يۋسۋپ كەليگوۆ, استانا قالاسى قوعامدىق كەڭەسىنىڭ مۇشەسى, قازىرگى ۋاقىتتا «استانا ورمانى» جشس دامىتۋ جونىندەگى باسقارۋشى ديرەكتورى بولىپ جۇمىس ىستەيدى. كەزىندە ەلوردالىقتاردىڭ قولداۋىنىڭ ارقاسىندا قالالىق ءماسليحاتتىڭ ءۇش شاقىرىلىمىنىڭ دەپۋتاتى بولدى. قحا كەڭەسى مۇشەسى, قازاقستان رەسپۋبليكاسىنداعى «ۆايناح» شەشەن جانە ينگۋشتار قاۋىمداستىعىنىڭ تەڭ توراعاسى.
– مەن باقىتتى اداممىن. مەنىڭ اينالامدا ارقاشان جاقسى ادامدار بولدى. جورا-جولداستارىمىزدىڭ, دوستارىمىز بەن ارىپتەستەرىمىزدىڭ – كوممۋنالدىق قىزمەتكەرلەر مەن قۇرىلىسشىلاردىڭ ارقاسىندا ەلورداسى – استانامىزدى دامىتۋدا كوپتەگەن جەتىستىكتەرگە قول جەتكىزدىك. سول ءۇشىن مەن ولارعا شەكسىز ريزامىن.
ەلوردا كوشىرىلگەندە مەن قالالىق كوميتەت جەتەكشىلەرىنىڭ ءبىرى بولدىم. قالالىق ءماسليحاتتىڭ ءۇش شاقىرىلىمىنىڭ دەپۋتاتى رەتىندە اتقارىلعان جۇمىستاردىڭ اۋقىمى ۇلكەن بولدى. بۇل, ءبىر جاعىنان, قيىن دا كۇردەلى ۋاقىت بولدى, بىراق ءبىز تىرىستىق. قازىرگى كۇندە سول دەپۋتات بولعان كەزەڭىمدى ىستىق ىقىلاسپەن ەسىمە الىپ جۇرەمىن. دەپۋتات مانداتى دەگەندى ءوز باسىم ۇلكەن جاۋاپكەرشىلىك ءارى مارتەبە دەپ تۇسىنەمىن.
سونداي-اق قالاداعى كوممۋنالدىق قىزمەتتەگى, بارلىق بولىمشەلەردەگى ارىپتەستەرىمە العىسىم شەكسىز, ويتكەنى ءوزارا كومەك, قولداۋ, سىيلاستىق قارىم-قاتىناس, ىنتىماق بىرلەسە شەشىلەتىن كۇندەلىكتى ماسەلەلەردى شەشۋگە كومەكتەستى.
قالالىق كوميتەتتە ول كەزدە 2500-دەي ادام جۇمىس ىستەدى. بۇل ۇلكەن باستاما بولدى. ءبىز كوپتەگەن ماسەلەلەرمەن اينالىستىق: اباتتاندىرۋ, كوگالداندىرۋ, جارىقتاندىرۋ. ءار ءبولىم ۇلعايعان سايىن جۇمىس كولەمى دە ارتا ءتۇستى. ارينە, ءبارى قاراپايىم جانە وڭاي بولعان جوق. بىراق بۇل – ءبىزدىڭ وتكەن جولىمىز, العان بەلەستەرىمىز. تاريحىمىز رەتىندە ونى ماقتانىشپەن ەسكە الامىز.
مەگاپوليستە كوپتەگەن ماڭىزدى نىساندار بار, ولاردىڭ بارلىعى مەن ءۇشىن قىمبات. بىراق ەڭ كورنەكتىسى – استانانىڭ اينالاسىندا ورنالاسقان جاساندى وازيس ەلوردانىڭ جاسىل بەلدەۋى قالا تۇرعىندارى مەن قوناقتارى ءۇشىن تاماشا دەمالىس ورنى.
تابيعاتتى قورعاۋ, ورمان بايلىعىن ارتتىرۋ ەل بولاشاعىن ويلاعان ادام ءۇشىن اسا ماڭىزدى. پرەزيدەنت قاسىم-جومارت توقاەۆتىڭ بۇل ماسەلەگە باسا نازار اۋدارۋى بەكەر ەمەس. قازاقستاننىڭ شانحاي ىنتىماقتاستىق ۇيىمىنا توراعالىعى اياسىندا 2024 جىل ەكولوگيا جىلى بولىپ جاريالاندى. يگى باستامانى ءبارىمىز قولدايمىز. وتكەن سەنبىدە استانا قالاسى ءماسليحاتىنىڭ بارلىق شاقىرىلىمدارىنىڭ دەپۋتاتتارى «تازا قازاقستان» ەكولوگيالىق اكتسياسىنا قاتىستى. بوتانيكالىق باقتا ەلوردالىق وكىلدى ورگاننىڭ 30 جىلدىعىنا ارنالعان اللەيا توسەلدى. بۇل شاراعا جاستاردىڭ قوسىلعانى قۋانتادى. ءبىز ولاردىڭ قالامىزدى تازا, جايلى جانە ءومىر سۇرۋگە جايلى ەتۋگە دەگەن ۇمتىلىسىنا ريزامىز. جالپى 3 اپتا ىشىندە ەكولوگيالىق ناۋقانعا 179 مىڭنان استام ادام قاتىسىپ, 4,6 مىڭ تونناعا جۋىق قوقىس شىعارىلدى. 50 900 اعاش وتىرعىزىلدى. اكتسيانىڭ كەلەسى اپتالىعى «ونەگەلى ۇرپاق» اتاۋىمەن ءوتىپ, ارداگەرلەردىڭ اۋلالارى مەن قارتتار ءۇيىنىڭ اۋماقتارىن اباتتاندىرۋعا ارنالادى.
اكتسيانىڭ ناتيجەسى بىردەن كوزگە كورىنىپ تۇر. مۇنىڭ ءبارى وسى ماڭىزدى جۇمىستى بىرگە اتقارعانىمىزدىڭ ارقاسىندا. سەنبىلىككە قالا تۇگەلدەي دەرلىك شىقتى. شاراعا بارلىق ۇيىمدار مەن كاسىپورىندار, قحا ەتنومادەني بىرلەستىكتەرى جانە باسقا دا قوعامدىق ۇيىمدار قوسىلدى. بيىلعى ماۋسىم باسىنان بەرى ءبىزدىڭ «استانا ورمانى» ۇجىمى 83 693 كوشەت وتىرعىزدى. بارلىعى كوكتەمدە 200 مىڭنان استام جاسىل جەلەك وتىرعىزۋ جوسپارلانعان بولاتىن.
ادامداردىڭ بەيقامدىعى قانداي اۋىر زارداپتارعا اكەلەتىنىن ءبارىمىز بىلەمىز. وتكەن جىلى اباي اۋدانىندا ونداعان مىڭ گەكتار ورمان القاپتارى ورتەنىپ كەتكەن اپاتتىڭ كۋاسى بولدىق. سوندىقتان دا بۇگىنگى تاڭدا ەكولوگيالىق بىلىممەن اينالىسۋ, تابيعاتتى قۇرمەتتەۋگە تاربيەلەۋدىڭ ماڭىزى زور.
