استانادا «تازا قازاقستان. استانا – تازالىق پەن ءتارتىپتىڭ ۇلگىسى» اۋقىمدى ەكولوگيالىق اكتسيا ءوتىپ جاتىر, دەپ حابارلايدى astana-akshamy.kz
«ءمولدىر بۇلاق» دەپ اتالعان وسى اپتاداعى اكتسيا بارىسىندا سۋ ايدىندارى – وزەندەر مەن كولدەردىڭ اينالاسى قوقىستان تازارتىلادى.
ەكواكتسيا اياسىندا جاستار مەملەكەتتىك جانە باسقا دا قۇرىلىمداردىڭ قىزمەتكەرلەرىمەن بىرلەسىپ, قاراساي باتىر كوشەسىنەن ن. تىلەنديەۆ كوشەسىنە دەيىنگى اۋماقتاعى سارىبۇلاق وزەنىنىڭ جاعاسىن تۇرمىستىق قاتتى قالدىقتاردان تازارتۋ جۇمىستارىن جۇرگىزدى.
ەكواكتسيانىڭ 1000-نان استام قاتىسۋشىسى سارىبۇلاق وزەنىنىڭ جاعاسىنان 200 توننادان استام قوقىس جينادى.
قوقىستى شىعارۋ ءۇشىن 190 بىرلىك تەحنيكا تارتىلدى, ونىڭ ىشىندە 110 جۇك كولىك, 80 تيەگىش قامتىلدى.
«اتقارىلعان جۇمىستاردىڭ قاجەتتىلىگى اعىن اۋماقتارىن قتق-دان تازارتۋمەن عانا بايلانىستى ەمەس, سونىمەن قاتار ەكولوگيا مەن قورشاعان ورتانى ساقتاۋ جونىندەگى جۇمىستاردىڭ ءبىر بولىگى بولىپ سانالادى.وسىعان ۇقساس جۇمىستار «نۇرا-ەسىل» ارناسىندا, «اقبۇلاق» جانە «قاراسۋ» وزەندەرىندە جۇرگىزىلۋدە», – دەپ حابارلادى استانا قالاسى قورشاعان ورتانى قورعاۋ جانە تابيعاتتى پايدالانۋ باسقارماسى.
مۇنداي ەكواكتسيالار تۇراقتى نەگىزدە جۇرگىزىلەدى.
ەكواكتسياعا قاتىسۋشىلار بىرنەشە ساعات بويى ەلوردالىق وزەننىڭ جانىندا تازالىق جۇرگىزىپ, كوپ مولشەردە قوقىس جيناپ, اينالانى ارالاپ كوردى.
ەستەرىڭىزگە سالا كەتەيىك, اۋقىمدى ەكواكتسيا اياسىندا قالانى سانيتارلىق تازارتۋ, نوسەر جانە ارىق كاناليزاتسياسى, كوشەلەردى,تروتۋارلاردى, ورامىشىلىك اۋماقتاردى, قوعامدىق كەڭىستىكتەر مەن اۋلالاردى تازالاۋ جۇمىستارى جۇرگىزىلۋدە.
سونداي-اق, جاسىل جەلەكتەردى كۇتىپ-ۇستاۋ جانە وتىرعىزۋ, ساۋدا نىساندارىنا ىرگەلەس اۋماقتاردى جيناۋ, كوگالدار مەن گۇلزارلار ورناتۋ, رۇقسات ەتىلمەگەن پوليگونداردى جويۋ جانە ت. ب. جۇمىستار جۇرگىزىلۋدە.
