رەيتينگ جونىنەن قازاقستاندىق جوعارى وقۋ ورىندارى الەمدىك ءبىلىم وشاقتارىمەن يىق تىرەستىرە الادى. سونىڭ ءبىرى – Maqsut Narikbayev University ەلورداداعى جاقسىلىق ۇشكەمپىروۆ اتىنداعى «جەكپە-جەك» سارايىندا 30 جىلدىعىن ەرەكشە باعدارلامامەن سالتاناتتى تۇردە اتاپ ءوتتى.
اۋەلى الماتىدا, سوسىن استانادا ءوسىپ-ونگەن وقۋ ورداسى – Maqsut Narikbayev University-ءنىڭ تاريحى سوناۋ 1994 جىلدىڭ 14 ناۋرىزىنان باستالادى. وسى ۋاقىت ىشىندە ۋنيۆەرسيتەت ءوز ميسسياسىنا ساي, باستى قاعيداتى – حالىققا قالتقىسىز قىزمەت ەتۋ دەپ سانايتىن 40 مىڭعا جۋىق بىلىكتى مامانداردى دايارلاپ شىعاردى.
Maqsut Narikbayev University قازاقستاندا ءبىلىم بەرۋدىڭ حالىقارالىق دەڭگەيىن ۇسىنا وتىرىپ, ەلىمىزدىڭ ۋنيۆەرسيتەتتەرى اراسىندا كوش باستاپ تۇر. 30 جىل ىشىندە ۋنيۆەرسيتەت بىرنەشە ءىرى جەتىستىكتەرگە قول جەتكىزدى. اتاپ ايتقاندا, تمد-دا ءبىرىنشى بولىپ QAA اككرەديتاتسياسىنا يە بولدى, ACCA, CFA, CIMA, TOLES سەرتيفيكاتتارىن الدى, سونداي-اق BIG4-تە جۇمىسپەن قامتۋ بويىنشا ۇزدىك توپ-5 ۋنيۆەرسيتەت قۇرامىنا ەندى. ۋنيۆەرسيتەتتىڭ ءبىلىم بەرۋ باعدارلامالارىنىڭ كوپشىلىگى FIBAA حالىقارالىق اگەنتتىگىمەن اككرەديتتەلگەن, بۇل – جوعارى وقۋ ورنىنىڭ بەدەلىن بيىكتەتىپ, حالىقارالىق دارەجەدەگى دەڭگەيىن ارتتىرا تۇسەدى.
«جەكپە-جەك» سارايىنداعى سالتاناتتى كەشكە 4 مىڭنان استام ستۋدەنت, جۇزدەگەن پروفەسسور وقىتۋشىلار قۇرامى, كەش قوناقتارى قاتىستى. بۇل جيىن ارمانعا قانات بايلاعان, بولاشاعىنا باعىت-باعدار بەرگەن ۋنيۆەرسيتەتتىڭ ءال-اۋقاتىن, ءبىلىم ساپاسىن, جاستاردىڭ وقىتۋشىلارىمەن بىرگە ءبىر ساحنادا ونەر كورسەتىپ, جۇدىرىقتاي جۇمىلعان تاتۋ تىرلىگىن كوردى, تۇلەكتەردىڭ ۇستاز مەرەيىن اسپانداتقان جەتىستىكتەرىنە كۋا بولدى, جاراسىمدى, كرەاتيۆتى ونەرىن تاماشالاپ, تامساندى. بەس ساعاتقا سوزىلعان سالتاناتتى ءىس-شارا ءبىر دەممەن ءوتتى, جاستار وزدەرى ۇيىتقى بولعان دۋماندى كەشتىڭ باستى كەيىپكەرى بولدى. اسىرەسە, ۋنيۆەرسيتەت تۇلەكتەرىنىڭ جۇرەكجاردى تىلەكتەرى, ۇستازدارىنا العىس ايتىپ, ريزاشىلىعىن بىلدىرگەندە, وقۋ ورنىنىڭ جەتىستىكتەرى سارالانىپ, ۆيدەو ارقىلى كورەرمەنگە بەرىلگەن كەزدە قول شاپالاقتاماعان ادام, قولداماعان جان قالمادى, جاستار الەمدىك ۇزدىك وقۋ وردالارى قاتارىنان ورىن الۋعا ماقساتتى ۇمتىلعان ۋنيۆەرسيتەتتىڭ ستۋدەنتى اتانعانىنا بەك ريزا ەدى. ال كەشتىڭ كوركىن قىزدىرىپ, اۋەزدى انمەن ارلەگەن حەدلاينەرلەر – قازاقستاندىق ەسترادا جۇلدىزدارى Raim جانە كalifarniya جاستار ءسۇيىپ تىڭدايتىن اۋەندەردى شىرقاپ, ءتۇرلى-ءتۇستى جارىققا تولعان ساراي ءىشى ۇلكەن بي الاڭىنا اينالدى.
كەش بارىسىندا جاڭا رەكورد جاسالدى – كولەمى 850 شارشى مەتردى قۇرايتىن ۋنيۆەرسيتەت تۋىنىڭ اشىلۋ ءراسىمى ءوتتى. اتالعان اتريبۋت ۋنيۆەرسيتەتتىڭ ءبىلىم بەرۋ جانە قوعامدىق كەڭىستىكتەگى كۇشى مەن ماڭىزدىلىعىن كورسەتتى. مەرەيتوي كەزىندە ۋنيۆەرسيتەت مەكتەپتەرى اراسىندا الامان بايگە تىگىلىپ (باس بايگە 5 000 000 تەڭگە), مىقتى دايىندىقپەن كەلگەن ءتورت مەكتەپ پەن اكىمشىلىك-باسقارۋ پەرسونالى «ۋنيۆەرسيتەتتى ۇزدىك قۇتتىقتاۋ» اتاعى ءۇشىن ءوزارا تالاستى.
– بۇگىن ءبىز ۋنيۆەرسيتەتىمىزدىڭ 30 جىلدىق مەرەيتويىنا ورايلاستىرعان وتە ماڭىزدى وقيعاعا جينالدىق. 30 جىل وتە از سياقتى كورىنگەنىمەن, ءبىزدىڭ قىزمەتكەرلەر, وقىتۋشىلار جانە تۇلەكتەرىمىزدىڭ ارقاسىندا ۋنيۆەرسيتەتىمىز ەلەۋلى ناتيجەگە جەتىپ, ۇلكەن جولدان وتتىك. وزدەرىڭىز بىلەتىندەي, ءبىزدىڭ باستى ميسسيامىز – ەل مۇددەسىنە قىزمەت ەتۋ, ءبىلىمدى, بىلىكتى جاستى تاربيەلەۋ. وسى ورايدا العا قويعان ماقساتىمىزدى ورىنداۋ جولىندا تاباندى جىگەر, قاجىرلى ەڭبەك ەتكەن ءاربىر MNU مۇشەسىنە شىن جۇرەكتەن العىسىمدى بىلدىرەمىن», – دەدى باسقارما توراعاسى تالعات نارىكباەۆ.
– Maqsut Narikbayev ۋنيۆەرسيتەتىن 30 جىلدىق مەرەيتويىمەن قۇتتىقتايمىن! ستۋدەنتتىك شاقتى ۇنەمى ەرەكشە ىقىلاسپەن ەسكە الامىن. ۋنيۆەرسيتەتتەگى اتموسفەرانىڭ ءوزى كەرەمەت ەدى. ۇلكەندەردى قۇرمەت تۇتىپ, كىشىلەرگە دەمەۋ بولىپ, ءوزارا سىيلاستىق ورناتۋعا تاربيەلەيتىن. ەگەر بىرەۋ وقۋ بارىسىندا قينالىپ جۇرسە نەمەسە سىناقتان وتە الماسا, وقىتۋشىلار كوزبە-كوز سويلەسىپ, سەبەبىن انىقتاپ, جان-جاقتى قولداۋ كورسەتەتىن. ولار بىزگە ۇلكەن سەنىم ارتىپ, جىگەرلەندىرىپ, شابىتتاندىرىپ وتىراتىن. MNU جاستاردى ۇلكەن ومىرگە دايارلاۋ مىندەتىن ابىرويمەن اتقارىپ كەلەدى. كەزىندە وسى ۋنيۆەرسيتەتتى تاڭداعانىمدى ماقتان ەتەمىن. مەنى شاقىرعاندارىڭىزعا العىس ايتىپ, ءاربىر ستۋدەنتكە ساتتىلىك تىلەيمىن.
