قازاقستاندىق ءانشى Adam-نىڭ «جۇرەك» اتتى ءانى الەمگە تانىلدى. بۇل ءان الەۋمەتتىك جەلىدە 5 ملرد رەت تىڭدالسا, بەينەبايانى 55 ميلليوننان استام قارالىم جيناعان. ءتۇرلى الەۋمەتتىك جەلىدە نەشە ون مىڭ قولدانۋشى «جۇرەك» ءانىن پايدالانىپ, قىسقا بەينەباياندار تۇسىرگەن. وسىلايشا «جۇرەك» ءانى Shazam الەمدىك رەيتينگىسىندە 13-ورىنعا شىقتى. قىتايداعى حيد-پارادتا بۇل ءان ءۇشىنشى ورىنعا كوتەرىلگەن. ادام ەڭ كوپ تىركەلگەن TikTok پلاتفورماسىندا «جۇرەك» جارىپ تۇر.
از ۋاقىتتا حيت بولعان ءاندى ازيا, ەۆروپا, ءتىپتى وڭتۇستىك امەريكا قۇرلىعىنداعى قىتاي, كورەيا, ۆەتنام, ماروككو, البانيا, گەرمانيا, ۋكراينا, ارمەنيا, فرانتسيا… سياقتى ەلدەردىڭ تىڭدارماندارى تۇشىنىپ تىڭداۋدا. قازاق ۇلتىن قويىپ, قازاقستان دەگەن مەملەكەت بارىن جاقسى بىلمەيتىن حالىقتار دا «ول مەن ەمەس» دەپ انگە باسىپ, قازاق ءانىن قور, وزگە ۇلتتىڭ ءانىن زور سانايتىن قازاقستاندىقتاردىڭ ءوزىن ۇيالتىپ جاتىر.
Adam ەسىمىمەن تانىمال فارۋح توحتامۋراتوۆ – جامبىل وبلىسى مەركى اۋىلىنىڭ تۋماسى. ءانشىنىڭ ايتۋىنشا, ستۋدەنت كەزىندە الماتىنىڭ ءارتۇرلى مەيرامحانالارىندا ءان ايتىپ ناپاقا تاپقانى بولماسا, مۋزىكامەن كاسىبي تۇردە اينالىسپاعان. تەك 2019 جىلدان باستاپ ول ونەر جولىنا بەت بۇرىپ, ورىس تىلىندە اندەر شىعارعان. بىراق ونىڭ ەشبىرى حيتكە اينالماعان, قيىندىقتاردان شارشاعان ول ءتىپتى كەيدە مۋزىكانى مۇلدە تاستاسام با دەگەن ويعا دا كەلگەن.
ءانشى تۋىندىسىنىڭ مۇنداي فەنومەنگە اينالعانىنا ءوزى دە تاڭقالعانىن ءجيى ايتىپ ءجۇر. «مۇمكىن, جۇرەكتەن شىققان ءان ميلليونداردىڭ جۇرەگىنە جول تاپقان شىعار. مۇندا ەرەكشە ەشتەڭە جوق. باستىسى, شىنايى نيەتتەن تۋعان. ءان قازاقستاندا تانىمال بولسا بولار, بىراق الەمدىك دەڭگەيدە تانىلادى دەپ ويلاعامىز جوق. بىراق, بۇل ترەكتىڭ world shazam-عا, الەمدىك چارتتارعا تۇسكەنى ۇلكەن توسىنسىي بولدى» دەيدى ول.
ول ءوزىن قايتپاس قايسار جان دەپ ەسەپتەيدى. حيت اندەردىڭ شىعۋىنا وسى قاسيەتى كومەكتەسكەنىنە سەنىمدى. «مەن قازاقستاندا دۇنيەگە كەلگەن ەتنيكالىق وزبەك جىگىتىمىن. اكە-شەشەم دە, اتالارىم دا وسىندا تۋعان. سوندىقتان ءبىزدى قازاق دەپ سانايتىندار كوپ, ءوزىمىز دە قازاق بولىپ كەتتىك. مەنىڭ بويىمدا ەكى ادام ءومىر سۇرەدى. بىرەۋى – فارۋح, ەكىنشىسى – Adam. فارۋح Adam-عا ءان جازادى, ونى العا سۇيرەيدى» دەيدى ءانشى.
«جۇرەك» قازىر اعىلشىن تىلىنە اۋدارىلىپ, الەمدىك ساحنالاردا ايتىلا باستادى. ءان اۆتورى Adam دا الداعى ۋاقىتتا ەۋروپا مەن ازياعا گاسترولدىك ساپارعا اتتانباق. بۇل – ونىڭ ەۋروپاعا تۇڭعىش گاسترولدىك ساپارى. ەندى ءانشى گاننوۆەر, دۋبلين, مادريد, بارسەلونا قالالارىندا ءان شىرقايدى. الەۋمەتتىك جەلىدەگى دەرەك بويىنشا, ءانشىنىڭ حيت ءانى ەۆروپا+ چارتىنا قوسىلعان, وسىلايشا 67 ەلدە قازاقتىڭ «جۇرەك» ءانى شىرقالۋدا.
جالعىز «جۇرەك» قانا ەمەس, قازاقتىڭ باسقا اندەرى دە الەۋمەتتىك جەلىدە ءجيى ايتىلاتىن اندەر قاتارىنان كورىنىپ ءجۇر. ديماش قۇدايبەرگەن الەمدىك ساحنالاردا ءان سالعاننان كەيىن, وزگە ۇلت تىلىنە اۋدارىلىپ, شىرقالىپ جۇرگەن قازاق اندەرى دە از ەمەس. بۇرىن بۇل قاتاردا «دۋدار-اي», «قايران جالعان», «قارلىعاش», «جەلسىز تۇندە جارىق اي» اندەرى اتالسا, ديماشتىڭ ورىنداۋىنان كەيىن «ءدايديداۋ» بۇكىل الەمگە تانىمال انگە اينالدى. ىرگەمىزدەگى كورشى ەل قىتايدا ديماشتىڭ ونەرىنە ءتانتى بولعان جانكۇيەرلەرىنىڭ اراسىندا قازاق ءتىلىن ۇيرەنىپ, قازاق اندەرىن ايتاتىن جاستار كوبەيدى. سونىڭ ءبىرى – 宅叔五毛 ء(وز اتى تيان لۋۆان). ونىڭ رەپەرتۋارىندا قازاقشا ورىنداعان قازاق تىلىندەگى اندەردىڭ سانى 20-عا جۋىقتادى. «وي, جەڭگەم», «سەن ماعان ماسسىڭ» سياقتى اندەرىن قىتاي تىڭدارماندارىنا وسى جىگىت تانىمال ەتتى. ال قىتايدىڭ تيبەت وڭىرىندەگى تويلار «مۇزارت» توبىنىڭ «فاريدا» ءانىسىز وتپەيتىنىنە دە ءبىراز ۋاقىت بولدى. «سەن ماعان ماسسىڭ» دەمەكشى, راحىمجان جاقايىمنىڭ «سەن ماعان ماسسىڭ» ءانى مەن قازاقستاندىق دۋەت Tanir مەن Tyomcha «Da Da Da» ترەگى دە ازيا اۋماعىندا حيتكە اينالعان.
حالقىمىزدا مازمۇن, مانەرى, دىبىستىق بوياۋى جاعىنان «جۇرەك»-ءتى جەتى ورايتىن اندەر بارشىلىق. بىراق سونىڭ كوبىنىڭ ءالى باعى اشىلماي جاتىر.
