كۇنى كەشە وتكەن كەزەكتى قۇرىلتاي تاۋەلسىز مەملەكەتىمىزدىڭ بولاشاعىن ايقىنداپ قانا قويماي, ساياسي جاڭعىرۋ جوسپارىنىڭ رەت-رەتىمەن جۇزەگە اسىپ جاتقانىن, جاڭا رەفورما باعدارىنىڭ وزگەرمەگەنىن كورسەتتى. راسىن ايتۋ كەرەك, قازاقستان وسىدان ەكى-ءۇش جىل بۇرىنعى قالپىنان الدەقايدا وزگەردى. بۇعان ىنتىماق پەن بىرلىكتىڭ, حالىق پەن بيلىكتىڭ اراسىن بايلانىستىراتىن التىن كوپىردى بۇزباي, سىندارلى قوعامدىق ديالوگتىڭ ارقاسىندا قول جەتكىزدىك.
قۇرىلتايدا مەملەكەت باسشىسى اسىرەسە زيالى قاۋىم الدىنا ۇلكەن مىندەت جۇكتەدى. ەشقانداي وزگەرىس اكەلمەيتىن, ونبەيتىن داۋدى قۋالاي بەرۋدىڭ قاجەتى جوق ەكەنىن ايتىپ, ەلدىڭ بولاشاعىن جالپىۇلتتىق دەڭگەيدە ويلاۋعا شاقىردى. شىندىعىندا, قازىرگى تاڭدا جەكە مۇددە ەمەس, ەل مۇددەسىن بارىنەن بيىك قوياتىن ۇرپاق تاربيەلەۋ مىندەتى تۇر. قازاقستان گەوساياسي ايماقتا ساياسي تۇراقتىلىق جۇيەسىن قىسقا مەرزىمدە تۇبەگەيلى وزگەرتكەن بىردەن-ءبىر مەملەكەت بولعاندىقتان, تىڭ وزگەرىستەردىڭ ارقاسىندا ساياسي رەفورمالاردىڭ قازاقستانعا عانا ءتان ەرەكشە ۇلگىسى قالىپتاسقانى بارشامىزعا بەلگىلى.
كەلەشەكتە دە ونىڭ ءمان-ماڭىزى ارتا بەرمەك. الايدا قولدا بار جەتىستىككە توقمەيىلسىپ وتىرۋعا بولمايدى. الدا ۇزاق جول, اۋقىمدى جۇمىس بار. جالپى ادىلەتتى قازاقستاندى قۇرۋ مينيسترلەر مەن اكىمدەردىڭ عانا مىندەتى ەمەس, ول بۇكىل قوعام بولىپ جۇمىلاتىن اۋقىمدى ءىس ەكەنىن تەرەڭ ءتۇسىنۋىمىز قاجەت.
پرەزيدەنت قاسىم-جومارت توقاەۆ يسلام ءدىنىنىڭ ماڭىزىنا توقتالا كەلىپ, قارا جامىلىپ, بەت-بەينەسىن تۇمشالاپ العان ايەلدەر مەن قىزداردىڭ قاتارى كوبەيىپ بارا جاتقانىنا قىنجىلىس ءبىلدىردى. نەسىن جاسىرامىز, 25 جاسقا جەتپەي قاۋعاداي ساقال ءوسىرىپ, شولاق شالبار كيىپ, «اسسالاۋماعالەيكۇم» دەگەننىڭ ورنىنا «باراكاتۋ» دەپ امانداساتىن جاستار قاتارى ازايار ەمەس. كەزىندە تەلەديداردان ورىن بەرمەي دۇمشە-ءدىندارلار قوعامعا جات ءپالساپا ناسيحات جۇرگىزگەنىن ءالى ەشكىم ۇمىتا قويعان جوق. مەملەكەت باسشىسى اسىرەدىنشىلدىكتىڭ ەتەك الىپ بارا جاتقانىن ايتا كەلىپ, قازاقتاردىڭ ءداستۇرلى ءدىنى سۋنيتتىك باعىتتاعى حانافي ءمازھابىنا دەن قويۋىمىز قاجەت دەدى. ەندى قۇقىق قورعاۋ ورگاندارى حالىقتى تەرىس باعىتقا جەتەلەيتىن اسىرەدىنشىلدەرگە بۇدان كەيىن توسقاۋىل قويادى دەپ ويلايمىز.
ەل اراسىندا تامىر الىپ بارا جاتقان قۇمارپازدىق قاسىرەتىنەن قالاي قۇتىلۋ كەرەك؟ دەرەكتەرگە سۇيەنسەك, كازينولار مەن بۋكمەرلىك كەڭسەلەردە قۇمار ويىنعا بايلانعان ادامداردىڭ سانى 400 مىڭعا جۋىقتاعان. مەملەكەت باسشىسى ايتقانداي, بۇل ۇلكەن ءبىر قالا حالقىنىڭ سانىمەن بىردەي. دەمەك, بۇتىندەي ءبىر قالا جۇرتشىلىعى قۇمار ويىننىڭ قۇربانى بولىپ وتىر دەگەن ءسوز. قۇمار ويىندى قىزىقتاپ, قارىزعا باتىپ, ءوز ومىرىنە قول سالعاندار قانشاما. ەندى جاس ۇرپاقتى بۇل دەرتتەن الاستاتۋ ءۇشىن تاربيەلىك, زاڭدىلىق جۇمىستاردى كۇشەيتۋىمىز قاجەت. قوعامداعى قاتىگەزدىك تە قاتەرلى دەرتكە اينالىپ بارادى. زاڭ مەن ءتارتىپ ۇستەمدىك قۇراتىن كەز جەتتى.
مەملەكەت باسشىسى بۇگىنگى جاستار بويىندا ءپاتريوتيزمدى قالىپتاستىرۋ قاجەت ەكەنىن ەسكە سالدى. بۇل وتە دۇرىس. پاتريوتيزم دەگەنىمىز ەرلىك, ال ەرلىك دەگەنىمىز پاتريوتيزم ەمەس پە؟! كەشەگى قان مايداندا قاھارماندىق پەن ەرلىكتىڭ ۇلگىسىن كورسەتكەن باتىر اتالارىمىز ساعادات نۇرماعانبەتوۆ, باۋىرجان مومىشۇلى, راقىمجان قوشقارباەۆتىڭ ەسىمىمەن مەملەكەتتىك وردەن تاعايىنداۋ – وتە قۇپتارلىق ءىس. بۇلاردىڭ كوزسىز ەرلىگى, وتانسۇيگىش قاسيەتى كەيىنگى جاس ۇرپاققا ۇلگى-ونەگە بولۋى ءتيىس. پرەزيدەنت وزىق ويلى ۇلت بولۋ ءۇشىن بۇكىل قوعام سانا-سەزىمىن وزگەرتىپ, جاڭا قۇندىلىقتاردى ورنىقتىرۋىمىز كەرەك. وتانشىلدىق – تابىستى ەلگە اينالۋدىڭ باستى كىلتى. ءاربىر ادام تۋعان ەلىنىڭ پاتريوتى بولسا, ەلىمىزدە ءادىل قوعام ورنايدى دەپ ەرەكشە اتاپ ءوتتى. ولاي بولسا حالىق اراسىندا وتانسۇيگىشتىك قاسيەتتى دامىتىپ, التىن بەسىك ەلىن, انا ءتىلىن, سالت-ءداستۇرى مەن باتىر بابالار ەرلىگىن ۇمىتپاۋعا جانە كىندىك كەسكەن جەرىن قورعايتىن, وسى ماقسات جولىندا بار كۇش-جىگەرى مەن اقىل-قايراتىن جۇمسايتىن وتانشىل, ادال ازاماتتاردى تاربيەلەۋ وتە ماڭىزدى.
«ادال ادام – ادال ەڭبەك – ادال تابىس» وسى اجىرامايتىن ءۇش ۇعىم تابىستى, باي-قۋاتتى ەلگە اينالۋدىڭ باستى كىلتى» دەدى مەملەكەت باسشىسى ۇلتتىق قۇرىلتايدا سويلەگەن سوزىندە. شىندىعىندا, ءاربىر ادال ادام ادال ەڭبەگىمەن ادال تابىسقا جەتەدى ەمەس پە؟! دەمەك, جاستار بويىندا ادالدىق پەن ادىلدىك, جاۋاپكەرشىلىك پەن ماقسات بولعان جاعدايدا ۇلتتىڭ جاڭا ساپاسىن قالىپتاستىرۋعا ۇلكەن مۇمكىندىك تۋادى. مەملەكەت قولعا العان ساياسي-ەكونوميكالىق رەفورمالاردى الەۋمەتتىك-تۇرمىستىق جانە مادەني وزگەرىستەرمەن قاتار جۇزەگە اسىرۋىمىز كەرەك. بۇل – اسا ماڭىزدى مىندەت. سوندا عانا ۇزدىكسىز العا قادام باسامىز. ەلدى دامىتۋعا كەدەرگى كەلتىرەتىن نارسەنىڭ بارىنەن ارىلىپ, رۋحاني قۇندىلىقتارىمىزدى نىعايتقاندا عانا ۇلتتىڭ جاڭا ساپاسىن قالىپتاستىرامىز, سان عاسىرلىق مەملەكەتىمىزدىڭ تۇعىرىن نىعايتا تۇسەمىز.
ماعجان سادىحانۇلى,
«جاڭا قازاقستان» رەسپۋبليكالىق يننوۆاتسيالىق ورتالىعىنىڭ ديرەكتورى, فيلوسوفيا عىلىمدارىنىڭ كانديداتى
