مەملەكەت باسشىسى قاسىم-جومارت توقاەۆتىڭ ۇلتتىق قۇرىلتايدىڭ «ادال ادام – ادال ەڭبەك – ادال تابىس» اتتى ءۇشىنشى وتىرىسىندا سويلەگەن ءسوزىن تىڭداعاندا ۇلى ابايدىڭ: «قازاققا كۇزەتشى بولايىن دەپ, ءبىز دە ەل بولىپ, جۇرت بىلگەندى ءبىلىپ, حالىق قاتارىنا قوسىلۋدىڭ قامىن جەيىك دەپ نيەتتەنىپ ۇيرەنۋ كەرەك» دەگەن جاناشىر ءسوزى ەرىكسىز ويعا ورالدى. پرەزيدەنت ويىنىڭ اباي سوزىمەن ۇندەسۋىن ونىڭ وسى قۇرىلتايدا ايتقان ەلدىڭ ەل بولۋ باعىتىنا ۇسىنعان التى قۇندىلىعى دالەلدەيدى.
ءۇشىنشى قۇرىلتايدا حالقىنا سەنگەن پرەزيدەنت: «ءبىزدىڭ الدىمىزدا ءۇش ايرىق جول تۇر: قۇلدىراۋ, توقىراۋ نەمەسە ورلەۋ. ءبىز ءاردايىم ورلەۋدى تاڭدايمىز. ارينە, ورگە شىعۋ وڭاي ەمەس. تالاي قيىندىق تۋىنداۋى مۇمكىن. سوعان قاراماستان, تەك العا ۇمتىلۋىمىز كەرەك» دەپ ەل بولاشاعىنا اپارار جولدى انىق كورسەتىپ بەردى. ەندىگى جول – ادال جولعا ءتۇسىپ, مەملەكەتىمىزدىڭ كوسەگەسىن كوگەرتۋ. «جۇمىلا كوتەرگەن جۇك جەڭىل» دەگەن بابالارىمىز.
پرەزيدەنت ۇسىنعان قۇندىلىقتار جۇيەسى قوعامداعى بارشا جۇرتقا: ەل باسقارعانعا دا, ەڭبەككەرگە دە, ۇستازعا دا, شاكىرتكە دە, بالا تاربيەلەپ وتىرعان اتا-اناعا دا باعىت-باعدار بولا الادى. ەڭ باستىسى – ادال نيەت, وتانشىلدىق جۇرەك, تازا نامىس.
قاسىم-جومارت كەمەلۇلى ونەگە عىپ ۇسىنعان مىسال ءبارىمىزدى ويعا قالدىرسا ەكەن: «جاپونيادا, وڭتۇستىك كورەيادا, قىتايدا, سينگاپۋردا جاعىمدى مىسال كوپ, وسى ەلدەر كوپكە ۇلگى بولىپ وتىر. ال ءبىز نەگە ولاردان كەم بولۋىمىز كەرەك؟».
ءار ادام ءوز ورنىندا, ءوز قىزمەتىندە ادال ازامات بولسا, اباي ايتقانداي, «نۇرلى اقىل, ىستىق قايرات, جىلى جۇرەكتىڭ» يەسى بولىپ, ءار ءىسىن ادىلەتكە سىناتسا, قازاقستان الداعى ون جىلدا-اق بيىكتى باعىندىرىپ, ەڭسەسى بيىك ەل بولادى. سەبەبى ءبىزدىڭ مەملەكەت – جاس مەملەكەت. جاستارىمىزدىڭ ۇلەسى كوپ ءارى قازىر ولار وتە تالانتتى, كرەاتيۆتى جانە جاسامپازدىققا قۇشتار.
اتىراۋداعى ءۇشىنشى قۇرىلتايدا پرەزيدەنتىمىز «ءوز كاسىبىن وتە جاقسى بىلەتىن, وعان ابدەن بەرىلگەن, ەڭبەكقور ادام عانا تابىسقا جەتە الادى. مەن مەملەكەت باسشىسى رەتىندە ازاماتتاردىڭ, اسىرەسە, جاستاردىڭ كوزى اشىق, دۇنيەتانىمى كەڭ بولعانىن قالايمىن. بالا ەسەيگەن سوڭ قاناتتانىپ, ۇيادان ۇشۋعا ءتيىس. باسقا ايماقتاردا, ءتىپتى, شەتەلدە ءبىلىم الۋى قاجەت. وزگە جۇرتتىڭ قالاي ءومىر ءسۇرىپ جاتقانىن كورگەنى ابزال. سونداي-اق قاي جەردە وزىنە جانە ەلىنە پايداسى تيسە, سول جەرگە بارىپ ەڭبەك ەتۋى كەرەك» دەگەن سوزىمەن جاستار ارەكەتىنىڭ بەرەكەتى بار ەكەنىن انىق ءتۇسىندىردى.
قانداي وقۋ ورنى بولماسىن ونىڭ ابىرويى دا, بەدەلى دە – ونىڭ تۇلەكتەرى. ۋاقىت بەزبەنى ءبارىن دە ولشەيدى, ەكشەيدى. بولاشاقتا عىلىمدا بولسىن, ەڭبەك مايدانىندا بولسىن حالىقارالىق ءبىلىم ورداسىنان ۇشقان تۇلەكتەر ۇلكەن بيىكتى باعىندىراتىنىنا سەنەمىز. مەملەكەت باسشىسى قاسىم-جومارت توقاەۆتىڭ ۇلتتىق قۇرىلتايدىڭ «ادال ادام – ادال ەڭبەك – ادال تابىس» اتتى ءۇشىنشى وتىرىسىندا سويلەگەن ءسوزى بارشامىزعا رۋح بەرىپ, قايتكەندە قازاق ەلىنە ادال ازامات بولامىز, قانداي باستامانى قولعا السام ەكەن دەگەن جىگەر سىيلادى.
گۇلتاس قۇرمانباي,
نازارباەۆ ۋنيۆەرسيتەتىنىڭ پروفەسسورى,
ۇلتتىق مادەنيەت ورتالىعىنىڭ ديرەكتورى
