قازاقستاندا تۋىپ, ءومىر ءسۇرىپ, مەملەكەتتىك ءتىلدى بىلمەۋ – سول ەلگە قۇرمەت كورسەتپەۋ. استاناداعى №9 ەمحانادا گينەكولوگ بولىپ ەڭبەك ەتەتىن ۋكراين ۇلتىنىڭ وكىلى كسەنيا گۋرينا وسىلاي دەپ سانايدى. ءوزى ارقالىقتا دۇنيەگە كەلگەن ول بالا كەزدەن قازاق ءتىلىن جەتىك ءبىلىپ وسكەن. سونىڭ ارقاسىندا ول قازىر كەز كەلگەن ناۋقاسقا ەكى تىلدە دە قىزمەت كورسەتە بەرەدى.
29 جاستاعى جاس دارىگەر قازاقشا انىق, قاتەسىز سويلەيدى. وسى رەتتە ول اۋىلىندا قازاق تىلىنەن ساباق بەرگەن ايزادا اپايىنا تالاپشىلدىعى ءۇشىن العىس بىلدىرەدى. قازىر الدىنا كەلگەن كەيبىر ايەلدەر ويىن ورىسشا جەتكىزە الماي جاتسا, مەملەكەتتىك تىلدە سويلەسىپ كەتەدى.
– قازاقشا ءتىل ءبىلۋىم ورتاشا دەڭگەيدە. كوپ ادامداردى, ارينە, تاڭعالدىرادى. بىراق وعان تاڭعالاتىن ەشتەڭەسى جوق دەپ سانايمىن. سەبەبى قازاقستاندا تۋىپ, وسكەن سوڭ مەملەكەتتىك ءتىلدى ءبىلۋ – ءاربىر ازاماتتىڭ مىندەتى. سويلەگەندە قاتەم بولسا, ايتۋىن سۇرايمىن اينالامنان. ۇيرەنۋدەن ەش قىمسىنبايمىن. 2013 جىلدان بەرى استانادامىن. سول جىلى مەديتسينا ۋنيۆەرسيتەتىنە وقۋعا ءتۇسىپ, 2020 جىلى ءبىتىردىم. مەكتەپتە بيولوگيا, حيميا پاندەرىن جاقسى كورەتىنمىن جانە دارىگەر بولۋدى ارماندادىم. سول ارمانىما قول جەتكىزىپ, ەلوردادا №2 ەمحانادا ەڭبەك جولىمدى باستادىم. 2022 جىلدان باستاپ وسى ەمحانادامىن. جۇمىسىم وزىمە ۇنايدى. مەندە تىركەۋدە 160-تان اسا جۇكتى ايەل بار. ءبىر كۇندە ورتاشا ەسەپپەن 25-30 ايەل, كەيدە 40 ادامعا دەيىن قارالۋعا كەلەدى, – دەيدى گينەكولوگ دارىگەر.
جىل سايىن ادامدار دارىگەرلەردىڭ شاقىرتۋىمەن ەمحانالاردا سكرينينگتەردەن وتەدى. مەديتسينا قارىشتاپ دامىپ, ءبىر ورنىندا تۇرمايدى. «بولاشاقتا كوپتەگەن اۋرۋلاردى جەڭەمىز! حالقىمىزدىڭ سالاۋاتتى, دەنى ساۋ بولۋى ءۇشىن دەنساۋلىق ساقتاۋ سالاسىمەن بىرگە ادامداردىڭ ءوزىنىڭ دە وي-ساناسى دامىپ, ءوز دەنساۋلىعىنا جاۋاپتى بولۋ دەڭگەيى دە ارتۋى كەرەك. اتاپ ايتقاندا, دۇرىس تاماقتانۋ, سپورتپەن اينالىسۋ, مەديتسينالىق تەكسەرۋدەن ۋاقىتىندا ءجيى ءوتىپ وتىرۋ – كوپتەگەن اۋرۋلاردىڭ الدىن الىپ, ادام ءومىرىن ۇزارتادى. ءبىز ءوز ۇرپاقتارىمىزعا وسىنداي ساۋاتتى ارەكەتتەرىمىزبەن ۇلگى بولساق» دەيدى دارىگەر.
