پرەزيدەنت جانىنداعى ۇلتتىق قۇرىلتايدىڭ مۇشەسى جانە ەكى سايلاۋداعى مەملەكەت باسشىسىنىڭ سەنىمدى وكىلى رەتىندە ايتارىم, قاسىم-جومارت كەمەلۇلى 2019 جىلى پرەزيدەنت بولىپ سايلانعالى بەرى قوعامداعى ادىلەتتىلىك, بىرلىك پەن جاسامپازدىق تۋرالى ايتىپ كەلەدى. وسى جولعى اتىراۋدا وتكەن ءىىى ۇلتتىق قۇرىلتايدا دا مەملەكەت باسشىسى وسى قۇندىلىقتاردىڭ قوعامدى ۇيىستىرۋ مەن جاسامپازدىق جولىندا قانشالىقتى ماڭىزدى ەكەنىنە ەرەكشە ءمان بەردى.
بىرىنشىدەن, «ەڭ الدىمەن, حالىقتىڭ بەرەكە-بىرلىگىن ساقتاۋ ەلدىگىمىز ءۇشىن اسا ماڭىزدى» دەي كەلە, مەملەكەت باسشىسى ىنتىماعى جاراسقان, ورتاق ماقساتقا ۇيىسقان ۇلت ەشقاشان ۇتىلمايتىنىنا, ەشتەڭەدەن قۇر قالمايتىنىنا توقتالدى. بۇل ىستە زيالى قاۋىم ايرىقشا ءرول اتقارادى. اسىرەسە ەلگە ءسوزى وتەتىن اعا بۋىننىڭ ورنى بولەك. ولار – قازاقتىڭ قايماعى, ۇلتتىڭ ماقتانىشى. ەلدىڭ تۇتاستىعى زيالى قاۋىمنىڭ بىرلىگىنەن باستالادى. ياعني الدىمەن ەل اعالارىنىڭ اراسىندا اۋىزبىرشىلىك بولۋى كەرەك. ولار ۇرپاققا ونەگە بولاتىن كەسەك اڭگىمە ايتۋى قاجەت.
«وسپەيتىن ەلدىڭ بالاسى ونبەيتىن داۋدى قۋادى» دەپ بەكەر ايتپاعان. وتكەن ءىس ءوتتى, ەندى ونى ەشكىم وزگەرتە المايدى. ۋاقىت ەڭ ءادىل تورەشى ەكەنىن ۇمىتپايىق. بىزگە بىتپەيتىن داۋ-داماي ەمەس, مىزعىماس ىنتىماق پەن بىرلىك كەرەك. قازىرگى تاريحي كەزەڭدە حالقىمىزدىڭ ءسوزى دە, ءىسى دە ءبىر بولۋى قاجەت. سوندىقتان زيالى قاۋىم, ەڭ الدىمەن, ەلىمىزدىڭ بىرلىگىن نىعايتۋعا باسا نازار اۋدارعانى ءجون. اعا بۋىن جاس ۇرپاققا جول نۇسقاپ, باعىت-باعدار بەرۋى كەرەك. ۇلى ابايدىڭ «ءبىرىڭدى, قازاق, ءبىرىڭ دوس كورمەسەڭ, ءىستىڭ ءبارى بوس» دەگەن ءسوزى ءالى دە وزەكتى بولىپ تۇر. مەن زيالى قاۋىم وكىلدەرىنىڭ ءبىر-بىرىنە ءاردايىم تىلەكتەس بولعانىن قالايمىن. ءوزارا جاناشىر بولۋ, تۇپتەپ كەلگەندە, ەلگە جاناشىر بولۋ دەگەن ءسوز. تاعى دا قايتالاپ ايتقىم كەلەدى: ۇساق-تۇيەك اڭگىمەنى قويۋ قاجەت» دەپ اعا بۋىن, زيالى قاۋىمعا مەملەكەت باسشىسى ۇلكەن مىندەت جۇكتەدى.
سونىمەن بىرگە قاسىم-جومارت كەمەلۇلى «ءبىز سالت-داستۇرىمىزدەن اجىراماۋىمىز كەرەك. راديكالدى نەوفيتتار حالقىمىزدىڭ سالتىندا جوق كيىم ۇلگىلەرى ارقىلى دا جات ءدىني يدەالداردى قوعامعا تاڭۋعا تىرىسىپ ءجۇر. بۇل ءبىزدىڭ ءداستۇرلى ۇعىمدارىمىز بەن قۇندىلىقتارىمىزعا جاسالىپ جاتقان اشىق شابۋىل ەكەنى انىق. ءبىز بابالارىمىزدىڭ سان مىڭجىلدىق ءدىني ءىلىمى مەن رۋحاني باعدارىنا ارقا سۇيەۋىمىز كەرەك. ەلىمىزدىڭ رۋحاني دەربەستىگىن ساقتاپ, ونى نىعايتا تۇسەمىز دەسەك, تۇركى حالىقتارى كوپشىلىگىنىڭ, سونىڭ ىشىندە قازاقتاردىڭ ءداستۇرلى ءدىنى – سۋننيتتىك باعىتتاعى حانافي ءمازھابىنا دەن قويىپ, عاسىرلار بويى بابالارىمىز ۇستانعان اسىل ءدىنىمىزدى ساقتايىق» دەپ ەلدەگى بىرلىك پەن ىنتىماقتى ساقتاۋداعى ءدىننىڭ رولىنە توقتالدى. ءداستۇرلى يسلامدى بەرىك ۇستانۋ ارقىلى ەكسترەميزمگە جانە كەرتارتپالىققا قارسى تۇرا الاتىنىمىزعا ەرەكشە نازار اۋداردى.
ەكىنشىدەن, سوڭعى كەزدە زيالى قاۋىمنىڭ كەيبىر وكىلدەرى, ءتىپتى مەملەكەتتىك قىزمەتشىلەر دە ورىنسىز بايبالام سالىپ, اينالاسىن سىناپ-مىنەۋدى ادەتكە اينالدىردى. مۇنى دوعارۋ كەرەك. قوعامداعى وزەكتى ماسەلەلەردى تالقىلاعاندا بايىپتى بولعان ءجون. ەگەر دە الەمدىك قاۋىمداستىقتان لايىقتى ورنىن يەلەنۋدى قالايتىن ۇلت بولعىمىز كەلسە, جالعان تۇسىنىكتەردەن ارىلىپ, بولاشاققا نىق سەنىممەن قاراۋ كەرەك ەكەنىن ەسكەرتتى.
ۇشىنشىدەن, مەملەكەت باسشىسى قۇرىلتايدا ۇلتتىڭ جاڭا كەلبەتىن ايقىندايتىن نەگىزگى قۇندىلىقتارعا توقتالدى: ەڭ الدىمەن, تاۋەلسىزدىك جانە وتانشىلدىق. ءار ازامات وتانعا دەگەن سۇيىسپەنشىلىگىن سوزبەن عانا ەمەس, ناقتى ىسپەن كورسەتۋى قاجەت. ءتاۋەلسىزدىكتىڭ قادىر-قاسيەتىن تەرەڭ سەزىنىپ, ونى باعالاي ءبىلۋى كەرەك. ءبىز ادىلەتتى مەملەكەت پەن وتانشىل, ادال ازاماتتاردىڭ كۇش-جىگەرىن ۇيلەستىرىپ جۇمىلدىرۋ جانە حالقىمىزدىڭ مادەني كودىن ۇنەمى زامان تالابىنا ساي بەيىمدەپ وتىرۋ ارقىلى عانا ەڭ ماڭىزدى مىندەتىمىزدى ورىنداي الامىز, ياعني قاستەرلى تاۋەلسىزدىگىمىزدى ساقتاپ, نىعايتا تۇسەمىز.
ءبىزدىڭ كۇشىمىز – بىرلىكتە. جۇرتىمىز باسىنا تۇسكەن تاۋقىمەتتىڭ ءبارىن مىزعىماس بىرلىكتىڭ ارقاسىندا جەڭىپ كەلەدى. وراسان زور سىن-قاتەرلەر پايدا بولعان قازىرگى زاماندا ىنتىماق-بىرلىكتىڭ ماڭىزى ارتا ءتۇستى. قازاقستان – ءبارىمىزدىڭ قاسيەتتى قارا شاڭىراعىمىز. سوندىقتان ءاربىر ازامات ەل تاعدىرىنا ءوز تاعدىرىنداي قاراۋعا ءتيىس.
ەلىمىز تاۋەلسىزدىك جانە وتانشىلدىق, بىرلىك جانە ىنتىماق, ادىلدىك جانە جاۋاپكەرشىلىك, زاڭ جانە ءتارتىپ, ەڭبەكقورلىق جانە كاسىبي بىلىكتىلىك, جاسامپازدىق جانە جاڭاشىلدىق سياقتى نەگىزدەردى باسشىلىققا السا, بولجاۋسىز جانە قارقىندى دامىپ كەلە جاتقان ءححى عاسىردا لايىقتى ورنىن تابادى. قورىتا كەلە ايتارىمىز, بابالارىمىزدىڭ «بۇقارانىڭ كۇشى – بىرلىكتە», «ىرىس الدى – ىنتىماقتا» دەپ بىزگە قالدىرعان اسىل وسيەتىنە ادال بولايىق, اعايىن!
زۋلفۋحار عايىپوۆ,
مەملەكەتتىك باسقارۋ اكادەمياسى
باسقارۋ ينستيتۋتىنىڭ ديرەكتورى,
استانا قالاسى قوعامدىق كەڭەسىنىڭ توراعاسى
