رەسەيدىڭ ماسكەۋ قالاسىندا قويان-قولتىق ۇرىستان الەم كۋبوگى ءوتىپ, وعان الەمنىڭ 27 ەلىنىڭ سپورتشىلارى قاتىستى. بايراقتى باسەكەدە قازاقستان قۇراماسى ساپىندا قارۋلى كۇشتەرى ارنايى وپەراتسيالار كۇشتەرىنىڭ اسكەري قىزمەتشىسى ارنات نامەتوۆ پەن جاندوس ماديحيانوۆ ونەر كورسەتىپ, جەڭىستىڭ بيىك تۇعىرىنان كورىندى. ءبىز چەمپيونداردى №22750 اسكەري بولىمىندە قارسى الىپ, قۇتتىقتادىق.
اسكەر – ءومىر مەكتەبى. ازاماتتاردىڭ ومىرگە دەگەن كوزقاراسىن شىڭداپ, تارتىپكە ۇيرەتەدى. وتباسىعا دەگەن سۇيىسپەنشىلىگىن كۇشەيتىپ, وتان الدىنداعى جاۋاپكەرشىلىگىن ارتتىرادى. ساربازدار تاڭەرتەڭنەن كۇن باتقانشا تاپسىرما ورىنداپ, فيزيكالىق كۇش-قۋاتىن, پسيحولوگيالىق مىنەز-قۇلقىن شىڭدايدى.
اسكەري ءبولىمنىڭ تابالدىرىعىن اتتاعان ساتتەن-اق وسىنداي اۋرانى سەزىندىك. تاڭعى ساعات 07.40-تا ساربازدار ساپتا تۇردى. ساپتا تۇرىپ, ونداعى جاتتىعۋلاردى ورىنداۋ – اسكەري ادەپتىلىك پەن تارتىپكە باۋلۋدىڭ بىردەن-ءبىر قۇرالى. ساربازداردىڭ ساپتاعى كوماندامەن ۇيلەسىمدى قوزعالىسى سەرگەكتىك پەن سەزىمتالدىقتى تالاپ ەتەدى, بارىنەن بۇرىن, جىلدام ءارى باتىل قيمىلداۋى ماڭىزدى. وسىنداي كورىنىستى سىرتتاي باقىلاپ تۇرعاندا, چەمپيوندار مىنگەن اۆتوكولىك كەلىپ توقتادى.
نامىستى ازاماتتار نۇرداۋلەت ەرجىگىتوۆ, ارنات نامەتوۆ جانە جاندوس ءماديحيانوۆتى ساربازدار ەرەكشە ىلتيپاتپەن قارسى الدى. اسكەري ءبولىمنىڭ كومانديرى, پودپولكوۆنيك جاسۇلان جۇماباەۆ:
– بىزدە تاريحي ءسات! الەم كۋبوگىنىڭ چەمپيوندارىن قارسى الىپ, ابىرويىمىز ارتىپ, مەرەيىمىز تاسىپ تۇر. بۇل – توككەن تەر مەن ۇزدىكسىز ەڭبەكتىڭ ناتيجەسى. بۇعان دەيىن ءبىزدىڭ ساربازدار قازاقستان چەمپيوناتىندا, سوسىن تمد ەلدەرىنىڭ تۋرنيرىندە ءبىرىنشى ورىن الىپ, وزدەرىنىڭ جەڭىسكە دەگەن ەرىك-جىگەرىن تانىتتى. جەڭىس قۇتتى بولسىن! رۋحتى جاۋىنگەرلەر كوبەيە بەرسىن! – دەپ قۇتتىقتادى.
راس, اسكەري ادام ءۇشىن سپورت كاسىبي دايىندىق تۇرعىسىنان ماڭىزدى, ال جەكپە-جەك ارنايى كۇشتەردىڭ جاۋىنگەرىن باتىلدىققا, تاباندىلىققا جانە توزىمدىلىككە تاربيەلەيدى.
الەم كۋبوگى اياسىندا قاتىسۋشىلار «ءوزىن-ءوزى قورعاۋ» تەحنيكاسىن كورسەتىپ, سونىڭ ىشىندە پىشاق پەن تاپانشادان قورعانۋ ادىستەرىن قولداندى. №22750 اسكەري ءبولىمىنىڭ اسكەري قىزمەتشىسى مايور نۇرداۋلەت ەرجىگىتوۆ 90 كەلى سالماقتا ونەر كورسەتىپ, قولا جۇلدەگەر اتاندى. ول قويان-قولتىق ۇرىستارعا شاكىرت باپتاپ, جاتتىقتىرۋشىلىق قىزمەت اتقارىپ ءجۇر.
– ءبىز ماقساتىمىزعا جەتتىك. №22750 اسكەري ءبولىمىنىڭ اسكەري قىزمەتشىسى, سەرجانت جاندوس مادەحيانوۆ 57 كەلى سالماقتا, اعا سەرجانت ارنات نامەتوۆ 62 كەلىدە قارسىلاستارىنىڭ وسال تۇسىن تاۋىپ, ماسكەۋ تورىندە جاقسى ونەر كورسەتتى. جاتتىعۋ كەزىندە دايىنداعان ادىستەرىن ساۋاتتى ورىندادى. باسى عانا, الدا تالاي بايراقتى باسەكەلەر كۇتىپ تۇر, – دەدى باپكەر نۇرداۋلەت.
1979 جىلى ليتۆانىڭ كاۋناس قالاسىندا ورنالاسقان 7-گۆارديالىق دەسانتتىق ديۆيزياعا بەكىتىلگەن سپورت بازاسىندا اۋە-دەسانتتىق اسكەرلەردىڭ قاتىسۋىمەن قويان-قولتىق ۇرىستان ءبىرىنشى جارىس وتكەن-ءدى. 1994 جىلعا دەيىن قويان-قولتىق ۇرىس ونەرى اسكەري قولدانبالى سپورت ءتۇرىنىڭ ءبىرى سانالدى. 1995 جىلى رەسەيدە ارميا قويان-قولتىق ۇرىسىنىڭ فەدەراتسياسى (FABR) تىركەلىپ, بۇقارالىق سيپات الدى. 2011 جىلى ماسكەۋدە العاش رەت جەكپە-جەكتىڭ وسى تۇرىنەن الەم چەمپيوناتى ءوتىپ, سودان بەرى سپورت ءتۇرى رەتىندە دامىپ كەلەدى.
ارنايى وپەراتسيالىق كۇشتەرىنىڭ ماقتانىشتارىن سوزگە تارتتىق. الەم كۋبوگىنىڭ يەسى جاندوس مادەحيانوۆ شىعىس جەكپە-جەك تۇرلەرىنەن جەتىستىگى كوپ, كۋنگ-فۋدان دا رەسپۋبليكالىق, حالىقارالىق جارىستاردا جۇلدە العان.
– ماسكەۋدە وتكەن الەمدىك دودا جوعارى دەڭگەيدە ءوتتى. قارسىلاستارىم وسال بولمادى. مەملەكەتتىك گيمندى شىرقاتىپ قايتقانىما قۋانىشتىمىن, – دەدى چەمپيون.
اسكەر قاتارىندا دا تالاي چەمپيوندار ءجۇر. ولاردىڭ سپورتتىق بابىندا بولۋىن رۋحاني قولداسا, تالاي جارىستا ەلدىڭ نامىسىن ابىرويمەن قورعاۋعا دايىن. ءبىز بارعان اسكەري بولىمدە ساربازداردىڭ سپورتپەن شۇعىلدانۋىنا جان-جاقتى جاعداي جاسالعان ەكەن. تەك ىقىلاس-نيەت پەن ەرىك-جىگەر بولسا, جەتىستىككە جەتۋدىڭ جولىن تابۋعا بولادى. جاندوس پەن ارناتتىڭ ۇلگىسى وسىعان دالەل…
