2024 جىلعى ەۋروپا چەمپيوناتىنا ىرىكتەۋ ءتۋرنيرى اياسىندا قازاقستان سولتۇستىك يرلانديا قۇراماسىن قابىلداپ, جەڭىسكە جەتتى. ۇلتتىق قۇرامانى قولداۋ ءۇشىن مەملەكەت باسشىسى قاسىم-جومارت توقاەۆ ارنايى باردى.
ويىننىڭ 28-مينۋتىندا ماكسيم سامورودوۆ قارسىلاس قاقپاسىنان ساڭىلاۋ تاۋىپ, ەسەپ اشتى. ماتچ اياعىنا دەيىن ەكى كوماندا الما-كەزەك شابۋىل جاساعانمەن, تابلوداعى ەسەپ وزگەرىسسىز قالدى.
ماتچتان كەيىن پرەزيدەنت ۇلتتىق قۇرامانىڭ فۋتبولشىلارىن ارنايى قۇتتىقتادى:
– جەڭىس قۇتتى بولسىن! بۇگىن جاقسى ويىن بولدى. شەبەرلىك كورسەتتىڭىزدەر. جۇرتتىڭ ءبارى ريزا! – دەدى.
ۇلتتىق قۇرامانىڭ كاپيتانى اسحات تاعىبەرگەن قولداۋعا العىس ايتىپ, كوماندا اتىنان پرەزيدەنتكە دوپ سىيلادى.
«استانا ارەناعا» قاراي ەرتەرەك قامدانىپ, جولعا شىقتىق. ادەتتەگىدەي, جانكۇيەرلەر قاراسى قالىڭ. اراسىندا ەل پرەزيدەنتى قاسىم-جومارت توقاەۆ تا بولدى. ارنايى كەلىپتى. ءبىزدى دە, فۋتبولشىلاردى دا وسى كورىنىس ەرەكشە قۋانتتى, ءارى شابىتتاندىردى.
ءورت كۇن بۇرىن ءبىزدىڭ ۇلتتىق قۇراما فينلياندياعا ەسە جىبەرىپ العان ەدى. بۇل جولعى قارسىلاسى – سولتۇستىك يرلانديا بولدى. 20 ماۋسىمدا بۇل كوماندامەن ەۋروپا چەمپيوناتىنا ىرىكتەۋ اياسىندا كەزدەسىپ, ويىننىڭ 88-مينۋتىندا ابات ايمبەتوۆ قارسىلاس قاقپاسىنان ساڭىلاۋ تاۋىپ, 0:1 ەسەبىمەن ۇتقان ەدى.
سول سەبەپتى جەڭىسكە دەگەن سەنىم باسىم بولدى. مۇنداي كوزقاراستى, فۋتبولشىلاردان بولەك, جانكۇيەرلەردىڭ ىقىلاس-نيەتىنەن وڭاي بايقاۋعا بولادى. الايدا ەۋروپادا ورتاڭقول كوماندا دەگەن ۇعىم جوق. ونداعى ۇلتتىق قۇرامانىڭ ويىنشىلارى الەمنىڭ ۇزدىك كلۋبتارىندا شەبەرلىگىن شىڭدايدى. سوندىقتان كەز كەلگەن ۇرىمتال ساتتە قاقپاعا گول سوعۋ قاۋپى جوعارى. مۇنداي جاعدايعا فينليانديامەن وتكەن ويىندا كۋا بولدىق.
ءبىزدىڭ جىگىتتەر ويىنعا تاستۇيىن دايىن شىعىپتى. سەنىمدى قوزعالىپ, دوپقا يەلىك ەتۋ, قاقپاعا تۋرا سوققى باعىتتاۋ جاعىنان دا قارسىلاسىنان كەم تۇسپەدى. 28-مينۋتتا ماكسيم سامورودوۆ قارسىلاس قاقپاسىنان ءدال سوققى جاساپ, ەسەپتە العا شىعاردى. قۇرامانىڭ ساۋاتتى ويىنىنان شابىتتانعان جانكۇيەرلەر الاڭدى تولقىنداتىپ, ەرەكشە كۇيگە بولەدى.
ودان كەيىن ەسەپتى ەسەلەيتىن مۇمكىندىك بولدى. بىراق تابلوداعى ەسەپ وزگەرىسسىز قالدى. قوناقتار دا قانشا تىرىسقانمەن تارازى باسىن تەڭەستىرە المادى. وسىلايشا, 1:0 ەسەبىمەن قازاقستان قۇراماسى تاريحي جەڭىسكە جەتتى.
بۇل – ۇلتتىق قۇرامانىڭ ىرىكتەۋ كەزەڭى اياسىنداعى ءتورتىنشى جەڭىسى. بۇعان دەيىن دانيانى 3:2, سان-مارينونى 0:3, سولتۇستىك يرلانديانى 0:1 ەسەبىمەن ۇتتى. ءسويتىپ, ىرىكتەۋ ويىندارىندا 12 ۇپاي جيناپ, ءوز توبىندا 4-ورىنعا تۇراقتادى.
6-تۋردا سان-مارينونى 0:4 ەسەبىمەن ۇتقان سلوۆەنيا 13 ۇپايمەن ءبىرىنشى, فينليانديادان ءوز الاڭىندا 0:1 ەسەبىمەن باسىم تۇسكەن دانيا 13 ۇپايمەن ەكىنشى ورىنعا كوتەرىلدى. ءۇشىنشى جانە ءتورتىنشى ورىندا 12 ۇپايدان جيناعان فينليانديا مەن قازاقستان تۇر. وزگە توپتاردا ايقىن فاۆوريتتەر ايقىندالسا, ن توبىنداعى العاشقى تورتتىككە ەنگەن كوماندالاردىڭ ەۋروپا چەمپيوناتىنا قاتىسۋعا مۇمكىندىگى مول. بارلىعى سىرت الاڭدا وتەتىن كەزەكتى ماتچتارعا بايلانىستى. ەندى ماگومەد اديەۆ باپتايتىن كوماندا 15 قازاندا دانياعا, 18 قازاندا فينلياندياعا قارسى ويىن وينايدى.
6 تۋردان كەيىن ا توبىندا 15 ۇپاي جيناعان شوتلانديا, ۆ توبىندا 15 ۇپايدى ەنشىلەگەن فرانتسيا, س توبىنداعى انگليا, J توبىنداعى پورتۋگاليا ەۋرو-2024 تۋرنيرىنە الدىن الا جولداما الىپ قويدى دەسەك تە بولادى.
ماسكەۋدە وتكەن الەم چەمپيوناتى كەزىندە جاپونيانىڭ جانكۇيەرلەرى وزدەرى تاماشالاعان ويىن بىتكەننەن كەيىن الاڭدى تازالاپ كەتىپ, الەم جۇرتىن تاڭعالدىرعان ەدى عوي. قازاقستان-سولتۇستىك يرلانديا ماتچىنان كەيىن ءبىزدىڭ ەرىكتى جاستار ستاديونداعى قالدىق زاتتاردى جيناپ, كوپشىلىكتىڭ ىقىلاسىنا بولەندى.
