استانادا «تازا قازاقستان» ەكواكتسياسى اياسىندا «شاراپات» الەۋمەتتىك قىزمەت كورسەتۋ ورتالىعى اۋماعىنا اعاش وتىرعىزىلدى, دەپ حابارلايدى astana-akshamy.kz
يگى شاراعا قالالىق ءماسليحات دەپۋتاتتارى, سارىارقا اۋدانى اكىمىنىڭ اپپاراتى, قالالىق باسقارما وكىلدەرى مەن ەرىكتىلەر قاتىستى.
ورتالىق اۋماعىنا قىلقان جاپىراقتى, قايىڭ, قاراعاي سياقتى 50-دەن استام اعاش وتىرعىزىلدى.
ءماسليحات دەپۋتاتى ەرلان داكەنوۆ كوگالداندىرۋ جۇمىسىنا قاتىسىپ, ەكواكتسياعا بەلسەندى اتسالىسۋ ءارىبىر ازاماتتىڭ پارىزى ەكەنىن اتاپ ءوتتى.
«بۇگىن ءماسليحات دەپۋتاتتارى «شاراپات» الەۋمەتتىك ورتالىعىنا كەلىپ, ءوزىمىزدىڭ ۇلەسىمىزدى قوسىپ جاتىرمىز. بۇل ءبىرىنشى رەت ەمەس, ياعني ءساۋىر ايى باستالعالى قالامىزدىڭ بىرنەشە ايماعىندا تال ەكتىك. جاسىل جەلەك قالامىزدىڭ كوركەيۋى ءۇشىن كەرەك دەپ ويلايمىن. سوندىقتان دا وسىنداي كوگالدانداندىرۋ جۇمىسىنا بەلسەندى اتسالىسۋ كەرەك»,- دەدى ەرلان داكەنوۆ.
الەۋمەتتىك قىزمەت كورسەتۋ ورتالىعىنىڭ ديرەكتورى ارداق سەيىتوۆانىڭ سوزىنشە, بۇعان دەيىن ورتالىق اۋماعىنا 500 ءتۇپ اعاش وتىرعىزىلعان.
ورتالىق اۋماعىندا وزدەرىڭىز كورىپ تۇرعانداي «ارداگەرلەر» اللەياسى بار. جالپى بىزدە سەنبىلىكتەر ءجيى ءوتىپ تۇرادى. ورتالىقتىڭ قىزمەت الۋشىلاردىڭ باسىم كوپشىلىگى قارتتار بولعاندىقتان, قالاداعى بارلىق مەكەمە قىزمەتكەرلەرى كومەكتەسىپ تۇرادى», – دەدى ورتالىق ديرەكتورى.
سونداي-اق, الەۋمەتتىك ورتالىقتا جەڭىس كۇنى قارساڭىندا اۋداننىڭ مادەني مەكەمەلەرى ۇيىمداستىرعان مەرەكەلىك كونتسەرت ءوتتى.
وسى اپتا «ونەگەلى ۇرپاق» دەپ اتالادى جانە ارداگەرلەر اۋلالارى مەن قارتتار ۇيلەرىنىڭ اۋماقتارىن تازالاۋعا جانە اباتتاندىرۋعا ارنالعان.
اۋقىمدى ەكواكتسيا اياسىندا قالانى سانيتارلىق تازارتۋ, نوسەر جانە ارىق كارىز جەلىلەرى, كوشەلەردى, تروتۋارلاردى, كۆارتالىشىلىك اۋماقتاردى, قوعامدىق كەڭىستىكتەر مەن اۋلالاردى تازالاۋ جۇمىستارى جۇرگىزىلىپ جاتىر.
سونداي-اق, جاسىل جەلەكتەردى كۇتىپ-باپتاۋ جانە وتىرعىزۋ, ساۋدا وبەكتىلەرىنە ىرگەلەس اۋماقتاردى جيناۋ, كوگالدار مەن گۇلزارلاردى ورناتۋ, رۇقسات ەتىلمەگەن پوليگونداردى جويۋ جانە ت.ب. جۇمىستار جۇرگىزىلۋدە.
