تەمىرجولدىڭ قارا كۇشى اتانعان جولشىلار – قوزعالىس قاۋىپسىزدىگىنە ەڭ جاۋاپتى تۇلعا. جىل ون ەكى اي اشىق اسپان استىندا ەڭبەك ەتەتىن ولاردىڭ ءار كۇنى تەمىرجولدىڭ بابىن جاساۋمەن وتەدى. ءبىز بۇگىن استانا جول ديستانتسياسىنىڭ جول مونتەرى جانگەلدى قۇرماناليننىڭ جۇمىسىمەن تانىستىق.
كۇندەلىكتى ادەتىمەن جۇمىسىنا جارتى ساعات ەرتە كەلگەن جانگەلدى جۇمىس كيىمىن كيىپ, «تابەلنىيعا», ياعني جولشىلار جينالاتىن ارنايى ورىنعا بەت الدى. ارىپتەستەرى دە جينالىپ قالعان ەكەن. ساعات توعىزدا تەلىم باستىعى بۇگىنگى كۇننىڭ جۇمىس جوسپارىمەن تانىستىرىپ, جارتى ساعات نۇسقاۋلىق وتكىزدى. جۇمىستىڭ بار قىر-سىرىنا قانىعىپ, بەلگى بەرۋشىلەر قايدا تۇرادى, قورشاۋ قايدا قويىلادى, ءبارىن پىسىقتاپ العان جولشىلار تاپسىرمانى ءتۇسىنىپ, تانىسقانىن راستاپ, جۋرنالعا قول قويعان سوڭ قۇرال-سايماندارىن اسىنىپ, جۇمىسقا بەت الدى.
– مىنە, كورىپ تۇرعانىڭىزداي, قار مەن جاۋىن-شاشىننان بويىنا سۋ جينالىپ, شىرىگەن شپالداردى جاڭاسىنا اۋىستىرىپ جاتىرمىز. بۇدان باسقا كۇندەلىكتى اعىمداعى جول كۇتىمىن جاسايمىز. كۇن ىسىعاندا رەلس ۇزارادى, قىستا قىسقارادى. سول كەزدە ولاردى تەحنيكالىق نورماعا ساي كەلتىرىپ سايكەستەندىرەمىز, اقاۋتاپقىشتار انىقتاعان اقاۋلار بويىنشا جۇمىس جۇرگىزەمىز. كۇتىمى كەلىسكەن جولدا قوزعالىس تا قاۋىپسىز ەكەنىن ءاربىر جولشى جاقسى تۇسىنەدى, – دەيدى جولشى.
توعىزدان اسا جۇمىسقا كىرىسكەن جولشىلار كەشكى التىعا دەيىن ءبىر تىنبادى. اراسىندا جارتى ساعاتتان ەكى رەت ءۇزىلىس الىپ, دامىلداپ الادى ەكەن. ونداي كەزدە قۇرالداردىڭ ءبارىن جولدىڭ بويىنان الىپ, پويىزدىڭ وتۋىنە كەدەرگى كەلتىرمەيدى. تۇسكى ۇزىلىسكە شىققان جولشىلار ارنايى جىلىتۋ كۇركەسىنە كەلىپ, ۇيدەن اكەلگەن تاماقتارىن ءىشىپ, ءبىرشاما دەمالعان سوڭ جۇمىستارىن ءارى جالعاستىردى.
– جولشى بولۋعا اسقان ءبىلىم كەرەك ەمەس شىعار, بالكىم, بىراق مىقتى دەنساۋلىق پەن شىدام قاجەت, ءتۇستى اجىراتا المايتىن دالتونيكتەر, قۇلاعى اۋىر ەستيتىندەر, قان قىسىمى كوتەرىلىپ نەمەسە ءتۇسىپ كەتەتىندەر مەن جۇرەك-قان تامىرلارى اۋرۋلارىنا شالدىققاندار مۇنداي اۋىر ەڭبەككە جارامايدى. سوندىقتان جولشىلار جىل سايىن كومپانيا تاراپىنان تەگىن مەديتسينالىق تەكسەرۋدەن وتەدى, تەمىرجول ستراتەگيالىق نىسان بولعاندىقتان ولاردىڭ پسيحيكالىق دەنساۋلىعى دا ەرەكشە قارالادى, – دەيدى جانگەلدى.
جولشىلار جۇمىسىنىڭ اۋىر كەزەڭى – قار قالىڭ جاۋىپ, بۇرقاسىن بولىپ, بوران سوعاتىن كۇندەر, ارينە. ونداي كەزدە كۇنى-ءتۇنى جۇمىس ىستەپ, جاپپاي كەزەكشىلىككە شىعاتىن جولشىلار پويىزدار قوزعالىسىنا قاۋىپ تونبەس ءۇشىن جول بويىن, باعىتتاعىش بۇرمالاردى قاردان تازارتىپ, ۋاقىتپەن ساناسپاي جۇمىس ىستەيدى. تۇنگى كەزەكشىلىككە شىققاندارعا ايلىعىنا ۇستەماقى تولەنەدى. بىراق, سۋىققا ۇرىنۋ, ءۇسىپ قالۋ قاۋپى دە جوعارى. دەمالىستا جۇمىسقا شىققان ادام ون كۇن ىشىندە ءبىر كۇن جۇمىستان بوساتىلادى. بۇل رەتتە ونىڭ جۇمىس ساعاتتارى ەسەپتەلەدى.
– جۇمىستا ەڭبەك جاعدايى تولىق جاسالعان. كورىپ تۇرعانىڭىزداي, «تابەلنىيدا» توڭازىتقىش, قىسقاتولقىندى پەش, جۇمساق ديۆان, ۇستەل ورىندىعىمەن, ىدىس-اياق – ءبارى تۇر. ءاربىر تەمىرجولشى ەكى جىلدا ءبىر رەت شيپاجايدا دەمالا الادى. مۇندا ءتيىپ-قاشىپ جۇمىس ىستەپ, ايتەۋىر كۇن وتكىزەتىندەرگە ورىن جوق. سەبەبى قازىر ەقك, ياعني ەڭبەككە قاتىسۋ كوەففيتسيەنتى ەنگىزىلگەن, ءاربىر ادام ايلىق جالاقىسى ازايىپ قالماس ءۇشىن جۇمىس ىستەيدى, – دەيدى جول مونتەرى.
جانگەلدى قۇرمانالين اقمولا وبلىسى جاقسى ستانساسىندا دۇنيەگە كەلگەن, تەمىرجولداعى ەڭبەك ءوتىلى 15 جىلدان اسادى. تەمىرجول بويىنداعى ستانسادا تۇرسا دا, ول – ءوز اۋلەتىندەگى العاشقى تەمىرجولشى. 2008 جىلى ۋاقىتشا ىستەي تۇرامىن دەپ جولشىلىق جۇمىسقا كىرگەن ەدى. ۋاقىت وتە ول بۇل جۇمىسى وزىنە ۇنايتىنىن ءبىلىپ, تۇپكىلىكتى قالىپ قويادى. بۇگىندە ونىڭ ەكى باۋىرى دا تەمىرجول سالاسىندا. بالالارى استاناعا وقۋعا تۇسكەننەن كەيىن 2018 جىلى ەلورداعا كوشىپ كەلىپ, وسىندا استانا جول ديستانتسياسىنا جۇمىسىن اۋىستىرادى. ءتورت بالاسىنىڭ ۇلكەندەرى ءۇيلى بولىپ, نەمەرەسىنە سۇيىكتى اتا بولعان جايى بار.
