بيىل – عۇمىرىندا قازاقتىڭ كەڭ دالاسىن زەرتتەگەن, تاۋ-تاسىنا ءۇڭىلىپ, عىلىمي دەرەك-دايەك جيناعان عالىم الكەي حاقانۇلى مارعۇلاننىڭ 120 جىلدىعى. سوندىقتان «قازاق ارحەولوگياسىنىڭ اتاسى» مەرەيتويىن قالالىق, رەسپۋبليكالىق دەڭگەيدە اتاپ ءوتۋ – باستى مۇرات.
كورنەكتى قايراتكەر ەسىمى بەرىلگەن, وتاندىق ءبىلىم كوشىنىڭ الدىڭعى قاتارىنان كورىنىپ جۇرگەن مەكتەبىمىزدە ءساۋىردىڭ 20-سى كۇنى «الكەي مارعۇلان مۇراسى – ۇلتتىڭ رۋحاني بايلىعى» اتتى رەسپۋبليكالىق عىلىمي-تانىمدىق كونفەرەنتسيا ۇيىمداستىرىلدى. ءار وڭىردەن جيىلعان بىلىكتى پەداگوگتار, ءبىلىم ىزدەگەن جاستار مەن ايتارى بار عالىمدار باس قوستى. مەيماندار قاتارىندا قر ەڭبەك سىڭىرگەن قايراتكەرى زەينوللا ساماشۇلى, تاريح عىلىمدارىنىڭ دوكتورى جاراس اقىشۇلى, استانا قالاسى ادىستەمەلىك ورتالىعى باسشىسىنىڭ ورىنباسارى ديدار دۋلاتۇلى جانە ت. ب. بولدى.
اۋقىمدى ءىس-شارانى جۇرگىزگەن مەكتەپ ديرەكتورى ساۋلە امانگەلدىقىزى «قازاق حالقىنىڭ ەتنوگرافياسىن, تاريحىن تەرەڭ زەرتتەپ, قۇندى مۇرا قالدىرعان الكەي مارعۇلان ەسىمى ۋاقىت وتكەن سايىن جاس ۇرپاق, كەلەر تولقىن جادىندا جاڭعىرا بەرەدى» دەدى.
كونفەرەنتسياعا الماتى, قاراعاندى, تۇركىستان جانە ءبىر كەزدەرى الكەي مارعۇلان ءبىلىم العان بايىرعى قارا شاڭىراق, كوپ جىلعى تاريحى بار وقۋ ورنى – سەمەيدەگى م.اۋەزوۆ اتىنداعى پەداگوگيكالىق كوللەدج ستۋدەنتتەرى مەن وقىتۋشىلارى ونلاين فورماتتا قاتىسسا, ارقالىق قالاسىنان كەلىپ ءوز زەرتتەۋ جۇمىسىمەن بولىسكەن پەداگوگتار دا بولدى. اۋقىمدى ءىس-شارا اياسىندا ءبىلىمىن, تاجىريبەسىن كورسەتە بىلگەن ۇستازدارعا, شاكىرتتەرگە, قوناقتارعا سەرتيفيكات تابىستالدى. رەسپۋبليكالىق دەڭگەيدەگى كونفەرەنتسيا سوڭى, داستۇرگە ساي, مەكتەپتىڭ ءانۇرانى – «مارعۇلان» مارشىمەن تۇيىندەلدى.
جۇلدىز نايمانباەۆا,
استانا قالاسى الكەي مارعۇلان اتىنداعى №40 مەكتەپ-ليتسەي مۇعالىمى
