«اتىس قارۋى: تاپانشا تاريحى» كورمەسى اشىلدى

پرەزيدەنتتىك ورتالىقتىڭ مۋزەي قورىنداعى بىرەگەي قارۋ-جاراق توپتاماسىنىڭ نەگىزىندە جاسالعان بۇل كورمە قر قارۋلى كۇشتەرىنىڭ تاريحىنا, ەكىنشى دۇنيەجۇزى سوعىسىندا ەرلىك كورسەتكەن حالىق قاھارماندارى — ساعادات نۇرماعامبەتوۆ پەن راقىمجان قوشقارباەۆتىڭ 100 جىلدىعىنا ارنالعان.

قر پرەزيدەنتتىك ورتالىعىنىڭ ەكسكۋرسيا جۇمىسى قىزمەتىنىڭ باسشىسى گۇلىم ىدىرىسوۆانىڭ ايتۋىنشا, ينجەنەرلىك ويدىڭ, عىلىم مەن تەحنيكانىڭ دامۋى قارۋدىڭ جاڭا تۇرلەرى — اتىس قارۋىن جاساۋعا ىقپال ەتتى.

بۇل جادىگەرلەر — تاۋەلسىزدىك جىلدارى ەل پرەزيدەنتىنە كەلىپ تۇسكەن ديپلوماتيالىق تارتۋلار. اسىرەسە, رەسەي, اقش, فرانتسيا, شۆەيتساريا مەملەكەتىنەن كەلگەن دەلەگاتسيا وكىلدەرىنىڭ سىيى كوپ. كەيبىر تاپانشالار ەكسكليۋزيۆتى ارنايى تاپسىرىسپەن جاسالعان, وعان قوسا كوشىرمە نۇسقالار دا بار.

«بۇگىنگى كورمەگە مۋزەي قورىنان 100-گە جۋىق ەكسپونات شىعارىلدى. سونىڭ ىشىندە 29 تاپانشا بار. وندا كەلۋشىلەر تاپانشالاردىڭ ادامزات تاريحىنداعى جاسالۋ كەزەڭىنەن باستاپ, قازىرگى زامانعا دەيىنگى ۇلگىلەرىن كورە الادى. مۋزەي قورىنان ارنايى العاش رەت شىعىپ وتىرعان تاپانشالار اراسىندا بۋندەل رەۆولۆەرى, لەفوشە رەۆولۆەرى جانە دۋەل تاپانشالارى سەكىلدى انتيكۆارلىق ۇلگىلەر دە بار. اتىس قارۋىمەن قاتار, مۋزەي قورىنداعى سۋىق قارۋ توپتاماسىنان دا بىرقاتار جادىگەر قويىلعان. ولاردىڭ بارلىعىن كەزىندە مەملەكەتىمىزگە كەلگەن شەتەلدىك دەلەگاتسيا وكىلدەرى تارتۋ ەتكەن. بۇل سىيلىقتار مۋزەي قورىنا ءتۇسىپ, جۇيەلى تۇردە زەرتتەلگەن سوڭ عانا كورەرمەن نازارىنا ۇسىنىلادى», — دەدى گ. ىدىرىسوۆا.

ەكسپوزيتسيا لەفوشە, كولت, براۋنينگ, فەدەرلە, ستەچكين جانە باسقا دا كورنەكى قارۋ جاساۋشىلاردىڭ تۋىندىلارىمەن تانىسۋعا مۇمكىندىك بەرەدى. ەۋروپا, اقش, رەسەي جانە تۇركياداعى جاھاندىق قارۋ وندىرۋشىلەردىڭ تاپانشالارى مەن رەۆولۆەرلەرى قويىلعان.

سونىمەن بىرگە, كورمەدە ۇلى وتان سوعىسى جىلدارىنداعى قازاقستاندىق جاۋىنگەرلەردىڭ ەرلىكتەرى تۋرالى ماتەريالدار قويىلعان. 1992 جىلى 7 مامىردا قۇرىلعان قر قارۋلى كۇشتەرىنىڭ قالىپتاسۋى مەن دامۋ تاريحى دا ۇسىنىلعان.

كورمە 30 مامىرعا دەيىن جالعاسادى. ونى بارلىق كەلۋشىلەر تەگىن تاماشالاي الادى.