استانادا جاستاردى وتانسۇيگىشتىككە تاربيەلەۋ جانە اسكەري قىزمەتتىڭ مارتەبەسىن كوتەرۋ ماقساتىندا اسكەري-پاتريوتتىق اكتسيا ءوتتى. اكتسيا بارىسىندا ءبىر توپ استانالىق جاستاردى اسكەرگە شىعارىپ سالۋ ءراسىمى دە ۇيىمداستىرىلدى.
اسكەري-پاتريوتتىق ءىس-شاراعا قاتىسۋشىلار الدىمەن «جاستار» سارايىنىڭ الاڭىندا ۇيىمداستىرلعان اسكەري تەحنيكالاردى, ال ىشكى زالدا اسكەري كيىم-كەشەك پەن قۇرال-جابدىقتاردى تاماشالادى. قاتىسۋشىلار قاتارىندا قارۋلى كۇشتەردىڭ ارداگەرلەرى, اۋعان سوعىسى جانە اۋماقتىق قاقتىعىستار ارداگەرلەرى, سونىمەن قاتار وقۋ ورىندارىنىڭ اسكەري كافەدرا جەتەكشىلەرى, كوللەدج جانە مەكتەپ وقۋشىلارى بولدى.
قۇرمەتتى قارۋىلدىڭ ساربازدارى سالتاناتتى جاعدايدا مەملەكەتتىك تۋدى شىعارعاننان كەيىن, مەملەكەتتىك ءانۇران شىرقالدى. جيىنعا قاتىسۋشىلار ۇلى وتان سوعىسىندا قازا بولعان قازاقستاندىقتاردى ءبىر مينۋتتىق ۇنسىزدىكپەن ەسكە الدى.
اسكەري-پاتريوتتىق ءىس-شارانى استانا قالاسى اكىمدىگىنىڭ جۇمىلدىرۋ باسقارماسىنىڭ باسشىسى رۋسلان بەشەەۆ ءىس-شاراعا ارنايى شاقىرىلعان ارداگەرلەرگە العىس ءبىلدىرىپ, اسكەرگە باراتىن جاستارعا ابىرويلى قىزمەت تىلەدى.
جينالعان قاۋىم الدىندا «قارۋلى كۇشتەر ارداگەرلەرى» رەسپۋبليكالىق قوعامدىق بىرلەستىگى توراعاسىنىڭ ورىنباسارى, وتستاۆكاداعى گەنەرال-مايور مارات ناعۇمانوۆ جاستارعا ارنالعان ءسوزىن ايتتى.
بۇكىل سانالى عۇمىرىن اسكەري قىزمەتكە ارناعان, سونداي-اق اۋعانستاندا ينتەرناتسيونالدىق بورىشىن وتەگەن مارات سەرالىۇلى ايتۋلى ءىس-شارانىڭ ماڭىزى وتە جوعارى ەكەنىن, جاستارىمىزدىڭ بويىنا وتانسۇيگىشتىك قاسيەتتى ءسىڭىرۋ ءۇشىن وسىنداي ىسكەري-پاتريوتتىق اكتسيالاردى ۇيىمداستىرۋ وتە پايدالى بولاتىنىن, اعا ۇرپاقتىڭ ەرلىگى قازىرگى جاستار ۇلاعات بولىپ قالۋى كەرەك ەكەنىن اتاپ ايتتى. ال بالالىق شاعى سوعىسقا تاپ بولعان تىل ارداگەرى ەۆگەني نيكولاەۆيچ گاليۋك تە سوعىس مايدانگەرلەرىنىڭ ەرلىگى مەن تىل ەڭبەككەرلەرىنىڭ قاجىرلى جۇمىسى تۋرالى بايانداپ بەردى.
ءىس-شارا بارىسىندا ۇلى وتان سوعىسىندا قازا تاپقان مايدانگەردىڭ ابدىكەرىم ومىرزاقوۆتىڭ جاتقان جەرىنەن اكەلىنگەن ءبىر ۋىس توپىراق پەن قايتىس بولعاننان كەيىن بەرىلگەن «ەرلىگى ءۇشىن» مەدالى مايدانگەردىڭ باۋىرىنىڭ نەمەرەسى رابيعا ماۋلەنوۆاعا سالتاناتتى جاعدايدا تابىس ەتىلدى.
ءىس-شارا بارىسىندا كورەرمەن نازارىنا بيىل 100 جىلدىعى اتالىپ ءوتىپ جاتقان ساعادات نۇرماعامبەتوۆ, راقىمجان قوشقارباەۆ, المۇقان سەمبينوۆ سەكىلدى باتىرلار تۋرالى كورسەتىلىمدەر ۇسىنىلدى.
جيىنعا قاتىسۋشىلار جاقىندا اسكەرگە اتتاناتىن جاستارعا ءساتتى ساپار, ابىرويلى قىزمەت اتقارۋدى تىلەدى. اسكەري-پاتريوتتىق اكتسيا ساربازداردىڭ قويان-قولتىق ۇرىس, قارۋ-جاراقتى قولدانۋ ونەرلەرىن كورسەتۋىمەن, اسكەري-پاتريوتتىق اندەرمەن تۇيىندەلدى.
