استانا قالاسى ءبىلىم باسقارماسىنىڭ ۇيىمداستىرۋىمەن وتكەن XVII «شاتتىق – 2024» بالالار مەن جاسوسپىرىمدەر اراسىنداعى قالالىق اشىق شىعارماشىلىق بايقاۋى قورىتىندىلاندى.
ماحامبەت وتەمىسۇلى اتىنداعى وقۋشىلار سارايىنىڭ ساحناسىندا شىعارماشىلىق بايقاۋدىڭ بارلىق جانرلارى بويىنشا التىن ستاتۋەتكا, ديپلوم تاپسىرىلىپ, سەرتيفيكات يەلەرىن سالتاناتتى تۇردە ماراپاتتاۋ ءراسىمى ءوتتى. سالتاناتتى ءىس-شاراعا 103 ءبىلىم بەرۋ مەكەمەسى قاتىستى. ۇزدىكتەر اتاعىن 7 مىڭنان استام قاتىسۋشى قورعادى. 71 التىن ستاتۋەتكا, 93 كۇمىس ستاتۋەتكا, 116 قولا ستاتۋەتكا, 378 ديپلوم, 360 سەرتيفيكات بالالار مەن ۇجىمدار اراسىندا تارتىسقا ءتۇسىپ, 600-دەن استام پەداگوگ سەرتيفيكات الدى.
ەلوردادا جىل سايىن بەلسەندى, شىعارماشىل, كرەاتيۆتى, دارىندى بالالارىمىزدىڭ سانى كوبەيىپ كەلەدى, بيىلعى جىلى 3000-نان استام قاتىسۋشى جۇلدەلى ورىندارمەن ماراپاتتالدى.
XVII «شاتتىق-2024» بالالار مەن جاسوسپىرىمدەر اراسىنداعى قالالىق اشىق شىعارماشىلىق بايقاۋىنىڭ گالا-كونتسەرتى 2024 جىلدىڭ 26 ساۋىرىندە بەيبىتشىلىك جانە كەلىسىم سارايىندا وتەدى. «جولىمىز ءبىر» كونتسەرت-مانيفەسىنىڭ نەگىزگى باعىتىنىڭ ءبىرى – يدەولوگيالىق جۇمىس. كونتسەرتتەگى مادەني باعدارلامانىڭ باستى قۇندىلىقتارى پرەزيدەنتىمىزدىڭ ۇلتتىق قۇرىلتايدا العا قويعان تاپسىرمالارى – تاۋەلسىزدىك پەن پاتريوتتىق, بىرلىك پەن ىنتىماق, ادىلدىك پەن جاۋاپكەرشىلىك, زاڭدىلىق پەن ءتارتىپ, ەڭبەك پەن كاسىبيلىك, شىعارماشىلىق پەن جاڭاشىلدىققا ۇندەس كەلەتىندىگىن ايتۋ قاجەت. بۇل رەتتە بايقاۋدا جۇلدىزى جانىپ, قۋانعان شىعارماشىل بالالاردىڭ شاتتىعى تالاي جۇرەككە وت بەرىپ, بولاشاعىنا شامشىراق بولىپ جاعىلارى ءسوزسىز.
