ساناۋلى كۇندەردەن كەيىن, التىن ۇيا – مەكتەبىمىزبەن قوشتاسامىز. ۇلكەن ومىرگە قادام باسامىز. مەن جۋرناليست ماماندىعىن تاڭداپ قويدىم. وسى ءبىر قيىن دا قىزىقتى مامان يەسى اتانعىم كەلەدى, وعان سەنىمىم زور.
قوشتاسۋدىڭ ساعاتىن بولدىرماي, ءالى مەكتەپ وقۋشىسى بولىپ جۇرە بەرەر مە ەدىم؟ سەبەبى مەكتەپتەگى كۇندەرىم – مەنىڭ ومىرىمدە ۇلكەن ورنى بار. تۇلعالىق دامۋدىڭ مەكەنى دەسەم, ارتىق ايتقانىم ەمەس. جان-جاقتى بولۋعا, وتانسۇيگىشتىككە تاربيەلەگەن, سونىمەن قاتار ءوز ىسىڭە, اينالاڭا ادالدىقتى ۇيرەتكەن – ەكىنشى ءۇيىم.
ال ەندى مەنى الدا جاڭا اسۋلار مەن كوكەيىمدى تەسىپ, ورىندالۋعا اسىعىپ تۇرعان ارماندارىم تۇر. قازاعىمىز «ارمانسىز ادام – ورمانسىز بۇلبۇل» دەپ بەكەر ايتپاعان. راسىندا دا ادام بالاسىنىڭ ارمانى كوپ بولادى ەمەس پە؟ كىشكەنتاي بالا ويىنشىق نەمەسە ءتاتتى كامپيتتى ارمانداسا, جاسى كەلگەن قاريا بالالارى مەن نەمەرەلەرىنىڭ ساۋلىعىن تىلەيدى.
ارمان ول ءبىزدى دامىتۋشى, جەتەر جولعا باعىتتاۋشى سەكىلدى. كوزدەگەنىمىزگە جەتپەگەنشە ول ءبىزدىڭ ويىمىزدان كەتپەيدى. سايكەسىنشە مەنىڭ دە جۇرەكجاردى ارماندارىم بار. ءوز ارمانىم جايلى ايتاتىن بولسام, مەن ءوزىمنىڭ بالا كۇنىمنەن ارمانداپ كەلە جاتقان «جۋرناليست» ماماندىعى بويىنشا ءدارىس الىپ, ەلىمنىڭ قالاۋلى, ابىرويلى جانە ەڭ باستىسى, دارا جولدى جۋرناليست بولعىم كەلەدى. شىنايى بولىپ, وزەكتى اقپاراتتارمەن ءبولىسىپ, ارتىمداعى ءىنى-سىڭلىلەرىمە ۇلگى بولعىم كەلەدى. جاستاردىڭ ءتىل تازالىعىنا اسا قاتتى ءمان بەرىپ, ولاردى ەل جاناشىرى بولۋعا تارتۋ ەڭ باستى – ماقساتىم. وسىنداي ارمانداردىڭ پايدا بولۋىنا, ءبىزدىڭ تەرەڭ تاريحىمىزبەن, الاش قايراتكەرى ءاليحان بوكەيحاننىڭ «ءتىرى بولسام قازاققا قىزمەت قىلماي قويمايمىن!» دەگەن قاناتتى ءسوزى ىقپال ەتكەندەي. اتا-بابامىز, ءبىزدىڭ كوك اسپان استىندا, تاۋەلسىز حالىق بولىپ ءومىر ءسۇرۋىمىز ءۇشىن ومىرلەرىن قۇربان ەتۋگە دايىن بولدى. ال مىنا بىزدەر, ارتىمىزدان كەلە جاتقان, كەلەشەك ۇرپاققا قانداي مۇرا قالدىرا الامىز؟ ءوزىمىز كورىپ جۇرگەندەي, ماتەريالدى قۇندىلىقتاردى ءبىرىنشى ورىنعا قويىپ, ادامگەرشىلىكتى, ادالدىقتى ۇمىتىپ بارا جاتقان ادام قانشاما؟! ءدال وسى سەبەپپەن مەن ادامي قۇندىلىققا باعىتتالعان, دامۋ ۇردىسىمەن جۇرەتىن جانە وزدەرىنىڭ اتا-تەگىن, تاريحىن ايقىن بىلەتىن ۇرپاقتاردى ارماندايمىن. ارمانداپ قانا قويماي, سول جولدا ەلىمە قىزمەت ەتۋگە دايىنمىن!
الۋا اشىربەكوۆا, استانا قالاسى ا.بوكەيحان اتىنداعى №76 مەكتەپ-
ليتسەي تۇلەگى
