انىقتايدى. ۇرىقتىڭ اناتومياسىن ەگجەي-تەگجەيلى باعالاۋعا ارنالعان زاماناۋي باعدارلامالارى بار ساراپشى كلاسىنداعى ۋلترادىبىستىق اپپاراتتار, بيوحيميالىق سكرينينگ جانە گەنەتيكالىق پاتولوگيا قاۋپىن انىقتاۋعا ارنالعان 2024 جىلدىڭ جاڭا اناليزاتورى, كاريوتيپتەۋ جاساۋعا ارنالعان بىرەگەي باعدارلاماسى بار ساراپشى كلاستاعى ەلەكتروندىق ميكروسكوپتارمەن جابدىقتالعان. مۇنداي كلينيكا اشۋ جۇكتى ايەلدەرگە كورسەتىلەتىن مەديتسينالىق كومەكتىڭ ساپاسىن, تيىمدىلىگىن, قولجەتىمدىلىگىن ارتتىرا وتىرىپ, ۇرىقتىڭ تۋا بىتكەن اقاۋلارى مەن حروموسومالىق پاتولوگيالارىن جۇكتىلىكتىڭ ەرتە كەزەڭىندە انىقتاۋعا جانە وسى اقاۋلاردان بالا ءولىمى مەن مۇگەدەكتىكتىڭ الدىن الۋعا مۇمكىندىك بەرەدى.