ناۋرىز مەيرامى – ەجەلدەن كەلە جاتقان جىل باستاۋى, جاڭارۋ مەرەكەسى. تامىرى تەرەڭگە بويلاعان ءاز-ناۋرىز – قاي كەزدە دە ەلدىكتىڭ, ىرىس پەن ىنتىماقتىڭ مەرەكەسى. ەلىمىزدى مەكەن ەتكەن ۇلىستاردىڭ وزدەرىنە ءتان ايشىقتارى مەن ورنەگى – بارشامىزعا ورتاق وسى مەرەكەنىڭ ءسانى مەن سالتاناتى. جانى جابىرقاۋ جاندارعا جۇبانىش بولار قايىرىمدىلىق پەن مەيىرىمدىلىك – اتا-بابادان كەلە جاتقان سالتىمىز.
ناۋرىز مەيرامى جاڭا ءومىردىڭ باستاۋى دەسەك, قايىرىمدىلىق ىستەرمەن قاتار بۇلاق كوزدەرىن اشىپ, جەر اياعى كەڭەيگەندە تازالىق جۇرگىزىپ, جاسىل جەلەك اعاشتار وتىرعىزۋدى, گۇلزارلاردى, پاركتەر مەن سكۆەرلەردى, اركىم ءوز اۋلاسىنىڭ اينالاسىن گۇلمەن كومكەرىپ, كوگالداندىرۋدى دا قولعا الۋىمىز قاجەت. ناۋرىزدى تەك كوڭىل كوتەرەتىن مەرەكە دەپ قاراماي, ونىڭ رۋحاني بولمىسىنا تەرەڭ ءۇڭىلۋ كەرەك, بىلىمگە, وقۋعا قۇشتار بولۋىمىز قاجەت. جاڭا جىلدان, جاڭا كۇننەن جاقسىلىق كۇتەتىن بولساق, ول جاقسىلىقتار جايدان-جاي كەلمەيتىنىن ءبىلۋىمىز كەرەك. جايلى تۇرمىس – تەك ناقتى ءىس پەن ارەكەتتەردىڭ, ءبىلىم مەن بىلىكتىڭ ناتيجەسى.
بۇل مەرەكە – اق تىلەكتەر مەن جىلى لەبىزدەر ايتىلاتىن كۇن. جاڭارۋ كۇنىنە ەڭبەك ادامى رەتىندە مەنىڭ دە اق تىلەگىم بار. جاڭا جىلدىڭ باستاۋى – ناۋرىز مەرەكەسى تۋعان جەرىمىزدىڭ توپىراعىنا قۇت-بەرەكە اكەلسىن! كوكجيەكتەن كوتەرىلگەن كۇننىڭ نۇرى ءار وتباسىنا بىرلىك پەن قۋانىش, باقىت پەن مولشىلىق اكەلسىن! شاكىرتتەرىمىز ءبىلىم نارىمەن سۋسىنداپ, وتانسۇيگىشتىك رۋحتارى مىقتى بولۋىن تىلەيمىن!
ۇلتىمىزدىڭ ۇلىلىعىن پاش ەتەر ناۋرىز مەيرامى قۇتتى بولسىن! ەلىمىزگە, ءاربىر وتباسىنا ىرىس پەن مولشىلىق اكەلسىن! ەلىمىز امان, جۇرتىمىز تىنىش, وتانىمىز بەرەكە مەن بىرلىكتىڭ ورداسى بولعاي! ۇلىس وڭ, اق مول بولسىن!
ايگۇل ەرجانوۆا,
رايىمبەك باتىر اتىنداعى №50 «قازعارىش» مەكتەپ-ليتسەيىنىڭ باستاۋىش سىنىپ مۇعالىمى, «قازاقستاننىڭ ەڭبەك سىڭىرگەن ۇستازى»,
ازيا چەمپيونى
