ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ «حالىق ءانى» ءبولىمى قاز كسر حالىق ءارتىسى, قاز كسر مەملەكەتتىك سىيلىعىنىڭ لاۋرەاتى جۇسىپبەك ەلەبەكوۆتىڭ 120 جىلدىعىنا ارنالعان «ءان ەركەسى» كونتسەرتىن ۇسىندى.
قازاق ءان ونەرىنىڭ ورلەۋىنە, سونىڭ ىشىندە حالىق اندەرى مەن حالىق كومپوزيتورلارى اندەرىنىڭ ساقتالىپ, زاماننان زامانعا جەتۋىنە جۇسىپبەك ەلەبەكوۆتىڭ قوسقان ۇلەسى ۇشان-تەڭىز. ءان الىپپەسىن اكەسىنىڭ ءىنىسى جاقىپبەك بالعابايۇلىنان ۇيرەنىپ, كەيىننەن امىرە قاشاۋباەۆ, عابباس ايتباەۆ, قالي بايجانوۆ سالعان اندەردى تىڭداپ, ونەرىن شىڭدادى. بوزبالا شاعىندا سەمەيدەگى «ەس-ايماق» ۇيىرمەسىندە ءان سالىپ, وسى ترۋپپانىڭ كونتسەرتتەرى مەن سپەكتاكلدەرىنە قاتىسۋدان ونەر جولىن باستاعان ءانشى قازاق مەملەكەتتىك دراما تەاترىندا, قازاق مەملەكەتتىك فيلارمونياسىندا, «قازاقكونتسەرت» بىرلەستىگىندە قىزمەت ىستەدى. اباي اتىنداعى وپەرا جانە بالەت تەاترىنىڭ «قىز جىبەك», «ايمان-شولپان» سپەكتاكلدەرىندە وپەرالىق پارتيالاردى ورىندادى. ەكىنشى دۇنيەجۇزىلىك سوعىس جىلدارى كونتسەرتتىك بريگادانىڭ قۇرامىندا مايدان دالاسىن ارالاپ, جاۋىنگەرلەردىڭ رۋحىن كوتەردى. 1967 جىلدان 10 جىلداي قازىر كوللەدجگە اينالىپ, ءوزىنىڭ اتىمەن اتالاتىن ەسترادا-تسيرك ستۋدياسىندا شاكىرت تاربيەلەدى.
مادەنيەت ەشەكەەۆ, جانىبەك كارمەنوۆ, قايرات بايبوسىنوۆ, كەنجەعالى تاشكەنوۆ, مۇراتبەك جۇنىسبەكوۆ, ساناق ابەۋوۆ, تۇرسىنعازى راحيموۆ, كەلدەنباي ولمەسەكوۆ, جۇمابەك قامباروۆ, امانگەلدى جىكەنوۆ, عالىم مۇحامەدين – بۇل جۇسىپبەك ەلەبەكوۆتىڭ ءبىر توپ شاكىرتتەرى, ۇستاز ءىسىن جالعاستىرۋشىلار. جۇسىپبەك ەلەبەكوۆ قازاق اندەرىنىڭ ىشىندەگى تالاي جاۋھار تۋىندىلاردى شاكىرتتەرىنە ۇيرەتىپ, ءان كوشى زاماننان زامانعا جەتىپ وتىر.
جۇسىپبەك ەلەبەكوۆ «ەس-ايماقتا» ۇلى ابايدىڭ اۋزىنان اندەرىن الىپ قالعان الماعامبەت انشىدەن اباي اندەرىن ۇيرەندى. رەپەرتۋارىندا حالىق اندەرى, ءبىرجان سال, اقان سەرى, بالۋان شولاق, ءمادي ءباپيۇلى, ەستاي بەركىمبايۇلى, جاياۋ مۇسا, ءيمانجۇسىپ قۇتپانۇلى, باسقا دا حالىق كومپوزيتورلارىنىڭ اندەرى بولدى.
كونتسەرتتە سول اندەردىڭ ءبىرازىن كورەرمەندەر قازاقستاننىڭ ەڭبەك سىڭىرگەن قايراتكەرى گۇلميرا سارينا, مادەنيەت سالاسىنىڭ ۇزدىكتەرى نۇراي تاناباەۆ, بەرىك وماروۆ, تەلمان نۇركەنوۆ, دانيار مۇقان, ايگەرىم نارتۇيە, حالىقارالىق جانە رەسپۋبليكالىق بايقاۋلاردىڭ لاۋرەاتتارى وزگەرىس شەرىكباي, جاقسىكەلدى ماياساروۆ, نۇرجان مەيىرحان, راحات بەگاسىلوۆ, الۋا قالىمبەكوۆا, ايدوس وڭعارباي سىندى انشىلەردىڭ ورىنداۋىندا تىڭدادى. كونتسەرت بارىسىندا «قورقىت» ەتنوانسامبلى ونەر كورسەتتى.
