«تازا قازاقستان: استانا – تازالىق پەن ءتارتىپتىڭ ۇلگىسى» اۋقىمدى ەكولوگيالىق اكتسياسى «جاسىل ايماق» اپتالىعىنا ۇلاسىپ, كوشەت وتىرعىزىپ جانە اعاشتاردى اقتاۋدا. ەكولوگيالىق اكتسياعا 70-كە جۋىق شەتەلدىك ەلشىلىكتەر مەن حالىقارالىق ۇيىمدار قولداۋ كورسەتتى.
الماتى جانە بايقوڭىر اۋدانىنداعى دەمالىس ورىندارىنا كوشەت وتىرعىزۋعا جاپونيا, تۇركيا, پورتۋگاليا, تايلاند, يزرايل, ۆاتيكان, رەسەي, يندونەزيا, تاجىكستان, گرۋزيا, بەلارۋس, ازەربايجان, قىرعىزستان, تۇرىكمەنستان ەلشىلەرى مەن وكىلدەرى قاتىستى.
– جىل وتكەن سايىن استانا قالاسىنىڭ كوركەيىپ كەلە جاتقانىن كورىپ ءجۇرمىن. ەلوردالىقتاردىڭ تازالىققا بەي-جاي قارامايتىنى قۋانتادى. ەكولوگيالىق اكتسياعا قاتىسىپ, كوشەت وتىرعىزىپ, استانانىڭ جاسىل قالاعا اينالۋىنا ۇلەس قوستىم. ويتكەنى ءاربىر وتىرعىزىلعان اعاش – بولاشاققا سالعان ۇلەسىمىز, كەلەسى ۇرپاققا قامقورلىق, – دەدى رەسەيدىڭ قازاقستانداعى ەلشىسى الەكسەي بوروداۆكين.
اكتسياعا قاتىسۋشىلار ءوز اۋماعىن كوگالداندىرۋعا ءمان بەرىپ, بەلسەندى ەڭبەك ەتتى.
– كوڭىل-كۇيىمىز وتە كەرەمەت. مۇنداي اكتسيالاردىڭ قورشاعان ورتاعا تيگىزەتىن پايداسى كوپ. اعاش وتىرعىزۋ, ساياباقتاردى كوگالداندىرۋ جۇمىستارىن ءاردايىم قولدايمىن. ءاربىر وتىرعىزىلعان اعاش – بولاشاققا سالعان ۇلەسىمىز, كەلەسى ۇرپاققا قامقورلىق. وسى باعىتتا قازاقستاندا اۋقىمدى جۇمىستار اتقارىلىپ جاتىر. ءبىز دە ءوز تاراپىمىزدان مۇنداي ءىس-شارالاردى ۇلكەن ىقىلاسپەن قولدايمىز, – دەيدى سەنبىلىككە قاتىسقان بەلارۋس رەسپۋبليكاسىنىڭ قازاقستانداعى ەلشىلىگىنىڭ كەڭەسشى-ەلشىسى دميتري زورين.
– بايقوڭىر اۋدانى اۋماعىندا 350 ءتۇپ اعاشى وتىرعىزىلدى. مۇنىڭ قاتارىندا قايىڭ, قاراعاي, شىرشا بار. كوشەت وتىرعىزۋمەن قوسا, سۋارۋ جۇيەسىن بىرگە ورنالاستىردىق. بۇل ىسكە ەلشىلەر دە ۇلەس قوسىپ جاتقانى قۋانتادى. جالپى بايقوڭىر اۋدانىندا 44 گۇلزار مەن 1 ۇلكەن ساياباق بار, – دەدى بايقوڭىر اۋدانىنىڭ اكىمى تالعات راحمانبەردى.
اپتالىق اياسىندا جاسىل جەلەكتەردى كۇتىپ-باپتاۋ جانە كوگالداندىرۋ, ساۋدا نىساندارىنا ىرگەلەس اۋماقتاردى تازالاۋ, كوگالدار مەن گۇلزارلاردى رەتكە كەلتىرۋ, رۇقسات ەتىلمەگەن قوقىستاردى جويۋ جانە ت.ب. جۇرگىزىلىپ جاتىر.
بايقوڭىر اۋدانى اكىمدىگىنىڭ ۇيىمداستىرۋىمەن «جاسىل ايماق» اپتالىعى اياسىندا قارۋلى كۇشتەردىڭ مەملەكەتتىك اسكەري-تاريحي مۋزەيى اۋماعىندا ءارتۇرلى ەلشىلىك وكىلدەرى جاپپاي اعاش وتىرعىزدى.
