ەلوردا تۇرعىندارى قالا تازالىعىنا بەلسەندى اتسالىسۋدا. وسى ماقساتتا شاھارىمىزدا جىل سايىن ەكولوگيا اكتسياسى ءوتىپ, يگى ءىس اياسىندا ۇزدىك اۋلالار انىقتالۋدا. بيىلعى «تازا قازاقستان: استانا – تازالىق پەن ءتارتiپتiڭ ۇلگiسi» ەكولوگيا ايلىعى بارىسىندا الماتى اۋدانى بويىنشا ر.قوشقارباەۆ داڭعىلى, 46/1 ءۇيدىڭ اۋلاسى اجارلى دەپ تانىلدى.
مەملەكەت باسشىسىنىڭ تاپسىرماسى نەگىزىندە ەلوردا كوشەلەرى تازارتىلىپ, اۋماقتاردا كوگالداندىرۋ جانە اباتتاندىرۋ, سونداي-اق جولداردى رەتكە كەلتىرۋ جۇمىستارى قىزۋ ءجۇرىپ جاتىر. بۇل ىسكە الماتى اۋدانىنا قاراستى ر.قوشقارباەۆ داڭعىلىنداعى №46/1 ءۇيدىڭ تۇرعىندارى بەلسەنە قاتىستى. 2022 جىلدىڭ 7 اقپانىنان بەرى ول ۇيگە «تۇرسىن استانا-2» مەنشىك يەلەرى باسقارماسى قىزمەت كورسەتىپ كەلەدى. ميب جەتەكشىسى قۋانىش وسپانوۆتىڭ ىسكەرلىگى مەن تۇرعىنداردى تازالىق پەن تارتىپكە جۇمىلدىرا ءبىلۋىنىڭ ناتيجەسىندە اۋلادا سوڭعى جىلدارى كوپ جۇمىس ىستەلدى.
– بۇل بايقاۋعا ءبىز 2 جىل دايىندالدىق. اۋلامىزدىڭ بۇرىنعى كەلبەتى جۇرت قىزىعارلىقتاي ەمەس ەدى. وسى ۋاقىت ارالىعىندا ەداۋىر قيىن كەزەڭدى باستان وتكەردىك, جەرتولەدە كوپ جۇمىس ىستەۋىمىزگە تۋرا كەلدى. بۇگىندە ءبارى دە ارتتا قالدى. اۋلامىز جاڭاردى. ۇيدەگى بارلىق جەرتولەدە جىلۋ قۇرىلعىلارى اۋىستىرىلدى. بىراق ءبىز مۇنىمەن شەكتەلمەيمىز, الدا ءالى تالاي جۇمىس اتقارۋ ويىمىزدا بار. بىلتىر اۋلامىز بەن جەرتولەمىز جاڭارسا, بيىل اۋماقتى جارىقتاندىرۋ قولعا الىنىپ جاتىر. وسى كۇنگە دەيىن ءبىرشاما شارۋا تىندىرىلعانمەن, العا قويعان جوسپارلارىمىز ودان دا كوپ. بۇل رەتتە تۇرعىنداردىڭ اۋىزبىرشىلىگى بارلىق ماسەلەنىڭ شەشىلۋىنە جول اشتى. وسى رەتتە ۇيدەگى 300 پاتەردىڭ ارقايسىسىنا جەكە-جەكە العىس ايتقىم كەلەدى. «ۇزدىك اۋلا» اتاعىن جەڭىپ الۋىمىزعا تۇرعىنداردىڭ ارقايسىسى وزىنشە اتسالىستى. ءبىزدىڭ جەڭىسىمىز – ورتاق ەڭبەكتىڭ جەمىسى, – دەدى ميب جەتەكشىسى.
ءيا, ايتسا ايتقانداي, بۇل ءۇيدىڭ تۇرعىندارى ەرەكشە ۇيىمشىل ەكەن. ول, ارينە, قىزمەت كورسەتۋشى ميب جەتەكشىسىنىڭ جۇمىستى ۇيىمداستىرا ءبىلۋىنىڭ ارقاسى. ولاي دەيتىن سەبەبىمىز, بۇل ۇيدە ءار مەرەكە سايىن اۋلاعا قازاقتىڭ كيىز ءۇيى تىگىلىپ, اتاۋلى كۇندى تۇرعىندارمەن بىرگە كوڭىلدى ءارى ەستە قالارلىقتاي ەتىپ اتاپ ءوتۋ داستۇرگە اينالعان جانە وسى ءۇيدىڭ بارلىق تۇرعىنى: كارىسى دە, جاسى دا قالماي, ءبىر كىسىدەي اتسالىسادى. ۇيىمشىلدىقتىڭ ارقاسىندا اتقارىلعان ءىس ناتيجە بەرىپ, اۋلا زاماناۋي كەلبەتكە يە بولدى.
كوپتىڭ اراسىنان وزا شاۋىپ, ۇزدىك اتانۋ, ارينە, وڭاي ەمەس. تاجىريبەلى مامان, بىلىكتى باسشى قۋانىش ۆلاديميروۆيچ بۇل رەتتە جەڭىسكە جەتۋدىڭ قۇپياسىمەن ءبولىستى.
– استانادا تازالىق ايلىعى باستالعالى بەرى ءبىزدىڭ اۋلا تۇرعىندارى ءار سەنبى كۇنىن اسىعا كۇتەدى. ولار اينالانىڭ تازالىعىنا ۇلەس قوسۋدى ازاماتتىق بورىشىمىز دەيدى. ەكولوگيا ايلىعى بيىل 11 مامىرعا دەيىن جالعاسادى. ءبىر اي بويى تۇرعىندار جوعارى كوڭىل كۇيمەن, ءوز ەركىمەن سەنبىلىككە شىعىپ, اۋماقتى سىپىرىپ, اعاشتاردى اكتەپ, جان-جاقتى رەتكە كەلتىرۋدە. ماڭايىمىز تازارىپ, كوكتەمنىڭ لەبى سەزىلىپ جاتىر. جالپى قالامىزدىڭ تازا بولۋى مادەنيەتىمىزدى, ادامگەرشىلىگىمىزدى كورسەتەدى دەپ ويلايمىن. ال ۇزدىك اۋلا قانداي بولۋى كەرەك دەسەڭىز, مەنىڭ ويىمشا, ۇزدىك اۋلا بولۋ ءۇشىن, ەڭ الدىمەن, تۇرعىنداردىڭ ۇيىمشىلدىعى ماڭىزدى. بىرلەسە اتقارىلعان ىستە بەرەكە بولادى ەكەن. ءبىز جان-جاققا تارتپاي, ءبىر باعىتتا, تەك جاقسىلىققا جارشى بولا ءجۇرىپ, باستىسى, تۇرعىندار ءۇشىن جايلى اۋلا جاساۋعا تالپىندىق. ءبارىمىزدىڭ ويىمىز ءبىر جەردەن شىققاندىقتان, ناتيجەگە تەز ءارى وڭاي قول جەتكىزدىك. بولاشاق ۇرپاققا تازا اۋا, تازا قالا قالدىرساق دەيمىز, – دەدى قۋانىش وسپانوۆ.
