ەلوردا كوشەلەرىنە جاڭادان جانە قايتا اتاۋ بەرۋ تۋرالى ۇسىنىستار استانا قالاسى ءماسليحاتى تۇراقتى كوميسسيالارىنىڭ كوپشىلىك تىڭداۋىندا قارالىپ, دەپۋتاتتار تاراپىنان قولداۋ تاپتى. ۇسىنىستاردى استانا قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ جاريا ەتتى. ونىڭ ايتۋىنشا, ەندى بۇل ۇسىنىستار سەسسياعا ۇسىنىلادى, سودان كەيىن رەسپۋبليكالىق ونوماستيكا كوميسسياسىنا جىبەرىلەدى.
– اتاپ ايتقاندا, نۇرا اۋدانى بويىنشا ە108 جوبالىق كوشەگە ماجار اقىنى شاندور پەتيوفيدىڭ ەسىمىن بەرۋ كەرەك. ۆەنگريا استاناسى بۋداپەشتتە استانا دەپ اتالاتىن كوشە جانە اباي قۇنانبايۇلىنىڭ ەسكەرتكىشى بار. ءبىزدىڭ ۇسىنىسىمىز دا ەكى مەملەكەت اراسىنداعى ديپلوماتيالىق بايلانىستى ودان ءارى تەرەڭدەتۋ ماقساتىندا قولعا الىنىپ وتىر. ال ەسىل اۋدانى بويىنشا №28/1 جوبالىق كوشەگە ازيانىڭ باتىس بولىگىندەگى تۇبەك, قازىرگى تۇركيا اۋماعىنىڭ ورتاڭعى بولىگى انادولۋ اتاۋىن بەرۋ, №29/1 جوبالىق جانە تۇركىستان كوشەسىنەن باستالاتىن, ۇلى دالا داڭعىلىندا اياقتالاتىن اتاۋسىز كوشەگە قازاقستان پرەمەر-ءمينيسترى نۇرلان بالعىمباەۆتىڭ ەسىمىن بەرۋدى ۇسىنامىز, – دەدى س.ەسىركەپ.
بايقوڭىر اۋدانىنداعى «ەگەمەن قازاقستان» گازەتى كوشەسىنىڭ بويىندا ورنالاسقان اتاۋسىز ساياباققا «جۋرناليستەر ساياباعى» اتاۋى بەرىلەدى. نۇرا اۋدانى بويىنشا ە13 جوبالىق كوشەگە كورنەكتى مەملەكەت جانە قوعام قايراتكەرى, قازاقتان شىققان العاشقى كاسىبي ديپلومات ءنازىر تورەقۇلۇلىنىڭ ەسىمىن بەرۋ كوزدەلۋدە. ە29 جوبالىق كوشەگە كۇيشى-كومپوزيتور, دومبىراشى تاتتىمبەتتىڭ ەسىمىن بەرمەك. ال ە33 جوبالىق كوشەگە تۇركى حالىقتارىنا ورتاق ۇلى ويشىل, جىراۋ قورقىت اتانىڭ ەسىمىن بەرۋ ماقۇلداندى. بايقوڭىر جانە الماتى اۋداندارىندا ورنالاسقان ءال-فارابي داڭعىلىن اقجول اتاۋىمەن قايتا اتاۋ ۇسىنىلدى. ەسىل اۋدانى بويىنشا ءسابيت مۇقانوۆ كوشەسىنە شىعىس قازاقستان وبلىسىنداعى ەلدى مەكەن اتاۋى شۇبارتاۋ دەگەن اتاۋىمەن قايتا اتاۋ تۋرالى ايتىلدى. الماتى اۋدانىنداعى بۇرىنعى گەيدار اليەۆ كوشەسىنە اقىن جانە اۋدارماشى, ادەبيەتتانۋشى, بالالار جازۋشىسى مۇزافار الىمباەۆتىڭ اتىن بەرۋ كەرەكتىگى مالىمدەلدى. ا40 جوبالىق كوشەگە اقىن, قر مەملەكەتتىك سىيلىعىنىڭ لاۋرەاتى سىرباي ماۋلەنوۆتىڭ, ا564 جوبالىق كوشەگە قازاق مۋلتيپليكاتسيا ونەرىنىڭ نەگىزىن قالاۋشى, سۋرەتشى, كينورەجيسسەر, پروفەسسور امەن قايداروۆتىڭ ەسىمىن بەرۋ كوزدەلىپ وتىر. ا30 جوبالىق كوشەگە بەلگىلى جازۋشى-دراماتۋرگ, جۋرناليست ورالحان بوكەيدىڭ ەسىمىن بەرەدى.
