ۇلت پەرزەنتىنە ارنالعان كورمەلەر
قازاقتىڭ ءبىرتۋار ۇلى, اكادەميك قانىش ساتباەۆتىڭ تۋعانىنا 125 جىل تولۋىنا وراي استانا قالاسىنىڭ كىتاپحانالارىندا «ءداۋىر اياسىنداعى پورترەت», «الەمگە ايگىلى قانىش ساتباەۆ», «ۇلتىنىڭ ۇلى پەرزەنتى» اتتى كىتاپ كورمەسى قويىلدى.
كورمەگە قويىلعان ماتەريالدار مەن قۇجاتتاردا اكادەميكتىڭ ءومىر جولى, قىزمەتى, عىلىمعا سىڭىرگەن ەڭبەگى رەتىمەن تانىستىرىلدى. ساتباەۆتى قازاقستانداعى تاريحي وقيعالاردىڭ, پاتشالىق رەسەيدىڭ ءبىر كەزدەرى ارتتا قالعان شەتكى ايماقتارىنىڭ وزىق يندۋستريالىق-اگرارلىق رەسپۋبليكاعا اينالعانىن كورسەتەتىن بەلسەندى قاتىسۋشىسى رەتىندە كورسەتەدى. مۇندا حرونولوگيالىق تارتىپتە ءومىرى مەن قىزمەت شەجىرەسى, ماتەريالدار جيناقتارى ۇسىنىلدى.
كىتاپحانالاردىڭ وقۋ زالدارىندا وتكەن ەڭ قىزىقتى ءىس-شارالار – №3 كوپشىلىك كىتاپحاناسىنىڭ «تۇڭعىش قازاق اكادەمياسى» تاربيە ساعاتى, №4 بالالار كىتاپحاناسىنىڭ «قانىش ساتباەۆ – ۇلى دالانىڭ ۇلى پەرزەنتى» اتتى كەش, «قازاقتىڭ ۇلى عالىمى – قانىش ساتباەۆ» اتتى №2 بۇقارالىق كىتاپحانانىڭ اشىق ساباعى. وندا كىتاپحانا قىزمەتكەرلەرى اكادەميكتىڭ كىتاپحانالار كىتاپ قورلارىنداعى ساقتالعان باي دا قايتالانباس ەپيستوليارلىق مۇراسىنا ءسۇيەنە وتىرىپ, قانىش يمانتايۇلىنىڭ عىلىم مەن ءبىلىمدى ناسيحاتتاعان ەرەكشە تالانتىن, ونىڭ جان-جاقتى پۋبليتسيستىك قىزمەتى تۋرالى اڭگىمەلەدى. سونداي-اق قالامىزدىڭ ورتا مەكتەپتەرىندەگى 10-سىنىپ وقۋشىلارى ۇيىمداستىرىپ, وقىرمانداردىڭ قىزىعۋشىلىعىن وياتقان ءىس-شارالار ايرىقشا باعالاندى. №8 بالالار كىتاپحاناسىندا وتكەن «قانىش ساتباەۆ – ەلىنىڭ پەرزەنتى, وتانىنىڭ ازاماتى» اتتى وقۋ كونفەرەنتسياسى, ورتالىق قالالىق اۋرۋحانانىڭ قىزمەت كورسەتۋ ءبولىمىنىڭ «قانىش ساتباەۆتىڭ ۇلى مۇراسى» اتتى ادامگەرشىلىك ساباعى, ورتالىق بالالار مەن جاسوسپىرىمدەر كىتاپحاناسىنىڭ «قازاق ارحەولوگياسىنىڭ بايتەرەگى» تاريح ساباعى, №9 كوپشىلىك كىتاپحاناسىنىڭ «ۇلى عالىم فەنومەنى» ادەبي ساباعى, تاعى باسقا ءىس-شارالاردىڭ تاعىلىمدىق ءمانى زور بولدى.
كەشكە قاتىسۋشىلار قانىش ساتباەۆتى كورنەكتى گەولوگ, ۇلكەن جۇرەكتى عالىم رەتىندە عانا ەمەس, ءوز ءداۋىرىنىڭ ءىرى ويشىلى, قوعام قايراتكەرى رەتىندە تانىدى. قانىش ساتباەۆتىڭ ەڭبەك جولى مەن ءومىر جولى – بۇگىندە ءومىرىن گەولوگيا, مەتاللۋرگيا, تاۋ-كەن ونەركاسىبى سالالارىمەن بايلانىستىرعىسى كەلەتىن جاستارعا ۇلگى.