كەشە استانا قالاسى ءماسليحاتىنىڭ كەزەكتەن تىس 32-سەسسياسى ءوتتى. سەسسيانى ءماسليحات حاتشىسى ەرلان كاناليموۆ اشىپ, جۇرگىزدى. جيىنعا قالا اكىمىنىڭ ورىنباسارى ەسەت بايكەن قاتىستى.
دەپۋتاتتار الدىندا «ازاماتتاردىڭ قاۋىپسىزدىگىن قامتاماسىز ەتۋ جونىندەگى قۇقىق قورعاۋ ورگاندارى جۇمىسىنىڭ جاي-كۇيى تۋرالى استانا قالاسى پوليتسيا دەپارتامەنتىنىڭ باسشىسى, پوليتسيا پولكوۆنيگى مارات تولەباەۆ بايانداما جاسادى.
قالالىق پوليتسيا دەپارتامەنتىنىڭ باسشىسى ءوز سوزىندە قوعامدىق ءتارتىپتى ساقتاۋ سالاسىنىڭ قازىرگى جاعدايى مەن قۇقىق بۇزۋشىلىقتاردىڭ الدىن الۋ شارالارىنا توقتالدى. ازاماتتاردىڭ قاۋىپسىزدىگىن ساقتاۋعا بايلانىستى قولعا الىنىپ وتىرعان جۇمىس جوسپارلارىن ايتا كەلىپ, قىلمىسپەن كۇرەستەگى بۇگىنگى تاڭدا ءىس-شارالارمەن تانىستىردى, سونداي-اق قوعامدىق ءتارتىپتى ساقتاۋ جانە جول قاۋىپسىزدىگىن قامتاماسىز ەتۋ بويىنشا اتقارىلىپ جاتقان جۇمىستار تۋرالى كەڭىنەن باياندادى. بۇدان وزگە, اكىمشىلىك جانە قىلمىستىق ءىس جۇرگىزۋ قىزمەتىندە تسيفرلاندىرۋدى ەنگىزۋگە كوڭىل ءبولىندى.
ىشكى ىستەر ورگاندارىنداعى حالىقپەن ەتەنە جاقىن جۇمىس ىستەيتىن سالا قىزمەتكەرلەرىنىڭ ءبىرى – كولىك پوليتسەيلەرى. قازىر وسى باعىتتا بيىلعى 21 ساۋىردەن باستاپ كوشەدەگى كولىك قۇرالدارىنىڭ قوزعالىسىن باقىلاۋدا «قورعاۋ» ءموبيلدى قوسىمشاسى پايدالانىلادى. جاقىندا عانا جۇرگىزىلگەن رەيد كەزىندە وسى قوندىرعىنىڭ كومەگىمەن قالادا 84 جۇرگىزۋشىنىڭ جالعان نومىرمەن جۇرگەنى انىقتالىپ, پوليتسيا 1690 جول ءجۇرۋ ەرەجەسىن بۇزۋشىنى توقتاتتى. سونداي-اق جىل باسىنان بەرى 13 مىڭنان اسا قوعامدىق ءتارتىپتى بۇزعان ازاماتقا 42 ميلليون تەڭگەدەن اسا ايىپپۇل سالىندى.
بۇل نەگىزدە بەينەباقىلاۋ كامەرالارىنىڭ دا كومەگى وراسان زور. قازىر قالا كوشەلەرىندە 28 مىڭ بەينەكامەرا ورناتىلعان. اسىرەسە كەيىنگى كەزدە قالا مەكتەپتەرىن بەينەكامەرامەن جابدىقتاۋعا باسا كوڭىل بولىنۋدە. شاھاردا 318 ءبىلىم بەرۋ مەكەمەسىندە بەينەباقىلاۋ جۇمىس ىستەپ تۇر. الداعى ۋاقىتتا بۇلاردىڭ سانىن ارتتىرۋ جوسپارلانىپ وتىر.
ۇيىمداسقان قىلمىسپەن كۇرەس جونىندەگى باسقارما جۇمىسى جاندانا تۇسۋدە. شتاتى كەڭەيتىلىپ, ارتتەحنيكالارمەن جابدىقتالۋدا.
قازىر پوليتسيا ورگانىندا «تسيفرلىق پوليتسيا» جوباسىن كەڭىنەن جۇزەگە اسىرۋعا كۇش سالىنۋدا. وسى نەگىزدە بەينەتىركەۋ رەتىندە سمارتفونداردى جالعا الۋ جۇيەسى قولعا الىنىپ وتىر.
ورگاندا قىزمەتكەرلەردى الەۋمەتتىك جاعىنان قولداپ, مورالدىك كوتەرمەلەۋ جاعى دا ويداعىداي. تەك كەيىنگى ەكى جىلدىڭ وزىندە مەملەكەت باسشىسى جارلىعىمەن 11 قىزمەتكەر مەملەكەتتىك ناگراداعا يە بولىپ, ىندەتپەن كۇرەستە بەلسەندىلىك تانىتقانى ءۇشىن 75 پوليتسەي «حالىق العىسى» مەدالىنە يە بولدى.
– قالادا جەدەل باسقارۋ ورتالىعىنىڭ جۇمىسى جاقسى جولعا قويىلعان. قيىن جاعداي تۋىنداعاندا, كومەك كەرەك كەزدە ازاماتتار وسى ورتالىققا ارىز-شاعىمى مەن ءوتىنىشىن جىبەرەدى. ءبىزدىڭ ەڭ باستى ماقساتىمىز – ولاردىڭ تىنىشتىعى مەن قاۋىپسىزدىگىن قامتاماسىز ەتۋ ءۇشىن بارلىق قاجەتتى شارالاردى قابىلداۋ, – دەدى مارات تولەباەۆ.
