جاز كەلسە بولدى, قوعامدا تەمىرجول جولاۋشىلارى تاسىمالىنا قاتىستى شاعىم دا كوبەيەدى. جىلدا قايتالاناتىن جاعداي. تەمىرجول جولاۋشىلار تاسىمالى ساپاسىنىڭ تومەندىگى سىن كوتەرمەيدى. سەبەبى, جولاۋشىلار قۇرامىنىڭ كوپ بولىگى – كەڭەس زامانىنىڭ مۇراسى. جىل سايىن ءبىز ۆاگوندار پاركىن جاڭارتۋ ماسەلەسىن كوتەرىپ كەلەمىز. كوپتەگەن ۋادە بار, بىراق ءىس جۇزىندە جوسپارلانعان جۇمىس قارقىنى ساقتالمايدى.
يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنشە, قازىرگى ۋاقىتتا جىلجىمالى تەمىرجول قۇرامىنىڭ پاركى 138 مىڭ بىرلىكتى قۇرايدى, ورتاشا توزۋى – 55%. مينيسترلىك 2025-2030 جىلدار ارالىعىندا ۆاگوندار پاركىن جاڭارتۋدى جوسپارلاپ وتىر. وسى ورايدا, ەسكەرە كەتەتىن جايت «قازاقستان تەمىر جولى» ۇلتتىق كومپانياسى 1997 جىلى قۇرىلدى. ياعني, 26 جىل كۇتكەنىمىز ازداي, ەندى تاعى دا 7 جىل كۇتۋىمىز كەرەك. كۇتكەن ءۇمىتىمىز اقتالاتىنىنا, ۆاگوندار پاركىن جاڭارتۋ جۇمىسى ءتيىمدى بولاتىنىنا سەنىمىمىز از. 2030 جىلى قالعان ۆاگوندار ەسكىرىپ, تەمىرجول قۇرامى پاركىنىڭ توزۋى 55%-دان دا اسىپ كەتپەيتىنىنە كىم كەپىل؟!
وسىنداي كونديتسيونەرى ىستەمەيتىن, تەرەزەلەرى اشىلمايتىن, قابىرعاسىندا تاراقاندار جۇرەتىن, قازىرگى ۋاقىتتا توزىعى جەتكەن ۆاگوندارعا جاز مەزگىلىندە بيلەت ساتىپ الۋ ارمان بولدى. ال ءساتى ءتۇسىپ بيلەت تاپقان باقىتتى جانداردى ۆاگون ىشىندەگى ناعىز ماسقارا كۇتىپ تۇرادى. جاز بويى حالىقتىڭ جان ايقايىن الەۋمەتتىك جەلىدەن ابدەن كوردىك.
جىل سايىن ءبىز ازاماتتارىمىزدىڭ ىشكى تۋريزمگە دەگەن قىزىعۋشىلىعىنىڭ ارتىپ كەلە جاتقانىن كورىپ وتىرمىز. نەگىزگى تۋرمارشرۋتتارداعى جولاۋشىلار اعىنىن باسقارۋعا قاتىستى ستراتەگيالىق جوسپار قاجەت. بيلەتتەر تاپشىلىعىمەن قاتار, بيلەت باعاسىنىڭ قىمباتشىلىعىن كورىپ وتىرمىز. ولار ءارتۇرلى ءموبيلدى قوسىمشالاردا ساتىپ الۋ كەزىندە ەرەكشەلەنەدى. رەسمي بەتتەردە تاپشى مارشرۋتتارعا بيلەتتەردى ساتىپ الۋ كەزىندە تەك جوعارعى ورىندار قولجەتىمدى. بۇل جىل سايىنعى تەمىرجول بيلەتتەر قۇنىن سۋبسيديالاۋعا قوماقتى قاراجاتتار بولىنۋىنە قاراماستان ورىن الىپ وتىر.
ونىمەن قويماي, قىمبات باعاسىنا ساپاسى ساي كەلمەيتىن پويىزداردىڭ ءجيى كەشىگۋى ورىن الىپ جاتىر. سوڭعى كەزدەرى ساپارداعى ازاماتتارىمىز ءۇشىن پويىزداردىڭ 1-2 ساعات كەشىگۋى ۇيرەنشىكتى جايت بولىپ قالدى. بۇل ۋاقىتتى جوعالتۋعا عانا ەمەس, كەيدە قارجىلاي شىعىندارعا اكەلەدى, ويتكەنى ترانسفەرمەن كەلە جاتقان جولاۋشىلار كەلەسى پويىزعا كەشىگىپ قالادى. بىراق بۇل ءۇشىن جاۋاپكەرشىلىكتى ءوز موينىنا الۋعا ەشكىم اسىقپايدى. مينيسترلىك مالىمەتىنشە, تەك 2023 جىلعى 11 جانە 17 تامىز ارالىعىندا جولاۋشىلار پويىزدارىنىڭ 50 ساعات 40 مينۋتقا كەشىگىپ كەلۋىنىڭ 86 جاعدايى تىركەلدى.
تاعى ءبىر الاڭداتاتىن ماسەلە, ول ايماقتارداعى تەمىرجول ۆوكزالدارىنىڭ كىمنىڭ مەنشىگىندە جانە قانداي جاعدايدا ەكەندىگى. ماسەلەن, سولتۇستىك قازاقستان وبلىسىندا تەمىرجول ۆوكزالىنىڭ عيماراتى, ستانتسيانىڭ ءوزى جانە جول ۋچاسكەسى «رەسەي تەمىر جولدارى» رەسەيلىك مەملەكەتتىك كومپانياسىمەن جالعا الىنعان. ەلىمىزدىڭ اۋماعىنداعى ستراتەگيالىق سالادا شەتەلدىك وپەراتوردىڭ جۇمىس ىستەۋىن قالاي تۇسىندىرۋگە بولادى؟!
«قازاقستان تەمىر جولى» ۇلتتىق كومپانياسىنىڭ قۇرىلعانىنا 26 جىل بولعانىنا قاراماستان بۇل سالاداعى جۇمىس ءالى كۇنگە دەيىن رەتكە كەلەتىن ەمەس.
سول سەبەپتى, دەپۋتاتتىق ساۋالدا كوتەرىلگەن ماسەلەلەردى جان-جاقتى زەردەلەپ, تەمىرجول تاسىمالى ماسەلەسىن تۇبەگەيلى شەشۋدى سۇرايمىز. بۇل جاي عانا ءبىر دەپۋتاتتىڭ ساۋالى ەمەس, ءبىر وڭىردەن ەكىنشى وڭىرگە جاز بويى جەتە الماعان مىڭداعان «AMANAT» پارتياسىنىڭ مۇشەلەرىنىڭ ءوتىنىشى.
ەرنۇر بەيسەنباەۆ,
ءماجىلىس دەپۋتاتى
