قازاقستان حالقىنىڭ بىرلىگى كۇنىنە وراي ەلوردالىق ورتا ارناۋلى وقۋ ورىندارى اراسىندا «Jana Beles Fest – 2024» شىعارماشىلىق فەستيۆالى باستالدى. ءىس-شارا «استانا جاستارى» جاستار رەسۋرستىق ورتالىعىنىڭ باستاماسىمەن ۇيىمداستىرىلدى.
«JANA BELES FEST – 2024» فەستيۆالى ەلوردالىق ەڭ جىگەرلى ءارى شىعارماشىل جاستاردىڭ باسىن قوساتىن, سونداي-اق ستۋدەنتتەر اسىعا كۇتەتىن ءىس-شارالاردىڭ ءبىرى. فەستيۆالدىڭ ماقساتى – استانا قالاسىنىڭ جاستارى اراسىندا مادەنيەت پەن ونەردى دامىتۋ, كوشباسشىلىق داعدىلاردى دامىتۋ, ستۋدەنتتەر اراسىنداعى دوستىق قارىم-قاتىناستى نىعايتۋ, تالانتتى ستۋدەنتتەردى انىقتاۋ جانە جان-جاقتى قولداۋ.
– فەستيۆال بىرنەشە نوميناتسيالاردى قامتيدى. ونىڭ ىشىندە «ۆوكال», «ۇلتتىق بي», «زاماناۋي بي», «ۇلتتىق اسپاپتار», «ۇزدىك جانكۇيەرلەر» اتالىمدارى بار. ءىس-شارا العاش رەت 2019 جىلى ۇيىمداستىرىلدى. بيىل وعان 35 كوللەدج ستۋدەنتتەرى قاتىسادى, – دەپ اتاپ ءوتتى «استانا جاستارى» جاستار رەسۋرستىق ورتالىعىنىڭ ءبولىم باسشىسى ارايلىم ساپارالى.
جوبانىڭ العاشقى كۇنىندە «ۆوكال» نوميناتسياسىنىڭ قاتىسۋشىسى نارگيزا ماليكوۆا «قازاق ەلى وسىنداي» پاتريوتتىق ءانىن ورىندادى. ءسوز بارىسىندا قاتىسۋشى بەلگىلى ءانشى مارجان اراپباەۆانىڭ جانكۇيەرى, ونىڭ ۆوكالدىق شەبەرلىگىنە عانا ەمەس, شىعارماشىلىعىنا دا ءتانتى ەكەنىن ايتتى.
– مەن «سەرۆيس جانە تۋريزم» كوللەدجىنىڭ ستۋدەنتىمىن. ءتۇرلى بايقاۋلارعا قاتىسسام دا, بۇل فەستيۆالدە ءبىرىنشى رەت باق سىناپ وتىرمىن. ماماندىعىم – اسپازشى, بىراق بالا كەزدەن ءان ايتۋعا قىزىعامىن. فەستيۆال – جاستار ءۇشىن مۇمكىندىك الاڭى, ستۋدەنتتەر قابىلەتتەرىن كورسەتىپ, ءوز ونەرىن ورتاعا سالادى, – دەپ ءبولىستى ستۋدەنت.
جوبانىڭ جابىلۋ جانە ماراپاتتاۋ ءراسىمى 29 ساۋىردە بەيبىتشىلىك جانە كەلىسىم سارايىندا وتەدى. ونىڭ بارىسىندا «ەڭ ۇزدىك كوللەدج» نوميناتسياسىنىڭ جەڭىمپازى انىقتالادى.
