ۇلتتىق مۋزەيدىڭ 10 جىلدىعىنا ارنالعان «جۇلدىزدى گيد» شوۋ-جوباسىنا كورنەكتى كومپوزيتور, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى, استانا قالاسىنىڭ قۇرمەتتى ازاماتى تولەگەن مۇحامەدجانوۆ پەن قازاقستاننىڭ جانە تاتارستاننىڭ حالىق ءارتىسى, مەملەكەتتىك سىيلىقتىڭ لاۋرەاتى نۇرجامال ۇسەنباەۆا قاتىسىپ, مۋزەي قوناقتارىنا «استانا» زالى بويىنشا ەكسكۋرسيا جۇرگىزدى.
ىلگەرى «ۇلتتىق مۋزەيگە سىي تارتۋ» اكتسياسى اياسىندا تولەگەن مۇحامەدجانۇلى مەن نۇرجامال پەرنەبەكقىزى جوعارى دارەجەلى مەملەكەتتىك ماراپاتتارى مەن قۇجاتتارىن, ساحنالىق كيىمدەرىن تاپسىرعان ەدى. وسى جادىگەرلەر جۇرتشىلىق نازارىنا ۇسىنىلدى. «استانا» زالىندا «جۇلدىزدى گيدتەر» تاۋەلسىز قازاقستان استاناسىنىڭ قۇرىلۋى, قالىپتاسۋى مەن دامۋ تاريحىن بەينەلەيتىن ماڭىزدى نورماتيۆتىك-قۇقىقتىق اكتىلەر, جادىگەرلەر, فوتوقۇجات ماتەريالدارىنىڭ جيناعى تۋرالى ايتىپ بەردى. ەركە ەسىل جاعاسىنا ەلوردانىڭ ورنىعۋىنا تولەگەن مۇحمەدجانوۆ ۇلكەن ۇلەس قوسقانىن اتاپ ءوتۋ كەرەك. سەبەبى ول 1998-2004 جىلدارى استانا قالاسى اكىمىنىڭ ورىنباسارى بولدى.
ءىس-شارا شاعىن شىعارماشىلىق كونتسەرتكە ۇلاسىپ, ەرلى-زايىپتى ونەرپازدار حالىققا كەڭ تارالعان شىعارمالارىن ورىندادى. تولەگەن مۇحامەدجانوۆتىڭ تۋىندىلارى بويىنشا تاپقىرلىق كورسەتكەن كورەرمەندەرگە كومپوزيتوردىڭ شىعارمالار جيناقتارى مەن ديسكىلەرى سىيعا تارتىلدى.
